Ka jingpynkhreh ka la long kumba 70%, kyrmen ba ki kam pynroi kin neh: Rikhaiñ Sakwang

Mawkyrwat, ‘Naiwieng, 26: Ki nongpeit nongjngoh ïa ka khyndew ha shyiap jong ka Rikhaiñ Lyngdoh Sakwang, South West Khasi Hillls District lyngba u bah Poland Sohphoh uba dei u Chairman jong ka Rikhaiñ bad u bah New Nongrem, Vice Chairman ki la pynpaw ka jingsngewnguh bad ka jingsngewkmen ba halor ka jingwan tyllun ki kam pynroi ha shnong Sakwang kata naduh ki surok ka umbam umdih bad kiwei de na ka bynta ban pynkhreh ïa ka Jingïaseng jong ka Khasi Jaiñtia Presbyterian (KJP) Synod Sepngi jong ki Rangbah ka ban sa long ha u snem 2025 ha ka Balang Presbyterian Sakwang, South West Khasi Hills District.
Lah ban kdew ba ka jingpynkhreh ïa ka Jingïaseng Synod Sepngi ka ban sa long ha ki tarik 6 haduh 9 tarik jong u bnai Lber, 2025 ha ka Balang Sakwang ka la ïsid shaid shiad, la kumba 70% ki jingtrei ki la dep ban trei, kaba dang sah ka long sa tang 30%,
Haba kren ha ki lad pathai khubor, na ka liang u bah Poland Sohphoh u la ong ba da ka jingsngew kylluid mynsiem bad ka jingkmen ngi la aiti lut ha ka Sorkar ban pdiang ïa baroh ki kam pynroi ha ki jaka kiba hap ha ka jingpeit ka Rikhaiñ Lyngdoh Sakwang kumjuh ruh ki pdiang sngewbha ïa baroh ki paidbah ki ban sa wan ha kane ka Jingïaseng KJP Synod Sepngi. Ha kajuh ka por ula ai ka jingsngewnguh ïa u MLA ka thaiñ bah Renikton Lyngdoh Tongkhar ba u la kitkhia halor kane ka bynta bad baroh ki kam pynroi ha kane ka shnong ka la kynjoh kumba 80 percent ei ei ba ki la lah ban pyndep.
Katba ha ka jingkren jong u MLA ka Mawkyrwat Constituency, u bah Renikton ula pynpaw ka jingsngewkmen halor ka jingïaid beit ïaid ryntih jong ka jingpynkhreh ïa ka Jingïaseng Synod ha kaba dei ha baroh ki liang. Shuh shuh ula pynpaw ruh ba ki don ki jingtrei kiba la nangtrei noh katba ym pat ïoh ïa ka jingmang pisa ne sanction na ka sorkar hynrei u don pat ka jingkyrmen ba na ka liang ka sorkar kan leh kloi noh katba lah ban mang pisa noh kloi ïa kitei ki jingtrei khnang ba kan long ka jingtrei kaba jop.
U Bah Renikton ula ong ba ka jingpynkhreh ïa ka Jingïaseng Synod ha Balang Presbyterian Sakwang ka long thik kumba la pynkhreh ïa ka Jingïaseng Synod kaba la dep ha ka shnong Jakrem kaba ym shem la don shuh kano kano ka jingdheng kali bad jingsah kut na ka bynta ki nongwan Jingïaseng. Namarkata, u kyrmen ba ka Jingïaseng Synod ha Sakwang ruh kan long hi kum juh, ban pyntikna ba kan ym don kano kano ka jingdheng kali ïa ki nongwan Jingïaseng, ong u bah Renikton Lyngdoh Tongkhar.