Ka NPP ka dei shisha kaba ieit jaidbynriew da ki kam ym kum ka VPP heh tang ka tyngam : Sniawbha

Shillong, Rymphang 17 : U National General Secretary ka NPP bad Symbud Myntri Rangbah ka jylla u ma Sniawbhalang Dhar mynta ka Lah Sngi U Blei ula kyntu ïa ki paidbah ba kin kyntait mardor ïa ki Nongïalam Seng Saiñ Pyrthei kiba `heh tang ka tyngam kum kito ki khiew phiang thylli katba ka kam pat ym poi shano shano ruh.
Haba kren ha ka rynsan ïalap election na ka bynta u kyrtong ka NPP na ka Barato-Mukroh u ma Aiborlang Shadap, ha Mukroh, West Jaintia Hills mynta ka sngi u ma Sniawbha u la ong “ Ha ka jingshisha ngam kwah ban kren pyrshah ïa ki seng saiñ pyrthei, hynrei tang halor ki jingshisha, ka Congress ka la long kum uto u nongpang uba don ha ICU, ka UDP kum kito ki dohkha kiba sahkut ha kajuh ka pung, ka VPP kaba shu kob ba ka ieit jaidbynriew, hynrei dei ka NPP kaba ieit shisha ïa ka jaidbynriew namar ka leh da ki kam ban roi ban par,ban ïoh ban kot bad kiew shaphrang ka jylla. Kumta nga kyntu ïa ki paidbah ban kiar na kito ki nongïalam kiba long kum kito ki khiew phiang thylli”.
Hapoh ka NPP kam don kano kano ka jingïashrut ne ïaknieh shuki namar la kyrkhu ïa ka party da ki nongïalam kiba don ka jingkitkhlieh bad jingsngewthuh bad ïohi jngai, ong u ma Sniaw.
Haba kyntu ïaki paidbah ban jied biang ïa u ma Aiborlang Shadap, u ma Sniawbha u la ong “ Ki paid Barato- Mukroh ki dei ban long kiba stad ban jied ïa u nongmihkhmat. Ngam tharai hi ruh ba kin jied bakla namar ka sorkar ruh kam ju leh klet ïa ki shnong kiba don ha khappud bad da kaba pynjop biang ïa u MDC uba don lang ha ka sorkar, kan kham pynsuk shuh shuh ban ïarap bad peit ïa ki jingeh jongphi. Hynrei lada phi bakla ka long thik kum ba tei ïa ka jingkieng ha ka jaka bym don wah. Kumta nga kyntu ïa phi ban jied ïa ka sorkar kaba don ar engine namar ngi kwah ban wanrah ïa ka roi ka par shaphi ki paid ka Constituency”.
“ Lada kiwei ki kyrtong ki wan bad pyrshang ban pynbiej ïa phi da ki jingkular ba harukom, wat ngeit ïa ki namar tang ka sorkar kaba lah ban wanrah ïa ka roi ka par bad kynmaw ka shi vote jongphi kan ïai im san snem lynter” ong u ma Sniaw.