Shillong, Nailar 28: U Chairman jong ka Federation of Khasi State u Bah John F Kharshiïing u la kam ba ka jingpyntreikam ïa ka Instrumen of Accession(IoA) kaba ki Hima Khasi ki la ïasoi bad ka ri India ka dang im bad dang ïeng haduh mynta bad ka jingpyntreikam ïa ki kynndon kiba ka la pynkup ïa ki Hima Khasi ka shong beit ha ka Sorkar Jylla bad ka District Council.
Haba kren bad u Mawphor u bah John u la ong ba na ki kot ki sla kiba u la phah sha ki tnad bapher bapher jong ka sorkar pdeng kaba kut hi ki poi sha ka sorkar jylla ban ai ka jingkynthoh jong ka.
“Baroh ki shithi kiba ngi phah sha Delhi ka sorkar pdeng ka ju phah pat ïa ka shithi sha ka sorkar jylla ban pan ïa ka jingkynthoh halor kane bad na ka liang ka sorkar jylla kat haduh mynta kam pat shym la ai ktien eiei, bad lah ban ong ba ka jingpyntreikam ïa ki kyndon kiba a ïa soi ha ka IoA ka dei ka kam iing jong ngi” u la ong.
Shuh shuh u Bah John u la ong, “Ka jingmih ki jingkulmar kiba bun ha ka jaidbnynriew ka dei beit na ka jingtieng ïoh ba ka jaidbynriew Khasi ba rit paid kan shah klun ha ki paid India ba da ki spah milian bad nga i tieng ba katba nang pynsem ban pytrei kam ïa kane kan nang mih ka jingkulmar” da kaba bynrap shuh shuh “Lada phi peit ka jingïakhih ki Rangbah shnong ha ki snem kiba la leit ruh ka dei beit halorka jingkwah ban ïoh jingïada kaba kyrpang.”
Haba ïadei bad ka jingbym ïoh jingithuh ki Hima bad wat ki dorbar shnong da ka Riti synshar ka ri u bah John u la ong, “Lada phi peit sha dkhar ki nongsynshar tynrai jong ki kata ka Panchayatiraj ka ïoh rung ha ka Riti Synshar ha ka article 243 bad wad pat haei phin lap ïa ki Hima Khasi bad ki rukom synshar tynrai jong ngi ki don ne em ka jingïoh jingituh” u la ong.
U la ong ruh ba ka por ka la dei ba ka sorkar jylla kan ïeng da kaba shai la ka kwah ne em ban ïoh ka jingithuh ïa ki hima Khasi da ka Riti synshar namar ka lad ka dang don namar kat kum ka Clause 1 ka IoA ka kren ba katba ym pat ïa pynbeit thymmai ïa ki kyndon kaba ki Hina Hhasi ki ïasnoh bad ka India ki kyndon kiba la ïasoi ki dang ïeng bad u la ong ba kumba long mynta kam pat don kano kano ka jingpynbeit kaba mut ba ka IoA ka dang ïeng bad ka dang im hynrei ka shong pat ha ka sorkar jylla ban pyntreikam ïa kane.
