K a jingpyntreikam jong ka Sorkar ïa ka hukum jong ka iingbishar Meghalaya High Court ka la pynkylluid ïa ka Khyndai Lad kaba ju thnem bha da ki nongdie bad ki nongthied nongpet ka la urlong bad da shisha ka Khyndai Lad ka la kylluid war.
Ym lah ban leh ba ka jingjyllei ki kali ha sor Shillong ka la long kaba jubor haduh katta katta nalor ba ka sor ka long kaba rit bad kaba khapngiah ki surok bad ki lynti ki synkieng. Lada ki nongdie madan harud surok kim sngewthuh lem ïa ka hok jong ki nongleit nongwan bad ki nongïaid lynti kan buh jingeh lut ïa baroh.
Ka Sorkar mynta kan hap ban phaikhmat sa ka thaiñ Motphran, Laitumkhrah, ha khmat Civil Hospital bad kiwei kiwei ki jaka khamtam eh ha Motphran namar ka jingkyntur jong ki nongdie madan hapdeng surok ka long kaba ima haduh katta katta. Ka jingbym salia jong ki nongdie jingdie ban shong die jingdie hapdeng surok ha Motphran ka la pynsyrtok wat ïa ki nongñiah kali.
Ka jingdon jong ki nongdie madan ha shilynter ka surok GS Road ter ter naduh Motphran shaduh Lad Umsohsun kim duna da ki phew ne jan kot spah ngut. Ka jingkhapngiah ka leit ka wan ka la pyrsyrtok wat ïa ki paidbah nongïaid lynti.
Katba nangmih ki sngi, ki lynti ïaid kjat khamtam na Motphran, GS Road bad Khyndailad ki la nang khap ngiah na ka jingbun jong ki nongshong die madan. Hooid ka dei kaba ym lah ban lait la ka long ha kano kano ka shnong, ka sor ne kano kano ka ri ruh.
Hato ïano yn kynnoh namarba kam dei eh ka jingisynei ïa kiba duk kiba rai toi hynrei kawei na ka daw hi ka dei ka jingkangar pisa jong ki bor kiba dei peit ïa ka jingïaid beit ïaid ryntih. Hooid baroh ngi sngewsynei ïa kiba duk ba rai toi ba kin ïoh ban kamai jakpoh, hynrei ym lah pat ban ïapeiñ ïa ka jingkylluid bad ka jingïaid beit ïaid ryntih jong ka rukom synshar khadar.
Katba nangmih ki sngi bad lah ban ong ba mynta lei lei ka la dei pynban kawei na ki jaka kaba lymmuh tam ha kine ki sngi ha ka liang ki ïew ki hat.
Ha kine ki sngi ka la long kaba thait bha ban rung shapoh jong ka ïewduh namar ba la pynwit palat ïa ki lynti ïaid baroh da ki nongdie madan bad ka ïew ka la shu khap ngiah bad kam long shuh ka ïew kaba khuid kaba suba.
Nalor jong ka jingpynwit jong ki nongdie madan ha ki lynti ïew wat kito kiba don la ka jong ka basa ruh ki ïaleh katba lah ban phriang ïa ki mar jong ki palat ïa u pud u sam jong ka dukan ne ka basa jong ki. Kane ka la nang pynkhap ngiah shuh shuh ïa ka ïew kaba la bna nam jong ka ri Khasi.
Ki paidbah ki ju ud bha ban kiew sha Motphran bad Police Bazar ha ka sngi saitjaiñ namarba jur palat ka jingkhapngiah na ka jingïaphngian shaba palat ka jingbunbriew kiba wan siew ban tda. Naduh surok, ka jingdheng kali kaba jur, nalor ka jingkhapngiah hapoh ïew ka long shaba palat nalor ïa ki lynti ïaid kjat la shong die madan da ki paidbah. Watla ki bor ba dei peit jong ka Hima Mylliem bad ka Shillong Municipal Board ki ïakynduh mawsiang ban pynkylluid ïa ki ar tylli ki ïew namar ka jingbym kohnguh jong ki paidbah kiba ju shim kabu ban die jingdie harud surok bad harud lynti ïaid kjat kaba pyndik haduh katta katta ïa ki nongleit nongwan.
Baroh ki lynti ïaid jong ka Khyndai Lai bad ka ïewduh kiba la kham heh kim lait shuh na kane ka jingtur jong ki nongdie madan bad ruh ki nongdie dukan ba phriang ïa ki mar jong ki shabar la ka basa.
Ym tang ka ïewduh hynrei wat ki rud surok jong ka surok naduh Motphran shaduh Khyndailad ki la kylla long ki jaka die madan. Ha kine ki sngi ka Motphran ka la long kawei na ki madan ïew luri lura bad ym don aiñ shuh ka ban teh lakam ïa ka jingïaid beit ïaid ryntih. Baroh ki la ïatur beit ban die ïa la ki jong ki mar kiba pher bapher hapdeng surok Motphran. Ki rud jong ka surok naduh rum Motphran ter ter sha Bimola, shaduh them bijoi ki dap da ki poi ei kiba la pynwit ïa ka surok bad pynthut ïa ka leit ka wan jong ki paidbah bad bunsien ki paidbah ki hap ban ïaid lang bad ki kali ha surok namar ba ki surok bad lynti ïaid kjat la klun lut da ki nongdie madan bar jylla.
Kawei kaba kham i shyrkhei ka long na ka jingdon kiwei pat ki nongshim kabu bad katba nang bun ki briew kiba lyngkar ka imlang sahlang ka kylla long lyngkar bad shibun ki kam sniew ki lah ban jia.
