Ka jingpynshisha halor ka longtrai mantrai ki Labang-Nongphyllut bad Pangam Raliang

Ka Elaka Labang Nangphyllut kaba tip mynta kum ka Block-1 naduh ba ka hap noh sha United Cachar & Mikirs Hills Karbi Anglong mynta ka dei kawei na ki Elaka kaba rim tam hapoh ka Hima Jaiñtia. Ka don lai tylli ki Raid, ka Raid Nongjrong Raid Labang bad ka Raid Nangphyllut katba ka Pangam Raliang pat ka hap hapoh ka Elaka Raliang kaba dang don hi u Dolloi haduh mynta, hynrei ïa u Dolloi jong ka Labang Nangphyllut pat la pynduh pyndam jubor noh ki Karbi.
Ki Labang Nangphyllut ki dei shisha ki trai shnong bad trai muluk trai jaka ha kane ka thaiñ. Ki don shibun ki sakhi satar ban pynshisha ïa kane. Mynta to ngin ïapeit katto katne tang kiba kham don nongrim bad jingshisha:
Naduh hyndai hynthai kulong kumah naduh ki por bym pat tip jingkheiñ ki Nongjrong bad Labang Nangphyllut ki la shong lasah ha ka ne ka jaka ïa ka ne lah ban pynshisha da ki khana pateng jong ki kiba ki la ïoh iala ki jong ki blei ki dken kum u Blai Langdoh, U Chaiyumphe, Ka Mynkhri, ka Myntruiñ bad kiwei kiwei. Ki don ruh laka jong ka rukom lehniam leh rukom ka kñia ka khriam ka puja pukan bad ka phur ka siang, ka Riti ka Dustur kaba ym lah ban thaw ne ymlah shuh dalei dalei ban thaw ne seng ha ka pateng thymmai kaba mynta. Lait dang mynba kipor ki sngi jong kata ka sotti juk.
Naduh bala shem ïa ka Hima Jaiñtia ha ka snem 1500 A.D ïa ka Elaka Labang Nangphyllut la synchar da ki syiem Jaiñtia bad ka hap hapoh ka Hima Jaiñtia. Ki don ki tyngka pliah ne ki wait ki stieh ki sum kiba don jingïadei bad ka Hima Jaiñtia. La ong ruh ba ha ka por ba ka Ksoo Lyngdoh ka pynlong ïa ka Shad Niam (kaba ymtip kyrteng ïa kaba la shim pateng noh da ki Karbi kaba ki khot ka Chomangkan) la ong ba u wan ïadon bynta lang u Syiem Sutnga ruh tangba ym lah ban tip ïa ki snem bad ïa ka kyrteng jong u ta u Syiem. (La sngew donkam ba ki riewstad riew shemphang ïa ka History kin wad bniah ïa kane).
U Historian ba pawnam jong ka jylla Assam ïa kaba ki jingthoh jong u la pdiang da ka Sorkar India bad Sorkar Assam u Dr. S .K Bhuyan u thoh kumne, ” Ki Mikirs kiba tip mynta kum ki Karbi da ka Constitution ki wan na Tibet bad Burma bad ki shong ki sah harud jong ka wah Kulang bad sha shiliang jong ka Wah Kupli, ka Kaziranga National park kaba don hapoh Assam shisien ka sngi kadei ka jaka shong jaka sah jong ki. Hynrei ha ka snem 1600 lane 1625 A. D ki shah hiar thma ha ki syiem Kachari bad ki phet ïap sha ki Lum jong ka Hima Jaiñtia bad ki shong ki sah hapoh ka jingpyniaid jong ka Hima Jaiñtia”. Kane kadei kawei na ki sakhi sabut kaba shkem bha ba dei ki Karbi kiba wan shong wan sah sha poh Jaiñtia ne shapoh Pnar, ym ki Jaiñtia neki Pnar kiba leit shong leit sah shapoh Karbi.
Wat ki kyrteng Lum kyrteng wah kyrteng jaka puta ruh bun la jer da ka ktien Pnar suda. Kum u lum Dorbin lum Lama Pdieñ Lalieh Sarynthu Raksiah lum Laharang lum Mookhyrwang lum jrong Pdeiñ ïawmuksoo bad kiwei kiwei. Ki wah kum ka wah Mynriang Myn-i Umlong Umnam Umphe Umkhri Umtruiñ Umpu Umshara bad kiwei kiwei de. Ki kshaid kum ka kshaid Wanten kshaid Umtahsniang, Tyrshi Khorkhali Tyrshi Umpangtiang bad kiwei kiwei de. Wat ki saw tylli ki wah rit kiba don hapdeng jong ka sor Hamren kaba dei ka nongbah jong ka West Karbi Anglong ruh la jer kyrteng da ka ktien Pnar kita ki wah kilong ka wah Umryntih Umteli Umbinong bad Umnam
Wat ki shnong Karbi bad shnong Nepali ruh bun ki ba jer kyrteng da ka ktien Pnar suda Kum ka Myn-i Lakaroi Tahpat Mooiong Khloolaphiang Umbaso Umpu Umshara Umkhyrmi Mookoilum Moothade Tibin Umpawiang Umtympri Samatan bad kiwei kiwei de. Haba la ïoh ban jer kyrteng da ka ktien Pnar, ka mut ba dei ki Khasi Pnar ba ïoh ban shong ban sah nyngkong bad ka pynshkem pynshisha ba dei ki Khasi Pnar kiba shong basah nyngkong.
