Shillong, Ïaïong 11: Haba jubab ïa ki jingeh ba la pynpaw da ka HYC-CEC bad ka Khasi Students Union (KSU), u Prof. (Dr.) Nalin Mehta, Director, NEIGRIHMS u la pynskhem ba ka kane ka jaka pule ka ïeng skhem ban bud ïa ki jingbthah da ka Department of Personnel and Training (DoPT) bad u la pynshai ruh haba ïadei bad ki bynta kiba ïadei bad ka jingthungkam ha kane ka jaka pule.
U la ong ba kine ki jingpynbna laitkam kim dei kiba thymmai hynrei ki dei na ka daw jong ka jingthylli ki kam kiba la slem kiba la mih naduh ki por kiba mynshwa na ka daw jong ka jingbym don kiba wan trei, ki jingiehnohkam bad kiwei pat ki kyrdan. Baroh ki jingthungkam ha NEIGRIHMS la leh da ka rukom kaba dei, bad kane ka bynta ruh la leh katkum ka ‘Model Roster and Regional Roster’ ba la buh hapoh ka DoPT guideline, kaba pynthikna ruh ba kan dei katkum ka jingbhah kam na ka bynta ki SC, ST, OBC, EWS, bad PwBD.
Ha kaba ïadei bad ka jingsngewkhia halor ka gender ratio halor ka jingthungkam Nursing Officer u la ong ba ki don ki kyndon ne Recruitment Rules na ka bynta ka
80:20 Female sha Male ratio bad na ka liang ka NEIGRIHMS ka la kyrpad ïa ka Ministry of Health and
Family Welfare, ka sorkar pdeng na ka bynta ki kyndon kaba la phah ha u bnai Naitung 2024, hynrei na ka liang ka Ministry, ha u bnai Nailar 2024 ka la ai jingmut pyrshah ïa kane ka jingjied halor ka ratio. Haba ïadei bad ki examination centre na ka bynta ka computer-based test (CBT) kaba dei ban pynlong da ka HLL Life Care Limited, ka central PSU, la dep shim ïa ki sienjam ban ailad ïa ki kyrtong kiba don hok kiba aplai na Meghalaya ha ki examination centre ha Meghalaya.
Shuh shuh ïa ki examination ha kane ka por kaba mynta yn pynlong da ka NEIGRIHMS lyngba kitei ki agency ba la kdew ym da ka NORCET. Ha kaba ïadei bad kawei pat ka jingeh ha kaba ïadei bad ka jingdonkam na ka bynta ki lad jingïada jong ki nongpang, u la ong ba na ka liang ka NEIGRIHMS ka la buh ïa ki lad jingdonkam hapoh ka hospital, bad kumjuh ruh ha kaba ïadei bad ka jingdonkam ban buh ïa ki nongtrei kynthei.
Haba pynkut na ka liang ka NEIGRIHMS ka la ong ba kan ïaleh katba lah ban pynlong ïa ki rukom treikam jong kane ka jaka pule kaba khuid, la ka dei ha ki rukom thungkam thungjam bad ban bud ruh katkum ki kyndon ba la buh da ka sorkar pdeng.
