Ka MECDM jong ka Sorkar Jylla ka pyni kumno ka jingïalehkai ka pynheh pynsan ïa ki khynnah

Shillong,Nailur 5: Ka jingïalang ba nyngkong jong ka Play to Learn Summit la dep ban pynlong da kaba jop ha Shillong mynta ka sngi, kaba pyni ïa ka bynta ba kongsan jong ka jingïalehkai na ka bynta ban tei ïa ka jingim ba pura jong ki khynnah. Ïa kane ka jingïalang la pynlong da ka sorkar Meghalaya, Meghalaya Early Childhood Development Mission (MECDM) bad ka Meghalaya Health Systems Strengthening Project (MHSSP) ryngkat ka jingïatreilang bad ka Sesame Workshop Indïa Trust ryngkat ka jingkyrshan jong ka SBI Foundation bad ka Indïan Institute of Banking & Finance.
Ka sorkar Meghalaya ka la wanrah ïa ka jingtreikam jong ka Early Childhood Development Mission (MECDM), kaba long ruh ka sienjam treikam eh kaba nyngkong ha ka ri. Ka thong kaba ha khmat jong kane ka sienjam treikam ka long ban pynlong ïa ki khynnah kiba bïang pura da kaba ai ïa ki jingkyrshan kiba donkam ha ka jingim khynnah jong ki: naduh ka por ba dang pun ïa ki haduh ba kin da dap phra snem ka rta. Ki nongïoh myntoi kiba lah ban ïoh myntoi na kane ki long kito kiba sumar ïa ki khyllung, ki khyllung kiba naduh ka 0 haduh 8 snem ka rta (kynthup ruh ïa kito kiba don jingduna ha ki dkhot met) ki longkmie ba armet bad kiba dang ai buin. Kane ka Mission kan pyrshang ban pynkylla ïa ki Anganwadi Centers sha ki ECD Center khnang ba lah ban ai jingkyrshan ba pura ïa ki khynnah, kynthup naduh ka jingai ïa ki jingbam ba tei, ka jingïairap ban hikai ïa ki na ka bynta ba kin heh kin san pura, ba kin ïoh ka jingmut jingpyrkhat kaba khlaiñ bad nang ban tip kiei ba kiei ba ki dei ban leh ha kaba ïadei bad ki para briew bad ha kaba ïadei bad ka jingsngew jong ki, bad kumno ba kin lah ban tip shaphang kiei ki jingdonkam ba kin lah ban leh bha ha skul bad ha ka jingim. Shuh shuh, ka don ruh ka sienjam treikam kaban phai khmat ruh sha ki bynta ban wanrah ïa kiei kiei kiba ïadei bad ka ECD ba lah ban leh ha shong ha thaw bad ha ki iing ki sem. Ki lah ban long ba, ki ki seng ïarap lade jong ki kynthei bad ïa ki kpa ba kin ïoh ïa ki jinghikai khnang ba ki lah ban long kum ki nongai jingïarap sha ki nongpeit ïa ki khynnah bad ba kin lah ruh ban hikai ïa ki nongpeit ïa ki katto katne ki bynta ba ki lah ban leh ha iing ban kyntiew ïa ka jingsngewthuh jong ki khynnah ïa ki phang bapher bapher bad ban tei ïa ka khynnah ha ka rukom kaba pura.
Kum shi bynta jong kane ka sienjam treikam, ka Sesame Workshop Indïa, da ka jingïarap na ka MHSSP, ka ai ïa ki jinghikai kiba ïadei bad ki kam tehnical bad kumjuh ruh ban wanrah ïa ki sienjam treikam ban kyrshan ïa ka ECD Mission ha kaba ïadei bad ka jingsaiñdur bad ka jingwanrah ïa ka rukom treikam ba paka jong ka ECD khnang ba kiei kiei kiba mih na ka jingtrei ka ECD mission ka jylla kan long kaba bha tam. Ka Sesame Workshop Indïa kadei kawei na ki shnat kaba long kum ka nongïalam kaba paw bha ha ka pyrthei bad kaba wanrah ruh ïa ki buit treikam thymmai kiba ïadei bad ka jingai jinghikai ïa ki khynnah ba kan long kaba ïahap bha bad ka jinghikai kumjuh ruh bad ha kaba ïadei bad ka jingsngewthuh ïa kiei kiei kiba la hikai, bad kaba la paw bha ruh ha ka long ka shnat kaba la lah ban paw ha kaba ïadei bad ka jinghikai ba la ai sha ki nongpeit ïa ki khynnah bad kumjuh ruh ïa ki khynnah ha Indïa bad ha baroh kawei ka pyrthei.
