Ka jingsniew palat ka surok NH-6 ka buh jingma ïa ki paidbah ba leit ba wan bad ka pynsniew dur ïa ka East Jaiñtia Hills

Khliehriat, Nailur 08 : Ym lah ban sngewthuh, na ka ei ka daw ba ka National Highway Authority of India bad ka sorkar ki la shu leh kuman haduh katne ha kaba ïadei bad ka jingsniew jingjulor ka surok national highway 6 ha East Jaiñtia Hills District, kane ka la pynsah umdum ruh ïa baroh ki paidbah jong ks district bad ïa baroh kiba ju iaid lyngba na kane ka surok NH.
Ki nongleit nong wan bunsien ki ju kynduh jingeh namar ka jingdheng kali ka ju jia khah khah na ka daw ka jingsniew palat ka surok.
Wat ha sorbah Khliehriat ruh, kaba dei ka District Headquarter jong ka East Jaiñtia Hills District la iohi ba ka jingjulor ka surok ka la long shaba palat, kaba la bun sa tang ki thliew hapdeng surok, ha ka por ba hap slap ki thliew ki dap da ka um ktieh bad haba rang ba shit ka surok ka dap da ka khyndew pum pum, kane ka jinglong jingman ka surok ha Khliehriat buh jingeh bad buh jingma ia ki kali kiba iaid lyngba bad buh jingma ruh ïa ka koit ka khiah jong ki paidbah kiba hap ban shah ïa u pum pum khyndew, ym tang katta, kane ka la pynsniew dur haduh katta katta ka sor bah Khliehriat bad dei na ka daw ka jingsniew palat ka surok ka jingdheng kali ruh ka jia khah khah ha Khliehriat.
Kumba baroh ki tip ba kane ka dei ka surok national highway kaba pyniasoh bad kiba bun tylli ki jylla jong ka thaiñ shtei lam mih ngi, ha kaba da ki spah, ki hajar ki kali ki ju iaid man la ka sngi, kumta la lap ba na ka daw ka jingsniew ka surok bun ki kali kynthup ki kali heh bad ki kali rit ki sniew bad sahkut ha shi lynter lynti.
Dang myn ha ki khyndiat taiew ba la leit, na ka liang ka KSU Narpuh Circle lem bad ki Waheh Shnong na Narpuh ryngkat bad ki paidbah ki la mih madanban iakhih pyrshah namar ka jingsniew palat ka surok bad ki la khang tala noh ruh ïa ka Toll gate kaba don ha Lumshnong bad ki la ong ruh ba yn dei ban plie ïa katei ka jaka lum pisa jong ka NHAI ha Lumshnong tat haduh ba ka NHAI ka kan pynbha ïa ka surok haduh 70 percent ka jingmaramot, ka jingdawa ki paidbah ban shna bha ïa ka surok kam poi shano shano ruh, katba nag mih ki sngi ka surok ka nang jur ka jingjot jingjulor bad wanrah ka jingdheng kali khah khah ha kiba bun ki bynta jong ka surok kaba naduh Ladrymbai ter ter shaduh Ratacherra.