Shillong, Naitung 01: U Working President ka United Democratic Party (UDP) u badei ruh u Myntri Sorkar jylla u Bah Paul Lyngdoh ha ka sngi Thohdieng, u la ong ba ka jingpyntreikam ïa ka roster system ka la shai kdar ba kan treikam nangne shakhmat ne prospectively.
Haba kren sha ki lad pathai khubor u Bah Paul ula ong ba ka Office Memorandum (OM) ba thymmai ba la pynmih ha ka 14 tarik mynta u bnai ka la kheiñ ïap noh ïa ka OM ba la pynmih ha u snem 2022 kaba kdew ba ka jingpyntreikam kan kyrtiang dien ban pynshong nongrim naduh u 1972 bad ong ba kane ka OM kaba mynta ka jingpyntreikam kan dei nangne shakhmat.
“Ka OM ba tymmai ka kdew ba ïa ka Roster System yn pyntreikam nangne shakhmat kaba mut naduh bala pynmih ïa ka OM” u la ong.
Kane ka jingkren u Bah Paul ka la wan hadien ba ka KHNAM bad kiwei ki sengbhalang ki la pynpaw ka jingbynñiaw halor ka OM thymmai ba pynmih ka sorkar halor ka jingpyntreikam ïa ka Roster System.
Na ka liang u General Secretary ka UDP u Bah Jemino Mawthoh u la ong ba ka nongrim jong ka Party kadei hi ba ka jingpyntreikam ïa ka roster system kan dei beit nangne shakhmat.
“Ka jingpyntreikam ïa ka Roster kadei katkum ka jingpynmih ïa ka OM thymmai bad kane kadei hi ka nongrim jong ka Party ban pyntreikam nangne shakhmat ym ban phaidien” u la ong.
U Bah Jemino ula ong ïathuh ba shen ka Party kan sa phah ki jingai jingmut sha ka kong Ampareen Lyngdoh kaba khmih ïa ka Committee ba don ki sengsaiñ pyrthei haba ïadei bad ka jingdonkam ban thaw da ka Formula ban pdiang bad ban pynhun ïa baroh ki jaidbynriew hapoh ka jylla halor ka jingpynkylla ïa ka State Reservation Policy bad ka Roster System.
