Ka Meghalaya kam pat kot kyrdan ban aiti ïa ki shlem jingsumar sha ki kynhun shimet: Dr. Mukul

Shilong, Jylliew, 04: U Nongïalam ka Liang Pyrshah Dr. Mukul Sangma u la ïaiban ba ka Meghalaya kam pat kynjoh sha ka kyrdan ba yn aiti ïa ka shlem ai jingsumar na ka bynta ban bei pisa da ki kynhun shimet, khamtam haba ka Sorkar India ka la ai jingïarap lyngba ki skhim bapher bapher.
Ha ka jingleit jngoh jong u ha ka 2 tarik mynta u bnai ïa ka hospital ba 100 jingthiah ban la jan dep shna ha Chidaret, u Dr. Sangma u la ong ba ka shlem ai jingsumar bad ka skul pule doktor ka dei ban hap beit hapoh ka jingkitkhlieh jong ka Sorkar Jylla. U la ong ruh ba ka jingbei pisa jong ka Sorkar Pdeng khamtam ban ïarap khamtam ïa ki jylla kum ka Meghalaya ban bteng
tei ïa ki jaka ai jingsumar, bad ba ka Sorkar ka dei ban pyntreikam pura ïa kane ka jingai jingkyrshan ban ïa kaba plie ïa ka jingkhang ïa ka public-private partnership (PPP).
U la ong, “ngim pat poi ha ka kyrdan ban ailad ïa ki kynhun shimet ban bei pisa ha ka shlem ai jingsumar. Hadien ka jingwad kaba bniah ha ka por jong ngi, ngi la sngewskhem ba kam pat dei ka por ban shim ïa ka rai ïa kum kine ki jingïatreilang.”
U Dr. Sangma u la kdew ïa ka jingthmu ba jngai kaba don ha lyndet jong ka Chidaret Hospital, kaba la sdang ha ka por mynba u dang long u Myntri Rangbah ka Jylla. Ka projek, ka long shi bynta na ka jingthmu ban kyntiew ïa kane ka jaka kum ka jaka sumar na ka bynta ka thaiñ. Kum shi bynta jong kane ka jingthmu, la ïoh ruh ïa ka jaka kaba heh haduh 100 akar lyngba ka jingai sngewbha na ki kur, da kaba buh ha ka jingmut ïa ka jinglah ban seng ïa ka Medical College ha ka thaiñ ka ban long kum ka Tura Medical College ïa kaba yn pynïasoh bad ka Tura Civil Hospital kaba la don lypa.
U la pynshai ba ïa ka Tura Medical College la thmu ban shna kum ka jaka pule kaba pynïaid pura da ka Sorkar. Katba ka jingbei pisa na ka sorkar pdeng lyngba ka skhim ba la kyrshan da ka sorkar pdeng kam pat don ha ka por ba sdang ïa kane ka jingthmu, ïa kane ka skhim la pyntreikam ha ka por ba u Dr. Mukul Sangma u dang long u Myntri Rangbah ban plie lad ïa ki Medical College ba la bei pisa pura da ka Sorkar Jylla. Da ka jingïarap na ka Sorkar Pdeng ka jylla kam donkam shuh ban pyrkhat ïa ki lad ki lynti kiba kynthup ïa ka jingaiti ban pynïaid da ki kynhun shimet.
Ïa ka Chidaret Civil Hospital, kaba ladep kumba 90% la khmihlynti ban pyntreikam noh ha u Naitung mynta u snem. Ïa kane ka hospital la tei ha ka jinglut kaba la mang pisa T.50 klur.
Kane ka Hospital ka don hajan ka khappud Assam bad ka shimpor tang 2 kynta ban ïaid na Guwahati.
U Dr. Sangma u la ai jingïaroh ïa ka tnat ka Koit ka Khiah, ïa ka kynhun kaba don bynta ban tei ïa kane ka projek bad ong ruh ba kan long ka shlem ai jingsumar ka ban pynmyntoi haduh katta katta ïa ki paidbah ha ka thaiñ.