Nongstoiñ, Jymmang 26: Ka seng West Khasi Students Union ka la ther ïa ka sorkar MDA ba la ïalam da u Conrad Sangma, da kaba ong ba kane ka sorkar ka la thok la shukor ïa ki paidbah ka Jylla ha ka jingïadei bad ka kam pynbeit ïa u pud u sam.
Haba ïakren bad u nongthoh khubor, u Bah D.Sun President ka seng, u la ong ba kane ka sorkar kam shym la leh katkum ka jingïakut, katkum ka jingïakren bad ki seng bhalang, ki nongsynshar shnong nongsynshar hima.
Ula ong ba kane ka jingleh jong ka sorkar ka la ïalam bakla ïa ka jingsngew jong ki seng bhalang, ki nongsynshar shnong bad ki paidbah. Ha ka por ba shong jingïalang jong ka komiti pynbeit pud ba la khlieh da u Bah Renikton Lyngdoh Tongkhar, ka jingïakren ka long da kumwei. Hynrei, kumba long mynta ka jingleit ïa soi MOU hapdeng u Conrad lem bad u myntri rangbah ka Assam hakhmat u Amit Shah kam don jingïadei ei ei satia bad ka jingïakren lane jingai jingmut ryngkat ki nongïalam bapher bapher.
Kam don hi ruh kata ka jingïakrem MOU 2011 bad baroh ki jingïakren ki long beit kiba thymmai katkum ka riti synshar bad jingkwah ki paidbah. Hynrei sngewkhia bad sngew lyngngoh ba ha ka MOU kam shym rung wat tang kawei ruh ka jingai jingmut halor kata ka give and take policy kumba la ïakren.
Na ka liang ka seng ka ai jingkyrshan halor ka jingïakhih jong ki paidbah Malangkona kiba la ïakhih na ka bynta ka hok. Ha ka jingshisha kam dei ka jaka ba ïa kajia pud kumba long ha Langpih bad kiwei kiwei. Hynrei la shu khynñiat jubor ïa ka thaiñ Malangkona West Khasi Hills sha ka Assam.
Ka sorkar ka dei ban phai dien biang bad ka dei ban ïaid katkum ka lynti kaba shai ha ka jingïadei bad kane ka mat. Ka dei ban pynkylla biang ïa ka jingïasoi MOU khnang ba kan ym pynkylla langkñia ïa ki paidbah kiba shong ba sah ha khappud bad ka Assam, u la ong.
