Shillong, Nohprah, 01: U State President jong ka National People’s Party (NPP) , Bah Prestone Tynsong u la ong ba ka lyer shongshit ha ka elekshon MP kan ym lah satia ban treikam ha kane ka elekshon MDC kaba lah ban long shen ha u snem ban wan.
“Lada nujor ïa ka elekshon MP bad ka elekshon MLA/MDC, ka la ïapher baklybak,” u la ong haba kren bad ki lad pathai khubor dang shen.
Lah ban kdew hangne ba ha ka elekshon MP na Shillong Parliamentary constituency, u kyrtong ka Voice of the People’s Party (VPP) Dr. Ricky J Syngkon u la jop suk kum u MP thymmai, katba u kyrtong ka Congress ba dei ruh u MP barim Bah Vincent H Pala u la wan ha ka kyrdan ba-ar. Katba ka kyrtong jong ka NPP ba dei ruh ka Myntri sorkar jylla, Dr. Ampareen Lyngdoh ka la wan ha ka kyrdan ba lai.
U Bah Prestone u ong ba ki paidbah ki tip ba ha ka elekshon MP ki jied ïa u Nongmihkhmat u ban shakri da kaba leit sha Delhi ym ban don ha ki constituency.
U ong ruh ba lada kren ïa ka jingshisha, u MP un ym lap ban leit rung ha man kawei pa kawei ka shnong ne ka dong.
“Hynrei haba ngi jied ïa ki MLA ne ki MDC ka long ba jan baroh ki shnong wat ki dong bad ki iing ki sem ki khmih lynti ba uno lane kano u/ka briew kiba lah ban ïa rung ïa mih ne ban ïa tynrong lem ïa ki jingdonkam ba bun syrtap jong ka shnong ka thaw,” u la ong.
U Bah Prestone u la ong ba ha ka jingïohi jong u hi, ka elekshon MLA/MDC bad ka elekshon MP ka ïapher baklybak.
