Ka jingpynkynriah kam khlem por ïa ki ophisar ka ktah bad pynduh kam ïa ki paidbah
![](https://mawphor.com/wp-content/uploads/2022/05/mawphor-1.jpg)
Nongstoiñ, Nailar 31: Ka jingpynkynriah kam khlem dei por ïa ki ophisar na ki tnad treikam jong ka sorkar la ki dei kiba don ha ki jaka sor ne ha ki jaka kyndong, ka pynduhkam haduh katta katta ïa ki paitbah, khamtam lada ki dei ki ophisar kiba smat bad kiba lah ban pynjan bha bad ki nongsynshar shnong ryngkat ki paitbah, ong u bah Francis Wanniang uwei na ki riew rangbah ka thaiñ Nonglang.
Utei u rangbah haba ïakren bad u nongthoh khubor, u la ong ba u la ju lap bunsien ba haba la pynkynriah kam ïa u ophisar, ki don ki ophisar ki bym phai dien shuh ïa kaei kaba u ophisar u ba la shah pynkynriah u la dep pruid dak. Hynrei ki don pat ki ophisar kiba shimkhia ïa ka kam, kim hun ban shu iehnoh ïa ki jingpruid dak jong kiba la shah pynkynriah ba kin shu sah kut ha ki files, hynrei ki buddien thih pathik khnang ba ka kam kan ïaid shait shait bad ba ki paitbah kin sngew tynnad.
U la ong ba ha ka jingshisha ka sorkar ka la dei ban bud ryntih bha ïa ki kyndon ba la buh, ba ki ophisar ki hap ban trei haduh lai snem ne palat ha kano kano ka jaka kaba la phah ïa ki.
Hynrei kumba ka long ha kine ki snem ki don ki ophisar kiba dang trei tang shi snem ne ar snem ki la shah pynkynriah kam noh. La ju lap ba ki don ki ophisar kiba neh ha kajuh ka jaka trei bun bun snem palat ban ïa ka por ba ka sorkar ka la buh.
U bah Wanniang u la pynkynmaw ruh ba kumba ka long ha u snem 2018-19, u Arunkumar Kembhavi IAS Deputy Commssioner ka West Khasi Hills u la shah pynkynriah kam khlem dei por, tang namar ba u trei hok ïa ka kam bad um ju shah pynkohnguh ha kiwei pat .
Ka jingpynkynriah kam khlem dei por ïa ki ophisar ka dang ïai bteng haduh mynta, ha kaba u la pynshisha halor ka jingpynkynriah kam ïa u Block Development Officer jong ka Mawshynrut C&RD Block, u ba peit lang ruh ïa ka ri Muliang Block kaba la don ïa ka ophis trei kam ha ka shnong Nonglang.
U la ong ruh ba katkum ka jingtip jong u, ka jingtrei jong u bah Passah kum u BDO jong ka Mawshynrut kam pat kynjoh satia lai snem bad ka jingplie ïa ka ri Muliang Block lei lei kam pat dap wat tang shi snem ruh. Hynrei naduh ba u BDO ka Mawshynrut u la shimti ban peit lang, ki kam ki la sdang ban ïaid shait shait wat la ki nongtrei kim pat don ruh.
Nalor kata u la ong ba dang ha ka taïew ba la dep utei u BDO u la ong ha ki paitbah kiba wan donkam, ba kin ap shuwa bad ïa ki kam jong ki un sa pyndep mynta ka sngi ka 31 tarik Nailar. Hynrei ka sngi ba u kular ban pyndep ïa ki kam jong ki paitbah kiba dei ha ka ophis ha Nonglang, ka sngi kam pat poi u la da shah pynkynriah kam noh.
U la ong ba ka jingpynkynriah kam noh ïa utei u BDO, ka la pynlyngngoh ïa ki paitbah namar lada kin wan ha Nonglang da ka kjat ki dang suk bha namar ka jan. Hynrei lada in leit haduh Riangdo ki hap ban lut ka bai kali bad leit bad wan nalor ba ki duh ka trei ka ktah, ka bylla ka sngi bad kiwei kiwei ki kam.
U la ong ruh ba lada ka sorkar ka la dep thung bujli ïa u BDO ha ka jaka jong u ba la shah pynkynriah kam, ka dei ban bthah ba u dei ban pynpoi tista ha Nonglang man la ka sngi palei lane ka dei ban thung noh da u BDO ba pura u ban trei beit thik tang ha ka ri Muliang Block ha Nonglang, khnang ba ki paitbah kin lait ban leit haduh Riangdo tang na ka bynta I kam I ba rit ruh.