Ka jingwan mushlia ki heh khlieh sain pyrthei nabar jylla kan buh ia ka jylla ha ka jingma : Dr Ampareen

Shillong, Kyllalyngkot 27 : Ka jylla Meghalaya ym tang ba ka dei ka jylla kaba itynnad hynrei ki paid nongshong shnong jongka ki dei kiba ieit ïa ka shongsuk shongsaiñ bad ki bym da kwah ban ïaktait ha ki kamkai, kam ïalam bakla bad kam jaboh jabaiñ, hynrei da kane ka jingwan phrung khlieh ba kyndit kyndit kita ki heh khlieh saiñ pyrthei la sdang ban i jaboh ka kam politik namar la jur sa tang ki jingthad pynjah burom ïa ki nongïalam jong ka party ba ïalam ïaka jingsynshar ka NPP da kita ki kynhun jongka Liang Pyrshah lyngba ki social media.Ka Facebook ka la kylla long kum ka rynsan ban thad ne sdieh ïa ki jongïalam ka NPP, ong I Dr Ampareen Lyngdoh iba dei i MLA barim ka East Shillong Constituency bad kyrtong ka NPP mynta ka kynti jong ka election MLA 2023 na katei ka juh ka Consstituency.
I Dr Ampareen i la ong “ Ka jylla Meghayala ym tang ba ka long kaba itynnad hynrei ki paid nongshong shnong jongka ki dei kiba ieit ïa ka shongsuk shongsaiñ bad ki bym sngewtynnad ban ïaktait ha ki kam kai ne ha ki kam ïalam bakla bym don nongrim da ki nongïalam Liang Pyrshah. Ha Meghalaya ym pat ju don kita ki jingïashoh ïadat ïa umsnam na ka bynta ka saiñ pyrthei, ym pat ju ïohi ruh ba ki kynroh bad ki surok kin satah da ki dur ne jingdro ba har rukom kumba la leh mynta ka kynti naduh ba la wan phrung khlieh ka AITC ha ka jylla bad leh ruh da ka kynhun ba trei bad ïalap election na ka bynta jongka ka IPAC. Dang ha kine ki khyndiat sngi i paralok i la phah ïa kawei ka jingthoh bad dur jong u Myntri Rangbah bad i kurim jongu kaba la shu leh bad thad khlem akor da kine ki kynhun ha ki social media. Kine ki jingleh ki long shabar jong u pud u sam ka saiñ pyrthei bad kane kan ktah ïa ka rukom im bad jinglong jong ngi ki paid Khasi bad Pnar. Kam long kaba phylla dang shen uwei na ki nongïalam ka AITC u la pynlong kamkai bad kam biria ïa ka jingphong u Myntri Rangbahduh u Narendra Modi ïa ka jingriam Khasi tynrai bad buh ha ki social media. Kane ka pynpaw ba kine ki briew kim nang shuh ban burom ïano ïano ruh. Nga kyrmen ba ki nongïalam ka TMC na kane ka jylla ki la dei ban kren bad ong ei ei ïa kine ki kynhun jongki ba hangne ha jylla ngi dang don ka jingïaburom mar kylliang ym kumba long sha kiwei kiwei ki jylla ne sha West Bengal”.
Kane ka jia kynsan kynsan dang tang shisnem ei ei mynta ba ki paidbah ki la mad kumne naduh sor haduh nongkyndong ruh. Ban pynthame ïa ki paidbah ki wanrah da ki briew na Assam ban pyndap ïa ki shuki jongki, kane ka jingleh jong ka AITC ka la pynsniew dur ïa ka jylla Meghalaya haduh katta katta, bad buh ruh ia ka jylla baroh kawei ha ka jingma kaba khraw, ong biang I Dr Ampareen.
I la ong, kumba long mynta imat ïa ka jingïalap election jongka AITC la pynïaid beit nadong shadong da ka IPAC. Namar dang kumba hynriew bnai u President ka AITC ha kane ka jylla u bah Charles Pyngrope u la pynpaw ka jingsngewdiaw halor ka jingthmu ïarap ka IPAC ïa ka Congress namar u la ong ba ka IPAC Kam lah ban leh kumne namar ka TMC ka la shaniah tylli beit ha ka IPAC. Tangba kane ka jingshaniah jongka TMC ha ka IPAC kan sa kyrtoh kylla ïa katei hi ka party na kine ki rukom leh jongki. Kine ki briew kim pat shemphang ïaka jinglong ki briew ha kane ka jylla Meghalaya bad kim tip ba kine ki jingleh jongki bad jingktah jong ki sa ïa ka kolshor kan ktah jur ia ka AITC.
Namar ki rukom ïalap election ha kane ka jylla barobor ki long kiba jai jai namar ki kyrtong ki wan ban pynshai ïa ki nongrim jongki sha ki paidbah ,hynrei mynta ka kynti pat ka la long jah burom bha ïa ka nam jongka jylla. Baroh shi katta ba ka MCC kam pat treikam bad ba ki bor synshar district kim pat kwah ban pynpaw ïa ka bor la i ngiah ban peit kat shaba leit la dap da ki dur ki dar bad ki lama jongka TMC kaba la wanrah ka jingpynsniew dur ïa ka mariang ba itynnad jongka jylla. Kum ka nuksa dei namar kane ka kynhun ba dang shen ki 26 ngut ki dkhot jongka TMC ha Pynursla ki la phet bad pynïasoh noh sha ka NPP lyngba ka seng ki samla ka NPYF namar kim sngew hun ka jingtreikam.
Lah ban pynkynmaw ba u bah Wanshwa Nongrum u President ka TMC ( Youth Wing) ha Pynursla uba la ïehnoh ïa ka kam u la ong ba ki la don ha ka TMC naduh u Nohprah 2021 hynrei kat dang ïaid ki por ki la ïohi ba ka rukom treikam kam biang satia bad suki haduh katta katta nalor ba kim ïoh ban trei laitluid namar ba don kiwei kiba bat shabi, kumta kim sngew ïahap ïa kane bad ki la rai ban mih noh bad pynïasoh noh sha ka NPP.