Ka jingshna bad pynmih Phlim ha Meghalaya kam pat dei kaba la slem, hynrei kadei kaba dang shen. Ki Phlim Khasi kiba la mih nyngkong bad kiba kham paw ki long “I Mei Jong nga”, “Ka Ri ki Laiphew Syiem”. Hadien la mih sa ka Phlim “Manik Raitong” bad bud sa kiwei kiwei pat hadien.
Ka jingmih jong u Bah Pradip Kurbah lyngba ka Phlim “Mon Ba Jwat”, “Hep”, “Ri” , “Onaatah” bad kiwei kiwei, ka la pynkhih mynsiem ïa ki riew donsap jong ka jylla ban ïa beh sha ka jingshna Phlim. Ka jingpynmih Phlim ha Meghalaya ka la bthei puk hadien ka jingwan ka Technology ba thymmai, ha kaba ki nongshna Phlim, kim da donkam ban da shna ki reel ne ki celluloid, hynrei ki la lah ban pynmh Phlim ruh ha ki Social Media lyngba ki Toutube.
Kadei kane ka jinglah ban pynmih Phlim ha ki Youtube kaba la plie ïa ka jingkhang jong ki riew donsap ha ka liang ka jingshna bad pynmih Phlim. Ha shuwa jong kane, kiba pynmih Phlim ha Meghalaya, kiba bun hi ki pyndonkam da ki CD ne DVD, kaba long ka jingpynmih Phlim kaba ym da don jingeh than.
Lyngba kine ki jingstad ba thymmai, la mih ki nongshna Phlim na kylleng kylleng ka jylla ban pyni ïa ka sap ba ki don. Kiba bun ki samla mynta, ki ïa shna ïa ki Short Film, ki drama, ki Serial Film lyngba ka Youtube bad kane ka la long ka jingkyrkhu kaba khraw ïa ki, ha kaba ym tang ba ki la lah ban pyni ïa ka sap ba ki don, hynrei ka la ïarap ruh ïa ki ba kin pynmih ïa ka bai kheng haba shna phlim, wat lada kim ïoh lad than ban pyni ha ki Cinema Hall.
Ym tang ki nongshna bad ki nongpynmih Phlim kiba la ïoh lad ban pyni ïa ki sap jong ki, hynrei ki samla, ki khynnah, ki longkmie, ki longkpa kiba don ha ka sap ban ak ruh, ki la ïoh lad ban pyni ïa ka sap ba ki don lyngba kane ka jingwan ka juk stad technology.
La shisha ka jingpynmih phlim Khasi bad Jaiñtia ka la kiew sted shisha ha kine ki khyndiat snem baladep. Hynrei ka donkam shuh pat ka jingpynbha, ka jingpynjanai bad ka jingjlih bha naduh ka rukom shna, ka rukom ak bad kiwei kiwei de ki bynta.
Ha kajuh ka por, ki nongshna bad ki nongpynmih phlim bad kumjuh ruh ki nongak, ki donkam ïa ka jingkyrshan na ka liang ki bor sorkar ruh. Ka daw ka long ba ka bai khajna ha ki Cinema Hall ka long kaba rem, namar ba la shu ïapynïaryngkat dor lang bad ka khajna bad ki phlim kiba la pynmih na Bollywood bad kiwei kiwei de ki jaka.
Nangta ki Phlim Khasi ki donkam ruh ban ïoh ka jingkyrshan da kaba ïoh ïa ki Hall kiba biang wat sha ki jaka nongkyndong ruh, namar ba kiba bun hi kiba ïabeh ïa ki Phlim Khasi kidei ki paidbah na nongkyndong. Ïa kane lah ban ïohi na ka jingwan ki paidbah haba wan pyni ïa ki Phlim Khasi ha ki jaka nongkyndong wat ha ki Hall kibym da biang ruh.
Kumba ka jingpynmih phlim kam long shuh tang ka lad ban pyni sap, hynrei ka ladei ruh ka lad aikam aijam bad lad kamai na ka bynta kiba bun ki samla, ka sorkar kadei ban pyrkhat thymmai noh ha kaba ïadei bad ka jingkyntiew ïa ka jingpynmih phlim ha ka jylla.
