Ha kane ka juk ba ka teknoloji ka la kiew stet bha, ki mobile phone ki la rung sha man la ka ïing bad ki la kylla long ka bynta kaba kongsan ha ka jingim jong ngi. Wat ki khynnah ruh mynta ki la nang pyndonkam bun bha ïa kine ki kor. Hynrei, katba ka teknoloji ka ai shibun ki jingmyntoi, katta ruh ka wanrah lang ïa ki jingeh kiba lah ban ktah ïa ka koit ka khiah bad ka jingroi jong ki khynnah lada ym nang ban pyndonkam hok kumba dei ka rukom.
Kawei na ki jingeh kaba kham paw ka dei ka jingduna ka jingïalehkai bad ka jingkilan met. Haba ki khynnah ki pynlut bun por ha ka peit mobile, ki duna noh ka por ban mih shabar ban ïalehkai bad ban ïakynduh ïa ki paralok. Kane ka lah ban wanrah ïa ka jingkhia palat, ka jingbym koit bha ka met bad ka jingduna ka bor met.
Nalor kata, ka jingpeit screen slem ka ktah ruh ïa ki khmat bad ka jingthiah. Bun ki khynnah ki ju peit mobile haduh por miet, kaba pynthut ïa ka jingthiah kaba biang. Haba ym biang ka jingthiah, ka jingpule, ka jingpyrkhat bad ka jingroi jong ka met ruh ki lah ban shah ktah.
Ha ka liang ka jingmut jingpyrkhat, ka jingkyrni palat ha ki mobile phone ka lah ban wanrah ïa ka jingbym lah ban pynleit jingmut. Ki social media bad ki jingïalehkai online ki lah ban pynlong ïa ki khynnah ban nang kyrni ha ka pyrthei digital bad ban klet noh ïa ka jingïadei bad ka imlang sahlang kaba shisha.
Watla katta, ym lah ban len ba ki mobile phone ki lah ruh ban long ki jingïarap kiba bha lada pyndonkam da ka jingstad. Ki don ki apps kiba lah ban iarap ha ki jingpule, ki video ba ai jinghikai bad ki lad jingïoh jingtip lyngba ka internet ki lah ban kyntiew ïa ka jingnang jingstad bad ka jingshemphang jong ki khynnah.
Kumta, ka kamram ka hap ha ki kmie ki kpa, ki nonghikai bad ka imlang sahlang ban peitngor ïa ka rukom pyndonkam mobile jong ki khynnah. Ka long kaba donkam ban buh pud ïa ka por peit screen, ban pynshlur ïa ki jingïalehkai shabar bad ban hikai ïa ki khynnah halor ka jingpyndonkam hok ïa ka teknoloji.
Ha kaba kut, ki mobile phone kim dei ki jingma hi, hynrei ka jingpyndonkam bakla ïa ki ka lah ban wanrah ïa shibun ki jingeh. Lada ngi lah ban pynïaid beit ïa ka jingpyndonkam teknologi, ngin lah ban pynthikna ba ki khynnah kin ïoh ïa ki jingmyntoi jong ka juk stad katba dang lah ruh ban sumar ïa ka koit ka khiah, ka jinglong briew bad ka lawei jong ki.
Kam long kaba suk ban khang syndon ia ki khynnah na ka jingpyndonkam mobile namar ka teknoloji ka la long bynta jong ka jingim ba man ka sngi. Hynrei, ki kmie ki kpa bad ki nongsumar ki lah ban shim ki sienjam ban pynbeit ia ka jingpyndonkam jong ki.
Buh por ba biang na ka bynta ka mobile – Buh kyndon ba shai halor katno por ki khynnah ki lah ban pyndonkam mobile ha kano kano sngi. Haba kut ka por, dei ban pynsangeh bad leit sha kiwei pat ki kam kiba don jingmyntoi.
Pynshlur ia ki jingialehkai shabar -Ai lad ia ki khynnah ban ialehkai football, badminton, cycling lane kiwei kiwei ki jingialehkai. Haba ki don bynta ha ki kam ialehkai kilan met shabar, ka jingkwah ban ialehkai mobile ka duna hi.
Pynlut por bad ka iing ka sem – Ka jingiatrei lang, ka jingakren ia khana ha iing ha sem, ka jingpule kot bad ka jingialehkai bad ki bahaing ka iarap ban pynkhlain ia ka jingiadei bad ban pynduna ia ka por mobile.
Khang ia ka mobile ha por bam bad por thiah – Ka por bam bad ka por thiah ki dei ban long kiba lait na ki screen. Kane ka iarap ban kyntiew ia ka koit ka khiah bad ka jingiadei hapdeng ki dkhot ka iing. Long nuksa ba bha – Ki khynnah ki bud ia kaba ki iohi. Lada ki kmie ki kpa ki pyndonkam mobile palat, kan eh ia ki ban hikai ia ki khynnah. Kumta, donkam ha iing khamtam ia kiba la heh ba ki dei ban pyndonkam da ka jingkitkhlieh.
Pyni ia ki jingma jong ka jingkyrni mobile – Hikai ia ki khynnah ha ka rukom kaba suk ban sngewthuh shaphang ka jingktah jong ka mobile ha ki khmat, ka jingthiah, ka jingpule bad ka koit ka khiah ka jingmut. Pynlong ki kam kiba kham pynbyrngia – Pynshlur ia ki ban pule kot, dro dur, rwai, put tynrai, sumar syntiew lane shim bynta ha ki kam kiban pynmyllen ia ki bad haba don kiwei ki kam kiba sngewtynnad, kin ym kyrni eh ha ka mobile.
Kaba Kongsan Tam -Ym dei ban shu knieh noh ia ka mobile na ki khynnah. Ka lynti kaba bha ka dei ban hikai ia ki ban pyndonkam da ka jingkitkhlieh bad ban pynneh ia ka jingiatylli hapdeng ka teknoloji bad ka jingim ba man ka sngi. Da ka jingialam lynti kaba dei na ki kmie ki kpa bad ki nonghikai, ki khynnah kin lah ban pyndonkam mobile ha ka rukom kaba ai jingmyntoi bad ym kaba pynjulor ia ka koit ka khiah jong ki.
