Ka jur bha ka jingsngew khohñioh ïa ka jingleit pynïasoh ki MLA ka HSPDP sha ka sorkar : Martle Mukhim

Shillong, Ïaïong 04: U President jong ka Hill State People’s Democratic Party (HSPDP) East Khasi Hills District u Bah Martle Mukhim ha ka sngi Ba-ar u la ong ba kiba bun ki paidbah ka jylla ki sngew khohñioh ïa ka jingleit pynïasoh ki arngut ki MLA ba dang shu jop thymmai ka HSPDP sha ka sorkar NPP.
Haba kren sha ki lad pathai khubor u Bah Martle u la ong ba kane ka jingleit pynïasnoh sha ka sorkar ka la wanrah ïa ka jingsngew khohñioh ha kiba bun ki paidbah nongkyrshan ka party bad ka jingsngew dei ruh ha kiba bun da ka jingleit kyrshan ki MLA jong ka party sha ka sorkar MDA 2.0.
“Ka don ka jingsngew kaba ïakhleh ha ki nongkyrshan ka party bad ha ki paidbah ha kylleng ka ri ha kaba ïadei bad ka rai jong ki arngut ban leit sha ka sorkar bad kam long shai ruh ha kiba bun ïa ka rai jong ki bad na ka liang jong nga ruh ngam pat shai bha ïa kane namar ngim pat shong jingïalang jong ka CEC ban ïakren ha kiba bun ki mat ka party kynthup ïa kane ruh,” ong u Bah Martle.
Haba kylli la u sngew ïahap ne em ïa ka rai kine ki arngut ki MLA, “Ngan nga ong nga sngewdei ne ngam sngewdei namar ïalade ngam ïoh ïashong lang ha ka jingïalang bad namar ïa kane ka kam la aiti beit ha u President ban rai hynrei nga ïohi ba kane ka ïa ka sorkar khleh khawlang ha ka jylla ka la shuhthied la kham bun bun snem,” u la ong.
“Namar ka sorkar ka dei kaba khleh khawlang ka shong beit ha ki jingstad ki party ban pynkhreh ïa kano ka mat kaba kin buh thong lang kum ka sorkar ha kine ki san snem da kaba wanrah ïa ka Common Minimum Program ,” u la bynrap.
Haba kylli katkum ka jingïohi jong u ïa ka lawei jong ka HSPDP u Bah Martle u la ong, “Ka party ka la nang hiar shibun lada nujor bad ki snem kiba la leit hynrei ban ong la kan jah ne kan nang kiew nangkhlaiñ kan shong beit ha ka jingtreikam kiba man ka sngi ka jong ngi kum ka party,” u la jubab.