K a bor ding elektrik ka long kaba bor ba donkam tam ha kanek a juk ba mynta bad dei na kata ka daw ba la tip ruh ïa ka kum ka bor ba ramhah shisha namar ka lah ban pynkhih pyntyllun ïa kino kino ki kor ki bor ne ki mashin ha kino kino ki karkhana baheh baheh, ka long ka bor kaba ai jingshai lut sha baroh ki jaka naduh sor shaduh nongkyndong bad ka long kum kata ka jingmih bujli ïa ka sngi ha ka por miet. Hynrei kaei kaba donkam ka long ba ki bor ba dei peit bad dei jngoh ïa katei ka tnad ki dei ban shim khia bha ban peit lut nadong shadong ïa kane ka kam khnang ban lait pat na kino kino ki jingjia ba sngewsih.
Ym lah pat ban len na ka por sha ka por ka ju jia ka jingshah bat bor bording ki mrad bad wat ki briew ruh da ka jingbakla ban tur shajan ki transformer khamtam kito ba don sha rud shnong ne kham sha pajih na la shnong. Ka daw ka long ba ki bor ba dei peit ki shu ieh lyngkrang ïa ki khlem da ker ban ïada na ka jingtur ki mrad bad wat ki briew ruh shajan. Teng teng tang na ka jingpar ka bording duh ei ki jingim ba kordor.
Ki dang don bun ki jaka ba buh ïa ki transformer khamtam sha ki thaiñ nongkyndong kiba khlem ker sawdong. Don pat kiba ka shnong ka shim khia bad ker hi kum ïa kitei ki jaka khnang ba kan ym buh ha ka jingma jingmynsaw ïa ki briew bad ïa ki mrad ki mreng ne ki jingri jingdup.
Na ka por sha ka por ka ju jia ïa ka jingiap shah bat bor ding elektrik jong ki briew ha ka por ba ki leit sha ki jaka rep jaka riang jongki . Nalor kane yn nai ïakren lei lei ïa ki mrad ki mreng namar bun bun sien kane ka ju jia kumne ba da ki phew phew tylli ki masi ne ki mrad khlaw ki iap tang namar ba dkut ki sainar elektrik ne ba pur ding na ki transformer ne ki high tension wire. Namar ba ki dei ki mrad ki mreng kumta ym don ba shim khia baroh shi katta bad namar ba ym pat don ba iap bun ngut ym pat don ba shim khia . Dang shen la jia ka jingiap jong ki masi namar ki shah bat ha ka bor ding hajan transformer.
Hooid ka MeECL ka ai ka jingïarap haba don kiba khlad ne kiba iap shah bat bor ding hynrei ka jingïarap kam lah ban siew kylliang ïa ki mynsiem ba kordor kumta ka MeECL ka dei ban bishar bniah biang bad shim khia ban peit ba baroh ki transformer hapoh ka jylla ki dei kiba la ker bad ïada bha ban lait na kino ki jingjia ba sngewsih. Kine ki jingjia ki ju jia ruh khamtam eh ha kine ki bor ba jur lyer bad lapbah kumta nangne shakhmat ka dei ban shim khia ban phah ïa ki engineer jong ka ban leit jurip ïa man la ki transformer, ki post, ki hightension line jongka haba ka ïoh ka jingujor na ki shnong ki thaw ne ki seng bhalang ba ki la tor khnang ban ïada na kino kino ki jingjia ba sngewsih namar ki bor pynïaid jongka te ki tip bha haduh katno ka bor jongka bording elektrik ka lah ban ktah lada jia ba don ka jingsniew jong ki kor ki bor jongka.
Kane kam mut ruh ba kynnoh ba ka MeECL ka khlem shim khia ïa ka kam hynrei teng teng lehse ha ka jingduna ka fund kam lah ban leh shisien leh hynrei mynta lei lei ba la kham biang ka pla tyngka jongka ka la dei ban buh ïa kane hakhmat eh.Lada ym lah ban leh shisien leh ruh ka lah ban leh da ki wat ba nyngkong, ba ar bad ba lai ter ter. Ym lah ban len ba ka MeECL hapoh ka jingpeit jong une u myntri ba mynta ka la lah ban khyllie suki pa suki ïa ki jingduhnong jongka baroh shi katta bad kyrmen ba ka tang shu dep siew ïa ki ram ki shah kiba dang sahteng kan sa long ka tnad pynmih bording kaba lah ban ïeng ha la ki kjat ym ban dang hap ban shaniah ha ka sorkar kumba long baroh shi katta.
