Ka rynsan jong ka Social Media ha kine ki khyndiat sngi, ka la shlei da ki ïa kynthoh pyrshah ïa ka Sorkar Jylla khamtam eh ïa ka tnat Jngohkai Pyrthei ba la peit da u Bah Paul Lyngdoh hadien ba la pynbna ïa ka tamasa Cherry Blossom ka ban sdang naduh ka 17 tarik, Naiwieng bad ka ban kut haduh ka 19 tarik, Naiwieng, 2023. Ki jingïakynthoh ki pynpaw ba ki pyrshah ban pynkut ïa kane ka tamasa ha ka sngi u Blei. Hynrei ka jingkylli kaba mih mynta ka long, hato, ka tang ha kane ka tamasa mo ba la pynkut ha ka sngi u Blei kaba la ñiew kyntang da ki Khristan bad ki Balang bapher bapher ba ki mih ki jingsniew kiba lait phewjait? Ki don ruh kiba la kynthoh da kaba ong, hato don mo kiba la ju peitngor ïa ki kam jakhlia kiba la pynisaitmet haduh katta ha ki sngi u Blei ha ki jaka jngohkai pyrhei bapher bapher kiba don ha kylleng ka jylla Meghalaya, kiba ju shlei da ki nongbuaid bad kiwei kiwei ki jait kam kiba pynhiardor ïa ka imlang ka sahlang?
Haoid, ym lah ban len, ka jingthmu jong ka Sorkar Jylla ban kyntiew ïa ki kam Jngohkai Pyrthei ka dei tang da ka lad ban pynlong ïa ki tamasa kiba lait phew jait khnang ban khring ïa ki nongjngohkai pyrthei nalor kaba theh da ki klur tyngka khnang ba ki trai shnong kin ïohkam ïohjam bad kin ïoh ïa ki lad kamai kajih.
Ka tnat Jngohkai Pyrthei ka la pynbna ban pynlut 9 klur tyngka ha ka tamasa Cherry Blossom da kaba wanrah ïa ki kaitor nabar ka ri bad ïa ki kaitor bapawnam na ka ri India bad napoh ka jylla Meghalaya bad nalor kiwei kiwei pat ki jingpynbyrngia ki ban khring ïa ki paidbah ha ki lai sngi ba la pynlong ïa kane ka tamasa.
Ngin kynmaw ba ym dei tang ha kane ka kynti yn sa pynkut ïa ka tamasa Cherry Blossom ha ka sngi u Blei, hynrei wat ha ki snem kiba la leit noh, la ju pynkut ïa ki tamasa Autumn Festival ha ki sngi u Blei ha kaba kiba bun ki pyrshah ïa kane ka jingthmu. Ym tang katta, lada u paidbah u dang kynmaw ba la pynlong ruh wat ïa ki tamasa ïaput ïatem ha madan Polo da ki nongrwai nabar ri ha ki sngi u Blei, hynrei ym don ba mih shakhmat ban pyrshah.
Ka jingkylli kaba mih mynta, ka long, balei ki mih ki kynhun ban pyrshah ïa ka jingpynkut ïa ka tamasa ha ka sngi u Blei. Ka Khasi Jaiñtia Church Leaders Forum (KJCLF) kaba long ka kynhun jong ki nongïalam Balang Khristan dang ha kine ki khyndiat sngi ka la pynpaw ba kam pyrshah ïa ka jingpynlong ïa ka tamasa ha ka sngi u Blei, hynrei ka kyntu ïa ka Sorkar ban pynthikna bad ban shim ïa ki lad ki lynti ba kam dei ban mih kano kano ka jingkulmar kaba lah ban ktah ïa ka shongsuk shongsaiñ na kane ka tamasa. Katba ka Meghalaya United Christian Forum (MUCF) ka kyrpad ïa ka Sorkar Jylla ban pynkynriah ïa ka tarik ban pynkut ïa ka tamasa ha kiwei pat ki sngi da kaba burom lem ïa ka jingsngew jong lak ngut ki riewngeit Khristan kiba shong basah ha kane ka jylla Meghalaya da kaba ñiew ïa ka sngi u Blei kum ka sngi bakyntang.
Ha kine ki khyndiat sngi, ka la mih ka jingïashrut, ka jingïakawang ktieh bad ka jingïapynphai nia hapdeng u Myntri ka tnat Jngohkai Pyrthei Bah Paul Lyngdoh pyrshah ïa ki nongïalam jong ki katto katne ki kynhun kiba la thaw ïa ka Joint Action Committee (JAC) ban pyrshah ïa ka jingpynkut ïa ka tamasa Cherry Blossom ha ka sngi u Blei bad dawa ban pynkynriah ïa ka sngi pynkut ïa ka tamasa sha kiwei pat ki sngi pohïa.
Wat hapdeng kine ki jingïakawang ktieh, bad ki jingkyntu na ki nongïalam Niam Khristan, ka tnat Jngohkai Pyrthei jong ka Sorkar Jylla kam pat lah ban shim ïa kano kano ka rai la kan pynneh beit ïa ka tarik ban pynkut ïa ka tamasa ha ka sngi u Blei lane kan pynkut noh ha kawei pat ki sngi pohïa. U paidbah u dang ap ïa ka ba ka tnat Jngohkai Pyrthei kan dang shong pyrkhat kam ban shim rai halor kine ki jingdawa da kaba pynshong nongrim ba kham bun na ki nongshong shnong ha kane ka Jylla Meghalaya ki dei hi ki Khristan lada ïa nujor bad kiwei kiwei ki kynhun jait niam.
