Ka jingthung jong ka sorkar ïa ka Judicial Enquiry Commission ban tohkit halor ka jingbthei Dynamite ha par tih dewiong beaiñ ha Mynsngat-Thangsko, East Jaintia Hills, ha ka 5 tarik mynta u bnai kaba la wanrah ka jingiap ïa 27 ngut ki mynsiem briew ka long kaba dei ban ïaroh namar lyngba kane ka jingtohkit yn sa shai kdar halor kine ki kam tih dewiong beaiñ.
Hooid ka kam tih dewiong kam dei ka kam kaba dang thymmai ha ka jylla khamtam ha Jaintia Hills, namar da ki spah snem ki briew ki la im bad kamai jakpoh na u dewiong. Hynrei kynsan kynsan naduh ba ka National Green Tribunal (NGT) ka la pynmih ïa ka hukum ban khang noh ïa ka jingtih dewiong beaiñ, kumta la hap ban khang. Ym lah ban len ka long kaba eh ban khang sbak ïa kane ka kam namar da ki hajar tylli ki long ïing ki im ja naduh ki por ki longshwa man shwa jongki haduh kane ka pateng mynta da kane ka kam tih dewiong.
Ban shu kren lane ban shu hukum ka long kaba suk hynrei ka long kaba eh pat wat ïa ki bor ka aiñ ruh ban khang ïa kane ka jingtih dewiong beaiñ. Namar ka long kaba eh wat ïa ki bor pulit ruh ban leit khang mar mar namar ka buh ïa ka jingim jongki ruh ha ka jingma kaba khraw ban leit sha kitei ki jaka . Namar da ki spah bad hajar ngut ki nongtih dewiong kumta donkam ban don da ki spah ngut ki pulit ryngkat ki tiar ïaleh ba tbit ba kin hiar sha ki par tih dewiong beaiñ ban khang ïa ka jingtih dewiong beaiñ.
Mynta ba la jia ka jingjia bad ba la paw pyrthei ba ka don shisha kata ka jingtih dewiong beaiñ, kumta da ka jingthung jongka sorkar da kane ka Judicial Enquiry Commission kan bud dien bin pa bin ïa kane ka kam beaiñ tad haduh ba kan da lah ban sei pyrthei lut ïa ki jingshisha. Ka jingjia jongka jingiap ka dei ka jingleh khlem akor hi namar ha ki por mynshwa ym pat ju pyndonkam da ki dynamite ban tih dewiong namar wei ba la bthei u dynamite ka khyndew ka la shong synjor bad ka buh ka jingma kaba khraw ïa kiba tih dewiong namar tang bakla la twa ka khyndew shapoh krem.
Hynrei mynta pat tang ban ïoh tih kham bun ha i por ba lyngkot la pynbthei beit da ki dynamite bad ïa kane la lap ba kam jia tang ha katei ka jaka ba bthei bad iap briew hynrei ka jia ha kylleng ki jaka ba tih dewiong beaiñ. Ka Commission hadien ba ka lap lyngba ka jingtohkit kan sa ai jingmut ïa ki bor ka ain kaei ban leh ban ïada na kine ki kam beaiñ. Nalor kata ka Commission khlem pep ruh kan tohkit bniah ban lap kiei ki trai ba pyntih dewiong ha kitei ki thaiñ.
Nalor kata khlem pep lyngba kane ka commission yn sa paw pyrthei keiñ lehse wat kita ki high level kiba ïadon kti ha kane ka kam kumba la ïa kynnoh da baroh baroh ha kine ki por ba la dep. Ym tang katta lehse ka commission kan tohkit bniah ruh ban lap la ki bor synshar ruh ki ïadonkti ne em bad kane ka kam namar kumba la kdew da u Nongbishar ba kane ka jaka ba jia ka jingbthei ka jngai tang kumba 10 km na Khliehriat hynrei kaba lyngngoh pat ka long balei ki bor ka aiñ kim lap ïa kata ka jingtih dewiong beaiñ. Kane ruh ka pynlyngngoh shi katdei eh tip ïoh lehse ka dei ka jingïasngewthuh jingmut ne ka jingïaïoh jingmyntoi lang ba ym lap ïa kat katei ka jingtih dewiong. Nalor kata la pynpaw ruh ba ka jingtih ka long ruh bun jaka bad ha baroh arliang ka surok haba leit sha katei ka jaka ba bthei.
Kumta to ngin ïai ap shipor yn sa paw pyrthei lut ki jingshisha lyngba ka jingtohkit jongka Judicial Enquiry Commission halor kine ki kam beaiñ.
