Ka jingshukor jong ka Sorkar MDA ïa ki paidbah ka la long kumba shon muhor: Saket Gokhale
Shillong, Risaw, 11: U National Spokesperson jong ka All India Trinamool Congress (AITC) u Saket Gokhale ha ka sngi Baar u la sangah tyngeh ïa u Myntri ka Sorkar Jylla u James PK Sangma da kaba ong ba ka jingshukor jong ka Sorkar MDA ban shukor ïa ki lad pathai khubor bad ïa ki paidbah ka jylla Meghalaya ka la long kumba shon muhor.
Haba kynthah ïa ka jingkam jong u Myntri ka Koit ka Khiah u James PK Sangma ba ki Myntri Sorkar ki ju ai jingtip sha ki paidbah lyngba ki lad pathai khubor, u Gokhale u la ong ba ki rukom leh jong ka Sorkar MDA ban pynjah ïa ki jingshisha ka la poi haduh u pud ka jinglehraiñ.
Ha ka shithi, ar tylli ki jingkylli kiba la buh la kyntait da ka Sorkar MDA.
Ha ka shithi ba u la phah u Gokhale u la pan jingynshai na u Conrad Sangma kumno ïa u Chinese Inhemeter Smart Meter la pyndait ha ingsah jong u watla u Symbud Myntri Rangbah u Bah Prestone Tynsong dang ha u bnai Naitung u la kam ba kine ki Smart Meters ym pat mynjur satia da ka Renewable Energy Certificates (REC) bad ka Sorkar India.
Shuh shuh, u Gokhalei u la pynkynmaw ïa ka National People’s Party (NPP) ba kam pat ai jingtip satia sha ka Election Commission of India (ECI) halor ka jingpynlut pynsep ha ka elekshon. “Naduh u snem 2018, ïa ka jingpynlut pynsep ha ka elekshon sha ka Iingdorbar Thawaiñ ha Meghalaya, ha Nagaland bad Mizoram ki dang sah pongding. Nalor kata, wat ka kaiphod ba la pynlut pynsep ha ka elekshon Lok Sabha ruh ka dang sah pongding,” la kynthah u Gokhale.
U Gokhale u la kynthah ruh ïa u James Sangma da kaba buh jingkylli, “balei ka NPP kum ka National Party ka dang buhrieh na ki paidbah bad na ka Election Commission of India ïa ki jingpynlut pynsep ha ki elekshon mynta la saw snem san bnai. Kane ka pynpaw ba ka NPP ka pyrshang ban pynkheiñ ïa ki kyndon jong ka synshar paidbah.
Haba ai jingmut ïa ka Sorkar MDA ba la ïalam da ka NPP u Gokhale u la ong, “ngi la long kiba kloi ban phah ïa ki jingkylli shaphang ki ishu bym synshar hok bad ka jingbam sap hapoh ka Sorkar MDA. Phi lah ban shu phah da ka jingthoh/ne jingpynshai halor ki mat ba ngi la buh jingkylli. Khnang ban pynsuk ïa phi, ngi kyrmen ba ka Sorkar kan ym lehraiñ ïa kane ka jingtyrwa khamtam lada kam don eiei ban buhrieh. Sa pyntip ïa ngi.”