Shillong, Lber 14: Ka Voice of the People Party (VPP) ka la kyntiat ïa ka jingkynnoh u Bah Albert Thyrniang ha ka jingthoh jong u kaba u la kynnoh ba ka VPP ka pyndonkam da ka niam ha ki rynsan ialap elekshon.
Ka Party lyngba ka kyrwoh ba la phah da u Dr. Batskhem Myrboh, Nongaiktien ka Party, ka kwah ban pynpaw ba ka ïa kubur lem bad ka jingsngew ba la pynpaw da u Bah Albert Thyrniang ba ka don ka jingma na ka jingpynïakhleh ïa ka niam bad ka sainhima sima. Hynrei ka long pat kaba bakla ban kynnoh ba ka VPP ka pyndonkam da ka niam kumba leh da ka BJP. U Dr. Batskhem Myrboh ka ong ba kane ka jingkynnoh u Bah Albert jingkynnoh ka mih na ka jingbymsngewthuh bha ïa ka saiñpyrkhat bad ki nongrim ba la ju pynpaw da ka VPP bad ki nongïalam jongka.
Ka Seng ka ong ba ym shym la thoh hangno hangno ha ka Riti Pynïaid Kam jong ka VPP ba ka seng ka ïashah ïa kano kano ka niam ne kynhun niam. “Ïa ka VPP la pynshong nongrim ha ka saiñpyrkhat kaba ym don liang bad kano ka niam. Ka VPP kam mynjur ruh ban ong ba ka Meghalaya ka dei ka jylla Khristan bad ngim don jingthmu ruh ban pynbna kumta”, la ong u Dr. Myrboh da kaba bynrap ruh ba kum ki briew ngi ïoh mynsiem na ki kot niam kiba hikai shaphang ka hok bad ka jingshisha ha ka imlang sahlang bad ka saiñhima sima.
Ban kynnoh ba ka VPP ka pynkheiñ ïa ka Model Code of Conduct tang namar ba seng ka ju sot na ki kot niam ka dei ka rukom pyrkhat kaba bakla shibun. Wat la katta ruh na ka liang ka Party kam don eiei ban pyrshah ïa ki jingsngew jong ki nongkynnoh.
U Nongaiktien ka Seng, u la ong ruh ba kum ka Party, ka kwah ruh ban pynshai ba kam ju pan jingkyrshan na ki paidbah halor ka nongrim jong ka niam lane ban leh shiliang ïa kano kano ka niam hynrei ka ïeng skhem halor ki nongrim jong ka hok ka sot. “Ka VPP ka pdiang ïano ïano ban pynïasoh bad ka seng lada kiba wan pynïasoh ki pdiang ïa ka saiñpyrkhat jong ka synshar khadar kaba khuid bad ruh ban ïada ïa ki hok tynrai jong ki trai ri trai muluk bad ruh da kaba burom lang ïa ki hok jong baroh ki nongshongshnong ka jylla”, la pynkut ka Kyrwoh.