Haba ai ïa ka khubor lyngba ka video sha ki nongpynïaid jong ka lympung jingïalang, U Conrad Sangma, u myntri rangbah ka jylla Meghalaya u la ong, “Nga ngeit skhem ha kaba ïadei bad ka jingdonkam jong ka por ban ïalehkai na ka bynta ban hikai ïa ki khynnah naduh ki por ba ki dang rit. Ka Meghalaya Early Childhood Development Mission kadei ka sienjam treikam kaba phai khmat ha kaba ïadei bad kumno ban tei ïa ka jingheh jingsan jong ki khynnah ha ki snem ba ki donkam ba kin heh kin san U la ban jur ruh da kaba kren shaphang ki dak ki shin kiba lah ban ïohi lyngba ki jingpynheh pynsan bad jingsumar jong ki kmie ki kpa ha ka rukom kabab ha tam bad ka jinghikai jong ki khynnah lyngba ki jinghikai kiba wanrah jingkmen ïa ki khynnah, bad ban bynrap ruh ïa kane da kaba ai ïa ki jingbam tei met bad ka jinghikai ïa shibun kiei kiei kiban tei ïa ka bor pyrkhat ki khynnah”.
U Sangma u la pynpaw ruh shaphang ki sienjam treikam kiba bun tylli ba la shim da ka sorkar, bad ka jingthmu jong kine ki baroh ka long ban kyntiew ïa ka Meghalaya sha ki kyrdan ba shalor khnang ba ka jylla kan long kum kawei na ki 10 tylli ki jylla kiba ha khlieh ha ka ri. U la kyntu ïa baroh kiba ïadon bynta lang ha kine ki kam ba kin pyntreikam ïa ka ECD katkum ka sienjam treikam ka mission, da kaba peit ïa ka kum kawei na ki lad ba bha tam ban saiñdur ïa ka lawei jong ki nongshnong shnong kiba dang rit.
U Bah Paul Lyngdoh, myntri ka tnad Socïal Welfare, ka sorkar Meghalaya u ong, Ha kum kane ka por ba ngi ïadon lang hangne mynta ka sngi ha ka jingïalang jong ka Play to Learn Summit, ka long shisha kaba sngewkmen haduh katta katta ban don ka jingïatreilang hapdeng ka Meghalaya Early Childhood Development Mission, Sesame Workshop Indïa Trust, bad kiwei kiwei ki shnat kiba ïatrei paralok lang. Ka jingïalehkai ka long kaba kit jingmut bha; kadei ka lad ka lynti ban tei ïa ka jingmut jingpyrkhat jong ki khynnah bad ban lah ban thaw ïa ka lawei ba phyrnai na ka bynta ka Meghalaya.
U Sampath Kumar, Principal Secretary, ka sorkar Meghalaya, u la pynpaw ïa ka jingsngew jong u, da kaba ong, “Ka jinglong jong ki khynnah hi ka long ba ki sngewtynnad ban ïalehkai bad ka long kaba donkam ba ngin ba ngi dei ban ithuh bad tip ïa ka bynta jong ka jingdonkam ka jinglehkai na ka bynta ban kyntiew ïa ka jingheh jingsan jong ki khynnah ha ka rukom kaba pura. Ka sorkar Meghalaya ka ieng skhem ha ka jingtrei ba radbah jong ka ban wanrah ïa ki lad treikam treijam ban noh synnïang sha kata ka jingangnud ban ïoh ïa ki jinghikai kiba bha tam ban kyntiew Ïa ki khynnah naduh ka por ba ki dang rit. Ha kajuh ka rukom, ka Sesame Workshop Indïa ka la ïatreilang ryngkat ryngkat bad ka tnad Socïal Welfare Department ban leh ïa ka “Learn Play Grow” ha ki 4 tylli ki district ka Meghalaya. Lyngba ka jingkyrshan ba la ïoh na ka SBI Foundation naduh ka snem 2020, kane ka sienjam treikam ka la ai jingmyntoi ïa ki 90,000 ngut ki khynnah ha ki 3000 tyllki Anganwadi Centres da kaba ai jinghikai ïa ki nongtrei Anganwadi ban ai ïa ki jinghikai kiba phai khmat sha ki khynnah, ki jinghikai ba la ai lyngba ki jinglehkai, ki jinghikai pule, bad kiwei kiwei ki lad ai jinghikai kiban ïarap ban tei pura ïa ka jingheh jingsan jong ki khynnah ha baroh ki lïang naduh ka por ba dang rit ha baroh kawei ka jylla”.
