Nongstoiñ, Naiwieng 26: Ka aïom tlang ka la poi ki paitbah ki la sdang ban ïatrud khlieh namar ka jingkyrduh umbam um dih ka la wan, tangba ka jingkyrduh umbam umdih ka dei tang ha ki nongkyndong katba ha ki jaka ba la kham long sor kam da palat than.
Haba phai ha ka jinglong jingman jong ka jingpyntreikam ïa ka Jal Jeevan Mission ha West Khasi Hills, kumba ka long mynta hi wat tang marshiteng na ki shnong hapoh ka district kim don satia ïa kata ka umbam umdih kumba la mang da ka sorkar pdeng.
Ki paitbah jong bun tylli ki shnong ki la ong ba ka jingbym ïoh ïa ka umbam umdih kaba biang na ka jingpyntrei ïa katei ka skhim, ka dei namar ba ki don ki tyllong um ki bym lah ban pyndap um ha ka por tlang namar ki umpohliew ki rit palat.
Ki don pat kiba ong ba ka jingbym ler jong ki kontraktor kiba pyntrei ïa ki jaka pynlang um kiba pynpoi haman ki thliew ïing. Don pat kiba ong ba ki don ki jingpynthut ïa ki pipe line da ki briew kiba tih surok, pynkhyllem dieng, tih maw bad kiwei kiwei bad haba tyngkhuh ha ki pipe ki dkuh bad kim kit khlieh ban maramot.
Ki don pat kiba ong ba ka jing bym biang jong ki nongtrei kiba shna ïa ki dam ha ki tyllong um ka pynlong ïa ka um ban lait sha bar. Dei na kine ki daw lehse ba kiba bun ki shnong kim ïoh satia ïa ka umbam umdih.
Haba phai pat ha ka jingdon jong ki tyllong um, la lap ba ki don bun bah ki shnong kiba ki skhitom bha ban ïoh ïa ki tyllong um namar ba ki don ha jrong jong ki lum.
Ha ki snem ba mynshuwa, ki shnong kiba don ïa ki tyllong um na ki lynter lum Mawthadraishan ki dei ki shnong kiba pahuh bha ka umbam umdih. Hynrei ha kine ki snem ki la don shibun ki jingthud namar ka jingjur palat jong ka jingpom pathar ïa ki khlaw ha baroh shilynter jong utei u lum.
Kumta, na ka daw jong ka jingbym biang jong ki tyllong um, bun ki nongshong shnong ki hap ban pynlut da ki phew hajar tyngka, ban thied da ki pump um ne motor ryngkat ki pipe jri ban pynpoi um ha ki ïing ki sem. Kumta ka la buh jingeh bha ïa ki paitbah khamtam ïa kito ki longïing long sem kiba duk ki bym ïoh lad ban thied ïa ki pipe jri bad motor ne pump um.
Kiba kum kitei ki longïing ki hap ban pynshitom da kaba leit kit da u briew bad teng teng, ki don ki shnong kiba ha ki por tlang ki don ki jaka tong um kiba ki hap ban ïaid haduh shiteng kynta na ïing bad ban pyndap um ka long kaba shitom haduh katta katta.
