Ka jingthaw ïa kawei pa kawei ka jylla ka pyni ïa ka lynnong kaba kongsan ha ka jingïaid lynti ka ri: Lat

Shillong, Naiwieng 03: Ka Meghalaya Lok Bhavan ha ka sngi baar ka la pynlong ïa ka prokram kolshor kaba heh bha ban kynmaw burom ïa ka sngi seng bad jinglong jylla jong ka Jammu bad Kashmir, Ladakh, Andhra Pradesh, Andaman and Nicobar Islands, Chhattisgarh, Chandigarh, Delhi, Haryana, Karnataka, Kerala, Lakshadweep, Madhya Pradesh, Pudicherry, Punjap, Tamilnadu. ka jingïatylli ha ka jingpher bad ka kolshor kaba riewspah.
Haba ai jingkren ha kane ka jingïalang, u Lat ka jylla u Shri C. H. Vijayashankar u la ong ba ka jingthaw ïa kawei pa kawei ka jylla bad Union Territory ka pyni ïa ka lynnong kaba kongsan ha ka jingïaid lynti jong ka ri India kum ka jaitbynriew, kaba pynpaw ïa ka jingangnud jong ki briew jong ka, ka jingpyrshang jong ki pateng bad ka jingkitkhlieh ban tei ïa ka imlang sahlang kaba khlaiñ bad kaba kiew shaphrang.
U la ban jur ba ka roi ka par ka dei ban poi sha man la ki bynta jong ka imlang sahlang, da kaba pynleit jingmut ha ka jingpule kaba bha, ka jingsumar pang kaba lah ban ïoh, ki lad kamai, ki jingtei bad ka jingbha jingmiat jong ki nongkyndong.
“Ka jingkiew shaphrang kan long kaba don jingmut haba uwei pa uwei u nongshong shnong u ïoh ïa ka lad ban ïashim bynta ha ka,” ong u Lat haba pynpaw ïa ka bynta ba kongsan jong ki samla ha ka ban saiñdur ïa ka lawei jong ka ri India ha kylleng ki bynta kum ka science, technology, ka rep ka riang, ka kam seng kam seng jam, ka kam ïalehkai bad ka kam shakri paidbah.
U la ong ba ka jingkiew jong kawei pa kawei ka thaiñ ka noh synniang sha ka roi ka par jong ka ri baroh kawei bad u la khot ïa ka jingïatreilang, ka jingkitkhlieh lang bad ka jingkitkhlieh jong ka ri ban pynurlong ïa ka jingthmu jong ka ri India kaba kiew. U la ai ruh ka jingkitbok kitrwiang ïa ki paidbah jong ki jylla bad ki Union Territory kiba shah kynmaw burom ha kane ka sngi.
Ha kane ka prokram la pyni ïa ka khubor video na u Lat ka jylla Tamil Nadu. Ha ka khubor jong u, u la ong ba ka Tamil Nadu ka rakhe ïa ka jingdap 70 snem naduh ba la seng ïa ka hadien ka jingpynbeit thymmai ïa ki jylla bad u la pynpaw ïa ka jingnoh synniang kaba khraw jong ka jylla sha ka roi ka san jong ka ri.
U la ong ba ka Tamil Nadu ka la paw kum kawei na ki jylla ba la kiew shaphrang jong ka ri, ha kaba ka kolshor, ka ktien ka thylliej bad ka pateng jong ka ki pynpaw ïa ka jingkiew jong ka. U la ai khublei ruh ïa ki jingnoh synniang jong ki sorkar kiba bud hadien habud, khlem da kheiñ ïa ki seng saiñ pyrthei, sha ka roi ka san jong ka jylla.
U Lat ka Tamil Nadu u la pynpaw ba ka jylla ka noh synniang kumba 9.4 percent sha ka Gross Domestic Product (GDP) jong ka ri India bad ka dei ka jylla kaba ar ha ka jingnoh synniang kaba heh tam ha ka GST ha u snem ba la dep. U la kdew ruh ïa ka jingheh jong ka Tamil Nadu kumba 1.30 lak square kilometer bad ka jingbun briew kaba palat 7.5 klur, ha kaba ki samla ki don kumba 25 percent.
Ha ka jingkren ai khublei, u H. C. Chaudhary u la pdiang burom ïa ki ophisar ba rangbah na ka Indian Air Force, CRPF bad kiwei kiwei ki shipai paramilitary, ki ophisar bad ki nongtrei jong ka Sorkar Meghalaya, ki jaka treikam jong ka Sorkar Pdeng, ki NCC cadet, ki Scouts and Guides, bad ki nongmihkhmat jong ki lad pathai khubor.
U la ong ba ki jingrakhe sngi seng nongrim bad sngi ïoh jylla ba la pynlong ha ki Lok Bhavan ha kylleng ka ri ka thmu ban pynïajan ïa ki briew na ki thaiñ bapher bapher bad ban kyntiew ïa ka jingthmu jong ka Ek Bharat Shreshtha Bharat.
Ha kane ka prokram la pyni ïa ki jingpyni ïa ka kolshor da ki nongrwai na Karnataka, Andhra Pradesh, Chhattisgarh, Haryana, Jammu and Kashmir, Madhya Pradesh, Punjab bad Tamil Nadu, ha kaba la pyni ïa ki riti dustur bapher bapher bad ki riti dustur jong ki jylla ba ïashim bynta. Hadien kata u Lat u la ai khublei ïa ki nongrwai kiba la ïashim bynta.