Shillong, Nailur 4 : U Symbud Myntri Rangbah ka jylla uba dei ruh u National Vice President ka NPP u Bah Sniawbhalang Dhar u la ong ba ka NPP kan ym shet kylla ïa ki paidbah da kaba leit phong uniform pat shawei wat la ka don ka jingpynsaphriang khubor ba ki don ki MLA kiba lah ban leit rung sha ka BJP.
Haba kren ha ka jingïalang paidbah ha Mawryngkneng mynta ka sngi u bah Sniawbha u la ong “Ki don katto katne ki nongïalam na kiwei ki seng saiñ pyrthei kiba kwah ban rung sha ka BJP mynta tangba kynmaw ka NPP kam ju shet kylla ïa ki paidbah kumba phi ki paidbah phi la jied ïa ngi da kane ka uniform ngin ïai phong beit da kane ka Uniform namar lada ngi shet kylla ïa phi ka long kaa jingshet kylla ïa ki paidbah ka Bri u Hynniewtrep Hynniew skum”.
Halor ki jingkynnoh ba ka NPP ka dei ka BJP u la ong” Haba ngi ïatrei lang bad ka BJP ngi ïatrei na ka bynta ka roi ka par jongka jylla bad jingmyntoi jong ki paidbah”.
U la ong ka NPP ka don la ki jong ki nongrim treikam bad ka bunkam ban trei na ka bynta ka bha ka miat jong ki paidbah. U la ong ruh “ Ngi dei ka Party ka bym ju kren beiñ ne beiñ briew wat la ngi shah kren beiñ katno katno ruh”.
Haba ïada ïa ka song pisa ka sorkar u bah Sniawbha u kyntait ïa ki jingkynnoh ba kane ka sorkar ka la pyndap ram ïa ka jylla.
“Don ki seng saiñ pyrthei kiba ong ba ka sorkar MDA ka la dap ram shi rynjaiñ, kane ka long kaba bakla shibun. Ka sorkar kan ym lah ban shim ram lada kam ïoh jingkyrshan ne jingmynjur na ka sorkar pdeng bad bud ruh ïa ki kyndon ba la buh pyrkhing bha” ong u bah Dhar.
Halor ka kam nongïalam u bah Dhar u la ong “ Ki don ki nongïalam kiba heh tang ka tyngam khlem ka kam ne heh tang ka nia ka kam pat ym trei hynrei ki don pat ki nongïalam kiba ym ju bun ktien hynrei ki pynpaw da ki kam. Ngam da ju kham bun ktien eh hynrei nga leh da ki kam na kata ka daw balei ki paidbah ki ieit bad kim duh ka jingshaniah ha nga ha kine ki 20 snem ba la leit noh”.
U la ong ki don ki mat ki jura kiba hap ban ïakren ïa pynbeit da ka jingïakren sngewthuh ym ban ïa pyrta sha surok. “ Ngi dei ban ïakren ïa ki mat ki jura ha surok hynrei ngi dei ban ïakren ha Assembly ne halor ka miej ym ban ïalam bakla ïa ki paidbah ha surok. Namar lada kita ki nongsynshar kim sngap ïa ka sur u paidbah kim bit ban long ki nongsynshar ne nongïalam. Hapoh ka Assembly ngim ju ïa leh politik hynrei ha madan tei ngi ïaleh politik” pynkut u Bah Sniawbha.