Wat ha ka ktien ka thylliej ruh bun baki shim kylliang na ka ktien Pnar, kum ka nuksa iaka lynti ki ong, ” Loti ” ïa ka hok ki ong, “a hok” shaphang ki Ong, “aphrang” ïa ka jingrem ki ong, “rem” ïa ka laha ki ong, “laha” ïa ka duma ki ong, “duma” ïa ka pliang ki ong, “ka phleng” bad kumta ter ter. Iaka kyntien “Nim rokom” ki shim na ka ktien Pnar “Niam rukom” bad “Pinchong pinthi” ka wan na ka ktien Pnar, “Pynchong pynthiah” bad kumta ter ter.
Wat kawei na ki lehñiam ba pawnam jong ki kaba ki khot ka Chomangkan ruh ki ïoh pateng na ki Pnar. “Chomang ” kamut, “Pnar” bad, “Kan” kamut “Shad” kumta Chomangkan kamut ka Shad Pnar.
Bad kiba long Khristan Presbyterian ruh mynshwa ki pyndonkam da ki kot jingrwai bad Baible Khasi, ki don hapoh Presbytery bad Khasi Jaiñtia Presbyterian Synod. Bad ki Catholic ruh hapoh Shillong Diocese.
Lada ngi peit bad pule ïa ki jingthoh History ruh ka paw shai ba mangi ki Khasi Pnar hi bashong ba sah ha kane ka jaka. U wei na ki nongthoh History ba pawnam bha jong ka jylla Assam uba kyrteng U Dr. S. K Bhuyan u ong kumne, ” Nyngkong eh ki Mikirs kiba tip mynta kum ki Karbi ki wan na Tibet bad Burma bad ki shong ki sah sha shiliang jong ka wah Kulang bad wah Kupli, ka National park ba pawnam bha jong ka jylla Assam ka Kaziranga National Park shisien ka sngi ka dei ka jaka shong jaka sah jong ki. Hynrei ha ka snem 1600-25 ki shah hiar thma ha ki Syiem Kachaari bad ki phet sha ki jaka rilum jong ka Hima Jaiñtia bad ki shong ki sah hapoh ka jingpyniaid bad jingsynshar ki syiem Jaiñtia. Kane kadei kawei na ki sakhi sabut kaba pynshisha ba dei ki Khasi Pnar shisha ba shong basah shwa ha kane ka jaka.
Wat u mar ba khlaiñ bor tam jong ki uba tip kyrteng kum u Thong Nokbe Teron ruh la pynïap da ki pnar. Ïa kane la thoh da u wei na ki nongthoh poitri ba pawnam bha jong ki U Elisha Hanse u ong kumne,
” Tharve angsong bat long bin,
Thai rangkap pen ap rin rin
La an a jakong ke the,
Ta, thi nangkok lo Thong Nokbe”.
Ka mut, “Ki ïoh ban pynkiew halor dieng souping,
Ki siat da u khnam kynthei bad shynrang,
Kat ka jibgkhlaiñ bor u Thong Nokbe ruh,
Ym banse ban ïap khlem jingsngew thuh”.
Wat ki riewtymmen jong ki ruh ki juh ïa ong, “Sutong a longle, Labang a longle kamat si kevang cheng?” Kamut mano ba wan shong wan sah nyngkong ha ka khyndew ki Sutong khyndew ki Labang? Sutong Labang kamut ki Pnar Labang Pnar Nangphyllut. Ki ia jubap, “Rongpi lapen Ronghang atum henlo , Rengbonghom Recho arni”. Kamut, dei ki kur Rongpi bad ki kur Ronghang ha ka sngi u syiem jong ki u Rengbonghom.
Hangne ruh la pawshai ba dei ki Khasi Pnar hi bashong basah shwa sha kine ki thaiñ bad haduh mynta mynne ki dang don kiba la pynkylla ïalade kum ki Pnar kita kidei ki Timung Pnar bad Teron Pnar kumba ngi ïatip lang baroh.