K a mariang ka dei ka paralok ba ïajan tam bad u briew bad ym don mano mano ba lah ban im khlem ka marïang, kata ki dieng ki siej, ki jingthung jingtep, ka um, ka jingshai ka sngi bad ka lyer. Ka pyrthei ka dei ka Planet kaba don ïa ki jingdonkam jong ka jingim kat kum ka jingshem jong ki stad ne saïantis. Kiwei pat ki planet ne ki metbneng kim long satïa kiba bit naka bynta ka jingim jong u biew. Ban lah ban im ha kiwei pat ki planet ne ki metbneng u briew u donkam ïa ka lyer (Oxygen) bad ki jingbam kiba lah ban thung tang ha kane ka pyrthei. Kumta ka marïang kaba khuid bad kaba lait na ki jingjakhlïa ka long kaba donkam na ka bynta ban ïarap ïa u briew ban long uba koit ba khïah. Hynrei katba nangmih ki sngi na ka bynta ka jingmyntoi shimet u briew hi u nangbam duh bad nang pynjot ïa ka marïang bad kane ka wanrah ïa jingduh nong ïa u khun bynriew hi baroh lang.
Nalor jong ka jingpynneh ïa ki dieng ki siej bad jingri jingsumar ka jingri khuid ïa ki rud ki kïar ka long kaba donkam shibun. Ka jingroi jong ka jingstad ha kine ki sngi ka ïarap ïa ki briew ba kin nang ban thaw ïa ki lad ki lynti kumno ban ri khuid ïa ka marïang. Hynrei katta katba nangkiew ka jingnang jingstad katta ka jingleh khlem akor bad leh palat ïa ka marïang ka nang ïai jïa ha kane ka ri Indïa bad kane ka jylla jong ngi. Haba ïanujor bad kiwei pat ki ri ka pyrthei ka Indïa ka dang dei kawei na ki ri kiba sahdien eh ha ka lïang ka jingkhuid. Hooid ym lah ban leh bad ka nongbah Shillong ka long kawei na ki nongbah kaba la ïoh nam kum ka Scotland of the East, hynrei katba nangmih ki sngi kane ruh ka nanglip rong bad ka jingjakhlïa ka nang kiew katba nangmih ki sngi.
Ki rud jong ka sor Shillong kum ka wah Umkhrah kawei na ki wah kaba pawnam ha ki sngi u mynbarim, mynta ka la kylla jong kawei na ki jaka bret jakhlïa paidbah bad baroh ki jakhlïa la pyntuid sha ka. Kum kane ka jingeh ka jïa ym satïa tang kane ka nongbah Shillong, hynrei ha kiba bun ki thain nongkyndong ki wah ki kylla long ki nala radbah ha kaba baroh ki jakhlïa la pyntuid sha ki. Katno ka long kaba i tohmet ban ïohi ba wat ki painkhana la pyntuid beit beit sah ki wah kiba mynnor ki long ki jaka saitjain bad ki jaka tongdoh jong ki myn barim. La ïohi ba ha ki dang shen ha ki snem ba la leit ka jylla ka la shim khïa ban pynkhuid ïa ka wah umkhrah. Kane kam dei ban kut tang hangne, hynrei ka sorkar ka donkam ban shim ïa ki lad ki lynti ban peit bad kyntiew ïa kiba kum kine ki kam kiba ïadei bad kaba ri ba sumar ïa ka marïang.
Kumba la kdew haneng ba ka marïang kaba khuid ka long ka tyllong jong ka koit ka khïah, ka sorkar ka donkam ban shim ïa ki lad ki lynti kiba khlïan ban ai ïa ka jingshimkhïa na ka bynta ban sumar ïa ka marïang. Ka sorkar ka donkam ban pynïoh ïa ka tnad kaba kyrpang ban peit ïa ka koit ka khïah lyngba ka marïang kaba khuid. Ka long kaba donkam ban don ïa ka tnad kaba kyrpang ban pynïoh ïa ka jingai jinghikai sha ki paidbah halor ka marïang bad ka koit ka khïah. Ban wanrah ïa ka jingjop halor kane ka phang ka sorkar ka donkam ban ïoh ïa ka jingïatreilang jong ki Dorbar Shnong bad ruh kiwei pat ki sengtrei mon sngewbha khnang ban long ka jingkieng sha ki paidbah khamtam ha ki thain nongkyndong.
Haduh kine ki sngi ki dang don shibun bah ki longiing ha ki thain nongkyndong ki bym don satïa ïa ki jaka leit bar ne ki painkhana kiba bïang. Ha ki jaka sor la ïohi ba ki paidbah ki lah ban ïoh ïa ki trok bad kali kit nuit na ka bynta ban leit bret ïa ki jakhlïa sha ka jaka bret nuit ba la buh kyrpang, hynrei ha ki thain nongkyndong ki paidbah ki shu bret ïa ki nuit bad ki jakhlïa sha ki rud ki kïar wat ki painkhana la pyntuid sha ki wah bad ki rud nong. Kane ka la long kawei na ki daw bah jong ka jingshah ktah jong ka koit ka khïah.
Ki paidbah ki don ïa ka hok ban ïoh ïa ka jingkoit jingkhïah bad kane ka dei kawei na ka thong jong ka sorkar pdeng, hynrei lada ka sorkar jylla kam lah ban wanrah ne shimkhïa ïa kane ka jingdonkam ki paidbah kin ym lah satïa ban ïa ka marïang kaba koit ba khïah. Ryngkat ka jingai jinghikai ka sorkar ka donkam ban pynïoh ïa ki lad ïarap pisa na ka bynta ban pynlah ïa ki paidbah ban ïoh ïa ki painkhana kiba paka ban lait na ka jingleit jakhlïa ha ki jaka bymdei. Ha kajuh ka por ki paidbah ki donkam ïa ki jaka bret jakhlïa kiba paka. Ka jingai jinghikai ïa ki nongpynïaid shnong kan ïarap ïa ki ban buh ïa ki ain bad ki kyndon ban khanglad ïa ki paidbah ban bret kulmar ïa ki jakhlïa bad ri khuid ïa ka marïang.
