Ki dieng ki siej, ki khlaw ki btap, ki sim ki doh, ki jingthaw ba im laiphew jait ha kane ka mariang ki long kiba kongsan bad bakordor shibun eh ha kane ka pyrthei. Ki don ruh ka jingïadei bad ka jingïashaniah (inter relationship and inter-independence) iwei ïa iwei pat. Lada jia ba pynduh ne pynjot noh ïa iwei, kata, jot bad duh lang sa kiwei pat bad kumta ter ter.
Mynshwa, ki longshwa manshwa jong ngi ki long kiba stad bad shemphang haduh katta katta ban tyngkai bad sumar ïa ki khlaw ki btap bad ki dieng ki siej. Don kiba ong ba ki leh biej, hana, ba ki pynjot bad pynkhuid ïa ki khlaw ki btap ban rep ban riang bad ban ïoh thung ïoh tep. Hynrei, haba ki leh ïa kata ka rukom rep shyrti ne rem ram, ki da pyrkhat bha pat ba ki dieng ki siej kin mih biang hadien habud.
Shu buh lada ki rep bad pynkhuid mynta u snem ïa kata ka jaka rep, ki ieh pat ïa ka haduh 9 ne 10 snem eiei (shi kylla bri) khnang ba kato ka jaka kan ïoh biang ka jinglong sboh (retained its fertility) bad ki da ieh haduh ban da heh da san bha ki dieng ki siej bad ki khlaw ki btap. Kane ka pyni ba ki Khasi ki kheiñkor bha ïa ki khlaw ki btap bad ïa ki dieng ki siej, ym dei ba ki shu leh biej khlem pyrkhat kumba ong kine ki riew stad mariang kane ka juk mynta.
Ym tang katta, hynrei ki Khasi ki ju buh kyrpang ruh ïa ki ‘Law Lyngdoh ki ‘Law Kyntang ha manla ki Raid ne ki Hima. Ki buh ruh ïa ki ‘Law Adong’ bad ki mana bad pyrkhing bha ïa ki shnong ki thaw ba kim bit ban shu ïaleh pathar ïa ki dieng ki siej ne ki khlaw ki btap khlem ka jingbit jong ki bor pynïaid shnong ne bor pynïaid hima. Ki leh khnang ïa kane ban pynneh pynsah (preserve) ïa ki tyllong umbam umdih, ban tngen bad lait ka jingjaboh ka mariang, ban kmen ki sim ki doh bad ki mrad ki mreng baroh.
Ha kane ka juk mynta pat, na ka daw jong ka jingleh stad palat jong kito kiba sngew stad ïalade, ka jinglalot spah lalot hajar, ki briew kim salia shuh ban pynjot pathar naphang lin ïa ka mariang tang ban ïohlum spah lum hajar khlem pyrkhat shuh ïa ka ïap ka im, ka pang ka shitom bad ki jingkordit ki ban mih na kata ka jingleh kulmar khlem da pyrkhat jong ki hi.
Ka jingkhluit ka pyrthei mynta (global warming), ki jingpang TB, ki jingpang Cancer, ki jingdon ka BP ha manla uwei pa uwei, ki jingpang shini ba laiphew jait jong ki briew, ki jingpang khyllai (kidneys) bad kiwei kiwei ki jait jingpang khyllah ba laiphew jait laiphew rukom ki mih mynta namar kane ka daw.
Ki riewstad pyrkhat mariang (environmentalists) mynta ki la sdang kyndit bynriew ban phah thung dieng noh manla u snem bad manla ki jaka, ki la sdang pei shkor ban pynkhuid ïa ka jingjaboh jong ki wah ki um, ban ïada na ki jingjaboh (polution) bad kiwei kiwei ki la kylla dier por noh pynban namarba kim sngewthuh bad kim shemphang bad kim da salia than ïa ka jinghikai bad jingshemphang bad jingïohi jngai jong ki kpa tymmen bad ki kmie tymmen jong ngi naduh hyndai hynthai.
Sngap keiñ haba kumta,. hato, ki kham stad ki Khasi mynshwa ne kham stad ki riewstad mariang jong kane ka juk mynta ne? Sa ïa puson hi ma phi ki nongpule.
