Ka KSP ka dei ban pule bniah ïa ka aiñ bat khyndew ha Meghalaya shwa ban dawa ïa ka sorkar ban plie Mawjymbuiñ : Dy CM

Shillong, Nohprah 16 : U Symbud Myntri Rangbah ka jylla (Deputy Chief Minister) u bah Prestone Tynsong u la bthah ïa ka seng shit niam ki Hindu ka Kutumba Surakshya Parishad (KSP) ban pule bniah shwa ïa ka aiñ bat khyndew ha jylla Meghalaya shwa ban hukum ïa ka sorkar ban plie ïa ka krem Mawjymbuiñ.
Haba kren sha ki lad pathai khubor mynta ka Lah Sngi U Blei, u bah Prestone u la ong “ To ngin ïa phai dien sha ka histori jongka krem Mawjymbuiñ, katei ka jaka kam dei satia jongka sorkar jylla ki dei ban tip bniah bad sngewthuh tang kawei khamtam ma ki kiba na bar ka jylla ki donkam ban tip bniah ba ka rukom bat jaka puta ne khyndew ka shyiap ha ka jylla kam dei satia da ka sorkar hynrei da ki riew shimet, ki bor hima, ki raid bad ki bor shnong”.
“ Kumta kito ki briew ki bym sngewthuh ïa kane nga da kyrpad ïa ki ba kin pule bniah shwa ïa ka aiñ bat khyndew ha ka jylla khnang ba phin tip bniah namar wat ka sorkar ruh lada ka kwah ban shim ïa katei ka jaka kam lah satia lait noh tang lada ki trai jaka puta ki ai da ka mon sngewbha lane ki bor shnong, ki bor raid, ki dorbar hima u syiem, ka hima ki ai da ka mon sngewbha tang kata kaba ka sorkar ka lah ban shim. Kumta nga kyntu ïa katei ka seng lada ki dei napoh ka jylla ne na shabar ka jylla ruh to ngin ïa sngewthuh shai kdar ïa ka aiñ bat khyndew kaba ngi don ha kane ka jylla namar ym don uba halor ïa kane ka aiñ ba ngi don. Ym don uwei ruh uba halor ïa ki rukom pynïaid naduh hyndai hynthai kumta ngi dei ban sngewthuh kdar ïa kata.
Ka KSP ka la ai bor ïaka sorkar hapoh shiphew sngi ban plie biang ïa ka krem Mawjymbuiñ ban ïoh leh niam ki paid Hindu. Katei ka seng ka la maham ruh ban khang ïa ki surok kiba kongsan ba rung sha Meghalaya ba kynthup ïa ka Jorabat kaba hajan Guwahati bad ka Paikan kaba hajan Goalpara lada kane ka jingdawa jong ki kam urlong shwa ka Khristmas.
Kane ka kynrum kynram halor kane ka krem Mawjymbuiñ kaba hajan Mawsynram ka la neh kumba katto katne bnai. ïa kane ka krem la kheiñ kyntang bha da ki paid Hindu namar u don u mawjymbuiñ uba ki ngeit ba u dei u dei u blei Shivaling jongki. Hynrei naduh ka 6 tarik Nailar ka Dorbar Shnong Mawsynram ka la khang ïa ki jinglehniam ha kane ka krem namar kiba bun ki daw.
ïa kane ka kam la rah ruh hakhmat ka ïing bishar High Court jongka jylla kaba la bthah ïaka sorkar jylla ban ïakren pynbeit bad baroh kiba ïadon bynta lang ha kane ka kam. Hynrei na ka liang u President ka KSP u Satya Ranjan Borah u la kynnoh ba ka sorkar ka khlem leh ei ei satia.