Ka Mawlai kum ka lahduh ba thymmai jong ka Meghalaya State League

Wahiajer, Rymphang 02: Ka Mawlai SC ka la ïoh ban kheit ïa u soh ka jingjop ha ka sngi Saitjaiñ (01 tarik Rymphang) hadien bun snem jong ka jingtrei shitom, ka jinglong ryntih bad ka jingaiti lut na ka bynta ki nongïalehkai bad ki nongkitkam ha kaba ki la jop ïa ka final jong ka 4th Meghalaya State League 2024 da 5-4 ha ka jingïashut penalty (tiebreaker) pyrshah ïa ka Shillong Lajong FC ha Wahiajer Multipurpose Sports Complex Stadium.
Haduh kaba kut jong ka 90 minit bad shiteng kynta ha ka extra time ym shym la don satia ba lah ban pynkhihjar ban pynïakhlad ïa kine ki kynhun ba kynsai tam mynta ka samoi bad kumta ka rai ba khatduh ka la poi sha ka tie-breaker, hakhmat ki hajar ngut ki nongpeitkai kiba wan sakhi ïa kane ka jingïakhun kaba itynnat.
Haba phaidien, ka Lajong ka la lah ban jop ïa ka semifinal lyngba ka tie breaker pyrshah ïa ka Rymbai Shkenshynriah hynrei ha kane ka kynti ka Mawlai ka la long kaba seisoh. Ka penalty ba lai jong ka Lajong, ba la shut da u Firstborn Roy Khongsti, la shah khanglad noh ha u Lambhamiki Lamare rangapkol jong ka Mawlai, bad kane ka la long ka khyllipmat ba pynïakhlad ïa kine ki arliang.
Haba phai sha ka jingïalehkai, ka jingïakhun ka la kham shongshit bha ha ka extra time, ha kaba ka Mawlai ka la aiti lut ban pyrshang jop ïa ka jingïalehkai shuwa ban kut ka por. Ha ka jingpyrshang ban pynthikna ïa ka namjop ha ka extra time ka Mawlai ka la duh ïa ar tylli ki kabu thep kol kiba la tyngkhuh ïa u crossbar, kaba ar ka la wan na u kapten ka kynhun – u Brolington Warlarpih, bad ka la dei la ka hok ba dei ma u uba la shim ïa ka spot kick kaba khatduh ban pynthikna ïa ka jingjop na bynta ka Mawlai.
Ka Mawlai kum ka lahduh ka la ïohpdiang ïa ka cheque kaba 5 lak ryngkat ka trophy ba la aiti da u Symbud Myntri Rangbah ba donburom ka Jylla – u Bah Sniawbhalang Dhar ha ka jingïadon lang u MLA ka Jowai u Bah Wailadmiki Shylla, Bah Hamletson Dohling – President ka Meghalaya Football Association bad u General Secretary ka MFA – Bah Sunesh Syiem lem bad kiwei. Ka Lajong ka la ïohpdiang ïa ka song khusnam kaba 3 lak kum ka kynhun ba wan ba ar (Runners up).
Ka MSL ba la pynlong da ka MFA la kyrshan ïa ka da ka Directorate of Sports & Youth Affairs, ka Sorkar Meghalaya, naduh ba la sdang ïa ka ha u snem 2017. Ka wanrahlang ïa ki kynhun ba kynsai tam na baroh ki synjuk district kiba la ïasoh bad ka MFA ban ïakhun ha kawei ka lympung kaba heh jong ka Jylla bad ha kane ka samoi ki don 24 tylli ki klob na kylleng ka jylla kiba la ïakhun ban ïoh ïa ka nam lahduh jong ka Meghalaya.
Ha ka jingthmu ba la pynpaw da ka MSL ban rah ïa ka jingïalehkai kaba itynnad sha ki dong bapher bapher jong ka jylla, mynta u snem ïa ka final la pynlong ha Wahiajer, ka sien kaba nyngkong ba la wanrah ïa kane ka league ha kane ka jaka. Ka Tyrsad ka la long ruh ka jaka ïalehkai ha ka sien kaba nyngkong ha ka por ba dang ïakhun ïa ka group stage.
Lah ban kdew ruh ba ka jingjop jong ka Mawlai ka la bteng ïa kaei kaei kaba la kylla long ka dustur ha ka MSL – kata haman la ka samoi ba pynlong la jop da kawei pat ka klob. Ka final ba nyngkong la rah da ka Niaw Wasa United bud sa ka Lajong ha u snem 2019, ka Rangdajied United ha u snem 2023 bad mynta ka kynti ka Mawlai.
Katba lai tylli ki kynhun ba rah khatduh ki dei na Shillong, ym lah ban len pat ba ka jingsynshar jong ki klob jong ka nongbah ka jylla kam long kaba thikna; mynta u snem ka Ladthadlaboh bad ka R Shkenshynriah (kiba na West bad East Jaintia Hills) ki la wanrah ïa ka semi final kaba jwat na bynta ka Mawlai bad ka Lajong kiba la hap ban ïakhun dohïap ban pynliem ïa ki.
Na bynta ka Mawlai, ka jingïaidlynti jong ki ka la long kaei kaei kaba phylla. Ki khlem ïashimbynta ha ki ar tylli ki samoi ba hakhmat jong ka MSL namar ki dang shu ïoh biang ban rung sha ka Shillong Premier League ha u snem 2020. Hynrei ar snem ba la duh ha ka khlam Covid-19 ka la pynslem ïa ka jingwanphai hynrei ki la ïaid shakhmat ban rah nam lahduh ïa ka SPL ha u snem 2022 bad nangta ban ïada ïa ka ha u snem 2023. Baroh ar tylli ki burom jong ka SPL 2023 bad ka MSL 2024, ka Mawlai ka la ïohrah hapoh ka jingïalam jong u coach Hering Shangpliang, uba la nang pynkhraw shuh ïa ka nam da kaba rah sa ïa ka MSL bad ka Mawlai.
La ïoh ruh ban sam ïa ki khusnam shimet sha ki rangïalehkai ba kynsai. ka nam ‘Player of the Final’ ka la leit sha u Iohborlang Lyngdoh Lyngkhoi jong ka Lajong katba ïa ki lai tylli pat ki khusnam la khur baroh da ki rangïalehkai ka Mawlai – Lambhamiki Lamare (Golden Glove kum u rangap kol ba kynsai), u Khrawkupar Jana (Golden Boot ba ïoh thep bun kol tam; 12 tylli ki kol) bad u Damanbhalang Chyne (Golden Ball kum u rangïalehkai ba kynsai tam ha kane ka lympung).
Ka MSL kaba 5 ka dang sah sa katto katne bnai hynrei ki District League ki ban sa rai ïa ki kynhun ban ïashimbynta ki dang ïaid shait shait shakhmat. Ha kine ki saw sien pynlong, ka MSL ka la pynroi shibun ïa ka kyrdan ïalehkai ha baroh ki dong jong ka Meghalaya da ka nam bad ka burom, khlem da phai sha ka song khusnam, baroh ki pynshlur ïa ki nongïalehkai bad ki klob ban ïakhun shitom ban long kiba kynsai tam, ban long ki lahduh jong ka jylla Meghalaya.