U Sanjay Prakash, Managing Director, SBI Foundation, u la ïaroh ïa ka jinglong ba kyrpang jong ka jinghikai lyngba ka jingïalehkai bad u la ong ba kadei ka dei ka bynta ba kongsan ha ka jingheh jingsan jong ki khynnah naduh ka por ba ki dang rit. U la ong, “Ka SBI Foundation ïa sngew sarong bha ïa ka jingtrei ba shitrhem jong ka sha ka jylla Meghalaya bad sha ka sorkar mynta la palat 3 snem ryngka ba ki shnat ba ïatreilang kum ka Sesame Workshop Indïa ban pynskhem ïa ka ECCE ha ka jylla. Ngi la aiti lut sha ka jylla bad ngi pyntikna ba ki jingmut jingpyrkhat ba lung jong ki khynnah kiba pule ha ki anganwadi centre kin ïoh ïa kiei kiei kiba bha tam ha ka jingim bad kine ki khynnah kin nang heh nang san bad kin nang stad lyngba ki jingpule ha ki primary bad ki jingpule secondary bad ki lah ban noh synnïang sha ka jingkiew ka roi ka par jong ka Indïa hadien habuh.”
U Tusharendra Barpanda, Head- Professional Development Centre, Eastern Zone, Indïan Institute of Banking & Finance U ong, "Ngi ngeit ba ka jingheh jingsan ba pura jong ki khnnah ka long kaba donkam tam bad ka bynta ba ha pdeng jong kiei kiei baroh, bad ka IIBF ka sngew sarong ban ai jingkyrshan ïa kine ki sienjam ba la shim na ka bynta ki khynnah naduh ka rt aba dang rit ha Meghalaya. Nga sngew skhem ba ka jingbteng jong ka jingtreikam lang jong ng ikan lah ban thaw ïa ki buit bad ki lad ba thymmai ban ai jingkyrshan ïa ka jingpyrshang jong ka sorkar Meghalaya ban kyntiew ïa ka jinghikai lyngba ka jingïalehkai ha Meghalaya.
I Sonali Khan, Managing Trustee, Sesame Workshop Indïa Trust I la ban jur,Ka jingïatehlok bad ka sorkar Meghalaya, ka SBI Foundation bad ka IIBF ban kyrshan ïa ki kam kiba ïadei bad ka early childhood development ha ka jylla Meghalaya kadei kaei kaei kaba khraw na ka bynta jong ka Sesame Workshop Indïa. Nga ïohi ïa ka jingmyntoi bad ka jinglah jong kane ka rynsan ba kan long kum ka rynsan kaban wad bnïah ïa shibun kiei kiei, ban pyrkhat thymmai ïa ki kam ba bha bad ban wanrah ïa ki buit thymmai. Ka Sesame Workshop ka la wanrah ruh ïa ka jinghikai ïa ki khynnah lyngba ki jingpynlehkai ha kylleng ka pyrthei mynta la palat ïa ka 50 snem bad la lah ruh ban ïohi ïa ki jingkylla. Ka shong sa tang ha ngi, kum ki briew kiba la heh la san kiba dei ki nongri nongsumar, ba ngi dei ban wanrah ïa ki jinghikai lyngba ki jinglehkai na ka bynta ban tei ïa ki khynnah ha ka rukom kaba pura. Naduh ba la pyllait paidbah, ka ECD Mission ka la lah ban pynlong ïa ki jingïalang ha ki block ne ki “block conventions” ha ki 10 tylli ki block jong ka jylla, ban ai jinghikai ïa ki nongïalam shnong bad ki nongtrei kiba ha khmat eh, bad kumjuh ruh ïa ki nongtrei sorkar shaphang ka jingdonka, jong ka early childhood development ne ka jingheh jingsan ba bïang ba bit jong ki khynnah naduh ki por ba dang rit, bad ban khot ban wer ïa ki shnong ki thaw ba kin trei na ka bynta ban pynïaid ïa ki kam jong ka ECD Mission ha ka rukom kaba paka tam. Ka bynta treikam kaba kham kyrpang bha jong kine ki jingïalang ka long ka jingïatreilang jong ka shnong ka thaw. Ngi, pynpaw ba ka rukom treikam jong ka ECD ka long kaba la ïatrelang da kiba bun tnad bad ki shnat bad ka jing donkam ban ïoh ïa ka jingïatreilang khnang ba kane ka mission kan long kaba lah ban poi sha ka thong. Sa kawei pat ka bynta ba kyrpang jong kane ka
mission ka long ban ka phai khmat bha sha ki nongïalam shnong bad ka jingïashim bynta jong ki tnad treikam bapher bapher; kum ka tnad Socïal Welfare, Health & Family, Education, Meghalaya State Rural Livelihoods Society (MSRLS) bad ka State Rural Employment Society (SRES). Ka Mission ka ïohi ba ka jingjop kan shong eh lada ka don ka jingsngewtrai jong ki shnong ki thaw ïa kane ka kam, kaba kynthup naduh ïa ki nongïalam bad haduh ki iing ki sem.
