Ka NHIDCL ka la shu shim jubor bad pynjot ïa ki jaka paidbah ban shna surok: Ardent

Shillong, Naitung 22: U Bah Ardent Basaïawmoit, President ka VPP hadien ba u la wan jngoh ïa ka jingshim jaka ka sorkar ha Mawshun, ha ka surok na Pynursla sha Dawki bad lap ïa ki jingshisha baroh, u la phah da ka jingthoh sha ka Deputy Commissioner ban tuklar halor kane ka kam.
Ka daw ba u Bah Ardent u la phah tuklar kadei namar ba ka sorkar ka la shim jubor ïa ki jaka kiba ki paidbah kim mon satia ban ai bad ym tang ba la la shim ruh, hynrei ka Kompeni kaba dei ban shna ïa kane ka surok, kata ka NHIDCL, ka la tih bad pynjot ïa kine ki jaka kiba kynthup ïa ki jaka rep jong ki briew bad ktah ruh ïa ki tyllong um dih kiba kynthup ïa ki 7 tylli ki wah kiba bsa um sha kiba bun tylli ki Shnong ha katei ka thaiñ.
Shuh u Bah Ardent u la ong ha kane ka jingthoh ba ym tang ki paidbah, hynrei wat ka Dorbar Shnong ruh ka pyrshah ïa kane ka jingpynïaid ka sorkar ïa ka surok narud nong, namar ba na ka liang ki paidbah bad ka Shnong ka kloi ban ai jaka ban pynïaid na ka surok kaba don mynta.
Ha kajuh ka por u nongïalam ka VPP u la kdew ruh ba ka Shnong ka la ujor da ka ejahar ïa kane ka jingwan eh ka NHIDCL kaba long pyrshah ïa ka mon jong u paidbah.
Kumta hehduh ka VPP, uba la wan jngoh ïa kane ka shnong ha ka 17 tarik mynta u bnai halor ka jingkhot jong ka Dorbar Shnong, u kyntu ïa ka DC ba kan tuklar ïa kane ka kam, khnang ba kan nym mih kano kano ka jingsngewsuh ïa ki paidbah bad ba ka jingpynheh ïa kane ka surok kan long kaba ïaid beit kumba la thmu da ka sorkar.