Ka NPP bad UDP ki hap shuwai ïa ki kyrtong katba ka Congress ka don da u jong lajong: Bah Pala

Shillong, Risaw 26: U Kyrtong ka seng Congress u ban ïakhun ïa ka elekshon shiteng samoi na Shillong Parliamentary Constituency sha ka Lok Sabha u Bah Vincent H Pala u la ong ka seng ka la nang ïoh bor na kawei ka sngi sha kawei pat bad u la ong ba ki paidbah mynta ki peit bha ïa ki kyrtong ba la pynïeng da ki party kum ka NPP bad ka UDP.
“Kumba ka long mynta ka seng United Democratic Party bad ka seng National People’s Party (NPP) ki shu shim wai ïa ki kyrtong katba ka Congress ka don la u jong u kyrtong uba dei hi u dkhot jong ka party. Kine ki party kim don la ki jong ki kyrtong ki hap ban shu wai, kum phi lah ban ong ba ki la nang pynkhlaiñ ïa ki kam ïalap elekshon jong ki. Ngi ka Congress ngi don la u jong u kyrtong bad ngi hap ban ïakhun pyrshah ïa ki, ngi don ki nongtrei kiba shlur baroh ki nongtrei na ki Block bapher bapher ki don lang hangne kumta ka don ka jingïapher hapdeng u kyrtong ba shu wai bad u kyrtong ba shisha,” u la ong.
Haba ïadei bad ki kam jingpynkhreh bad kiwei kiwei baroh ka Congress ka don ha ka kyrdan bad ki don bun ki nongkyrshan kiba ym kwah ban pyni ïa ki durkhmat jong ki naba kin sa shah long ki lanot bad kumta la pynduna ban pynmih ne pynpaw ha ki Social Media bad la don la ki jong ki rukom treikam.
“Kumta ha kane ka elekshon shiteng samoi ki paidbah kin sa ai biang ïa ka rai ïa ka Congress. Ha kane ka por ngi don ha ka kyrdan ban leh bha bad kan dang long kaba kloi ban ong eiei naba ïa ka tarik ban pynlong ïa ka elekshon ruh ym pat pynbna bad ka BJP ruh kam pat pynbna ïa u kyrtong kumjuh ki kyrtong shimet bad ngim lah ban ïathuh lypa ïa kaei ka ban jia ha shwa ka elekshon bad hadien ba la pynbna ïa ka nam jop bad kaei kaba nga kwah ban ong ba kat shaba nga leit kiba bun ki paidbah ki la pynpaw ïa ka jingshaniah biang ha ka seng Congress,” u la ong.
U la ïathuh ba ka BJP kaba synshar hapoh ka sorkar pdeng ka la pulom lut la ka long ha ki kam bar ri, ka la pule puthi hapoh ka ri, ka ïoh ka kot, ka jingkyrduh kam kyrduh jam, nangta ka jingïadei bad ki kam jong ki samla, kumno ka ri ka don ka jingshong suk bad katno ki la mih ki kynrum kynram kiba ha ki por kiba mynshwa ym ju jia koit. Kumta ki paidbah ki la sngewthuh ïa ka jingdonkam ïa ka seng Congress naba kadei na ka bynta kiba duk, ki samla bad kiwei kiwei ki kam, kiba ka BJP ka la pulom.