Kat haduh u bnai Nailur, ka ECD Mission ka la lah ban pynmih ïa ki jingthoh kiba ïadei bad kumno ban pynïaid ïa ka kam jong ka Mission ïa kaba yn sa sam sha ki shnong ki thaw jong ka Meghalaya khnang ban lah ban ïarap ïa ki briew, ki nongïalam shnong bad ki kynhun treikam shnong jong ki Seng Ïarap lade ne ki self-help group, ba ki lah ban pynïaid ïa ki kam jong ka ECD. Ka Mission ïa mynta ka dang ïaid sha kmat na ka bynta ban ai ïa ki jinghikai n aka bynta ki Master Traiñers ha ki Cluster Level. Ha ka 24 tarik u bnai Nailar, 2023 la dep ban ai traiñing ïa ka kynhun ba nyngkong, da kaba ai jinghikai ba kham bha shuh shuh ïa ki lady supervisor, ki cluster coordinator, ki ASHA facilitator, ki Cluster resource persons, Gram Sevaks/Sevikas, Anganwadi workers, ASHAs, Community Gender HEalth Activists (CGHAs), ki nonghikai skul, ki nongri nongsumar ïa ki khynnah (ki kmie, ki kap bad kiwei kiwei ki nongri nongsumar ïa ki ha iing) ki dkkhot jong ka Self HElp Group bad ka Village Organizations (VO) khnang ba yn lah ban ai jinghikai ïa kiwei pat ki dkhot kiba ïatreilang kiba hap lang ha kajuh ka thup, bad ban sdang ruh ka jingai jinghikai ïa ki nongtrei kam shnong bad ki nongïalam shnong. Ka bynta kaba kham hadien ka long ban sdang noh ïa ki jingtreikam kiba kongsan jong ka ECD Mission ha ki shnong ki thaw: ki kam ha ki Anganwadi Centres, kiei kiei kiba lah ban leh ha iing ha sem ïa kaba lah ban leh da I nongri nongsumar, bad ban pynlong ïa ki lympung ha ki shnong ki thaw ban ai jinghikai bad bust ha ka jingmut jingpyrkhat jong ki dkhot ka shnong ka thaw.
Kane ka lympung jingïalang ka pynpaw ïa ka jingdonkam ba dei ban bsut lang ruh ïa ki rit dustur bad ki rukom leh ïa kiei kiei katkum ki khana pateng khang ba yn lah ban pynmih ïa ki jingthoh ne kino kino ki lad ai jinghikai na ka bynta ka ECCE khnang ba kin long kiba ïahap had ka National Curriculum Framework (NCF, Oct 2022) bad ka Education Policy 2020 ba thymmai. Lyngba ki jingïaphylliew jingmut la ïakren ruh shaphang kiei kiei ki ba la lap bad kiba don ïa ka jingpynshisha ha kaba ïadei bad ki sienjam treikam ban nang kham kyntiew shuh shuh ïa ki sap ki phong jong ki khynnah, ka kamram jong ka shnong ka thaw ban ïa don bynta ban ai jinghikai katkum ki riti dustur, bad ban ai ki jinghikai kiba long lyngba ki jinglehkai katkum ba la shem ïa ka jingbit jingbïang jong kine ki jingleh katkum ka jingwad bnïah. Kane ka lympung jingïalang ka pyni ïa ki kam jong ka ECD Mission, bad ka jingnoh synnïang jong ki shnat kiba kyrpang kiba ïatreilang kum ka Sesame Workshop Indïa ha kaba pynïadei bad ki jinghikai kiba dei katkum ki jinglehkai kiba ïahap ruh bad ka National Curriculum Framework (NCF) bad NEP 2020. La kren ruh ha kaba ïadei bad ki nongri nongsumar ne ki nongpeit nongjngoh ïa ka bynta ba kyrpang jong ki ban ai jingkyrshan ïa ka jingïalehkai jong ki khynnah da kabab uh ïa ka jaka lehkai kaba shngaiñ, ai ïa ki ïa ki tïar ki tar kiba suk ban ïoh, bad pyrshang ban pynlong ïa ki khynnah ba ki lah ban lehkai hi da lade bad ban pynlong ïa ki ba kin long kiba pyndonkam ïa ki buit jingstad jong ki.