Karbi Anglong, Jymmang 10: Ka Seng Raid Kherwang haka 9 tarik Jymmang kala pynlong ïaka jinglehñiam Thoh Lyngdoh, The Kherwang Ritual Festival kaba dei ka jinglehñiam ba shisien shisnem da ki jaitbynriew khasi kiba shong ba sah ha ka thaiñ West Karbi Anglong bad ïa katei ka jinglehñiam la pynlong haka shnong Mynser jong ka West Karbi Anglong.
Katei ka jinglehñiam ka dei ruh shibynta ban pynneh bad pynim ïa riti ka dustur ka kolshor tynrai bala buh naduh u mynbarim ban kñia ban khriam bad lehkmen shuwa ban thung ban bet ïa u symbai, ban bha ka rep ka riang bad ka kamai kajih jong ki nongshong shnong ha katei ka thaiñ.
Ki nongshong shnong ha katei ka thaiñ kila pdiang burom ruh ïa u Bah Shemborlang Rynjah CEM ka KHADC u ba la leit ban shimbynta ha katei ka jinglehñiam ha ka jingdonlang Avijit Kro, Deputy Chairman ka KAAC u D. Uphing Maslai EM ka KAAC, u Avner Pariat, u Bah Pynshngaiñlang Rattane President ka United Karbi Peoples’ Organisation (UKPO) bad u nongai jingmut jong ka Seng Raid Kherwang bad kiwei kiwei.
Haba kren ha katei ka sngi naka liang u Bah Shemborlang Rynjah u la pynpaw ka jingsngewkmen ban ioh leit iuhkjat ha ka shnong mynser kaba dei ka shnong ba shong ba sah da ki jaitbynriew Khasi ha West Karbi Anglong District jong ka jylla Assam ban sakhi ïaka lehñiam Thoh Lyngdoh shuwa ba ki khun ki hajar kin thung kin tep ban bha ka rep ka riang bad ka kamai kajih ryngkat ka kyrkhu kyrdoh ba katei ka jinglehñiam kan wanrah ïa u soh ba bha ïaki khun ki hajar kiba shong ba sah ha katei ka thaiñ.
