Nongstoiñ, Nailar 19: Ka jingpyntreikam jong ka sorkar ïa ki skhim na ka bynta ban kyntiew ïa ka ïoh ka kot ha ki nongkyndong lyngba ka Basin Development Authority, ka long ka jingkyrkhu kaba khraw ïa ki paidbah nongshong shnong ha West Khasi Hills, khamtam eh ïa ki nongkyndong kiba im ha ka rep ka riang.
Kum ban pynkynmaw ba ka jingpyntreikam jong katei ka tnad ïa ki skhim ba la mang da ka sorkar ka long lyngba ki Employment Facilitation Centre (EFC), kiba la buh ha man la kawei pa kawei ka Block Office hapoh ki District hapoh ka jylla.
Nalorkata ka jingpyntreikam ïa ki skhim ka long ba katei ka tnad ka pdiang kylluid ïa ki nongshong shnong, lada ki wan sha kitei ki Centre ban pan ïa ki
jingpynshai, kumno ban ieng ha la ki kjat na ka bynta ban kyntiew ïa ka ïoh ka kot ka kamai kajih lyngba ki lad jingïarap kiba ka sorkar ka la pynkhreh.
Naduh ba ka sorkar ka la sdang ban pyntreikam ïa ki skhim lyngba katei ka tnad treikam, bun bah ki samla jong ka West Khasi Hills ki la ïoh jingmyntoi na kitei ki centre kiba don ha ki saw tylli ki Block Ophis ba kynthup ïa ka Mairang, Nongstoiñ, Mawthadraishan bad Mawshynrut Block. Nalorkata bun bah ki nongkyndong ki la ïoh jingmyntoi na katei ka tnad kum ha ka rep ka riang, ri jingri bad kiwei kiwei.
Ka rukom treikam jong katei ka tnad, ka ai ruh shibun ka jingmyntoi ïa ki samla, namar katkum ka phang pdeng ba ka buh ka long halor ka Integrated Village Development Plan (IDVP), na ka bynta ban ai jinghikai ïa ki samla bad ïa kito kiba la ïoh ïa ka jinghikai kaba bniah, yn thung ïa ki kum ki Volunteer na ka bynta ba kin leit ban shim jingkheiñ ïa ka jingdon jong ki longïing haman la ki shnong jong ki.
Ha ki shnong kin jurip bniah ïa ki jingdonkam jong ki paidbah kum ïa ka jingïoh ïa ki um bam um dih kiba biang, ki lynti syngkieng, ka bording, bad kiwei kiwei bad na ka bynta ban ïoh ïa ka jingkheiñ kaba biang.
Nalorkata la pynkhreh lypa ruh ïa ki phom kiba kitei ki volounteer ki dei ban pyndap bad ban pynpoi ïa ki ha ka ophis katkum ka por ba la buh. Ha katei ka tnad treikam, ki don hynñiew tylli ki mat ba kongsan kiba la hikai ïa ki samla ban tip ïa ki kam ba kiba don ha ki shnong ba ki leit ban jurip kum ïa ka rep ka riang, ka thung ka tep, ri jingri, ki khlaw ki btap, umbam umdih bad kiwei kiwei.
Ki samla kiba la dep shah hikai ki hap ban tip ruh ïa ka jinglong jingman jong ki nongshong shnong kum ha ka ïoh ka kot bad ka trei ka ktah. Nalorkata ki dei ban tip ruh ïa ki pud ki sam jong ki shnong lyngba ki map, khnang ba yn lah ban pynbha ïa ki shnong ki thaw, ka rep ka riang, ban pynïoh ïa ka umbam umdih, ban tyngkai ïa ki khlaw ki btap bad ki jaka jngoh kai pyrthei.
Katei ka tnad treikam ka ai jingtip ruh ïa ki shnong sha ki tnad treikam ba pher bapher jong ka sorkar, khnang ba kin tip lada ki wan donkam, na ka bynta ban pynrung ïa ka kyrteng jong ki shnong ha ka Website jong ka jylla, khnang ba kin ïoh ïa ki jingdonkam lada ki kwah bad bun kiwei kiwei ki bynta ba don kam ba ki paidbah.
Ka jingtreikam jong katei ka tnad ka long ka jingkyrkhu kaba khraw lada ki paidbah kin don ka jingïatreilang kaba jan bad ka sorkar na ka bynta ban kyntiew ïa ka roi ka par, ka ïoh ka kot bad ka bha ka miat jong baroh ki nongshong shnong.
