Ka ktien Khasi bad Garo ha ka Khyrnit ba Phra ka dei kaba la ïai bud dien da ka sorkar MDA

Shillong, Nailar 02 : Ka jingdawa ban pynrung ïa ka ktien Khasi bad Garo ha ka khyrnit kaba Phra jongka Riti Synshar ka ri India ka dei ka mat kaba la ïai dawa naduh mynshwa haduh mynta da ki seng bhalang, ka Khasi Authors Society (KAS) bad shim khia bha ruh da ka sorkar MDA ban ïai bud dien sha Delhi, hynrei ba ka AITC kan shu kam ba tang hadien shitaiew ba ki ïakhih ha Delhi la rah ïa ka mat hapoh ïing dorbar Parliament da u MP ka TMC ka dei tang ka jingthmu shim kabu ïa kane ka mat ba la jan ka election namar wat u MP ka NPP u Dr W.R Kharlukhi ruh ula rah hi ïa kane ka mat hapoh Rajya Sabha, ong u Symbud Myntri Rangbah ka jylla u bah Pretone Tynsong.
U bah Prestone uba dei ruh u National Vice President jongka NPP u la ong ka jingshimkhia ka AITC ïa kane ka mat ka paw shai kdar ba ki don ka jingthmu sha lyndet tang namar ba la jan ka election katba ïa ka ILP pat shi kyntien ruh kim nud ban ang ha Delhi namar ki long thik kum kito ki suri kup snieh langbrot tang namar ba la jan ki bnai election ki shim ïa kane ka mat ban pynrung ïa ka ktien Khasi bad Garo ha ka Khyrnit kaba Phra”.
“ Lada dei shisha kiba shim khia ïa kine ki mat ki la dei ban shim khia naduh u snem ba la dep keiñ ha ka por ba ki dang don ha ka Congress balei mynta tang shu rung sha ka AITC ki khie khohreh ban tur sha Delhi lane balei kim leh ei ei ha ka por ba ki don ha ka shuki?” kylli u bah Prestone.
U bah Pretone ula ther shuh shuh ïa kine ki MLA jongka Congress kiba pynïasoh sha ka AITC da kaba ong “ Ha kato ka por ba phi don ha ka shuki balei phi khlem leh ei ei halor kane ka ktien Khasi bad Garo ban ïakhun ban pynrung ha ka khyrnit kaba phra da mynta sa tang katto katne bnai la long ka genral election phi khie khohreh. Wat shim kabu ban pynkylla politik ïa kane ka kam bad ban kam ba ka dei ka jingshim khia jong phi namar kane ka long kaba bakla shi katdei eh.
Ka sorkar MDA ka la wanrah da ka Resolution hapoh ïing dorbar Assembly ha u snem ba la dep bad ka la phah sha ka sorkar pdeng ban dawa pynrung ïa ka ktien Khasi bad Garo ha ka Khyrnit kaba Phra bad mynta ruh ka dang ïai bud dien sha Delhi ka khlem shong thiah thai satia”.
U la ïathuh kum ki nongïalam jongka sorkar MDA ki la ïa kynduh la lai sien-saw sien ïa u Myntri Kam Pohïing ka ri India u Amit Shah halor kane ka mat, u MP ka NPP ha Rajya Sabha ruh u rah ïa kane ka mat hapoh ka ïing dorbar Parliament bad ka sorkar MDA ka ïai bud dien beit na ka por sha ka por.
Halor ka Zero Hour Nortice ba la rah da u MP ka AITC hapoh ka ïing dorbar Parliament (Lok Sabha) u la ong “ Kane ka long kumba rah hi ia ka zero hour notice ha Assembly namar ka jubab kaba ïoh ka long beit yn dang eksamin ïa kane ka kam, ka long hi thik kum ka jingbud dien kam don ruh kata ka jingpher namar ngi baroh ngi ïai ïakhun haduh ban da lah ban pynurlong ïa ka jingthrang jong ki paid nongshong shnong ka jylla. Kumta ba ki AITC kin ong ba ka dei ka sngi sah jingkynmaw bad jingjop kam dei da lei lei ruh ki shu mut ban pynheh bad ïalam bakla ïa ki paidbah, kaba dei ban kynmaw ka dei ka resolution ba la wanrah hapoh ka Assembly keiñ”.
Khatduh u la ong ka sorkar kan ïai bud dien ïa kane ka kam na ka sorkar pdeng tad haduh ban pynrung ïa ka Khasi bad Garo ha ka Khyrnit kaba Phra.