Nongstoiñ, Jylliew, 25: Ka jingpynïap dusmon ïa ki mrad ki mreng, ki sim ki doh bad ki doh um doh wah ka long ka pop kaba khraw, ong u bah Rilang (Dmikstar Lyngdoh Nonglyngkien). U bah Rilang haba ïakren bad u nongthoh khubor halor katei ka phang, u la ong ba ha ki por ba mynshuwa eh ki tymmen ki san ki kheiñ ba ka jingbeh mrad ka dei ka tamasa bad ki pynïap ïa ki mrad da kaba shu leit beh bad ki da kheiñ ruh ïa ka por.
Nalorkata u la ong ruh ba ïa u mrad u ba ki la ïoh pynïap ki ïa sam doh kyndang sha baroh kiba leit beh ba kin bam. Katba ïa uno uno u mrad u ba ki ïoh ban kem im ki sumar na ka bynta ban pynroi ha ki khlaw ki btap. U la ong ruh ba ha kane ka juk ba mynta baroh ki nongshong shnong ki la long Khristan, hynrei dei ma ki kiba pynïap dumon ïa ki mard ha ryngkew, ki sim ki don da kaba siat da ka suloi bad haba ki la ïoh ki die ha ïew ha hat na ka bynta ban kamai pisa.
Nalor kata u la ong ba ha ki por mynshuwa haba ki kwah bam doh um ki shu leit tong tang na ka bynta ban bam. Hynrei ha kine ki sngi ym tang ba ki shu tong hynrei ki ber da ki dawai bih ba lai phew jait na ka bynta ban ïoh kham bun bad ban die ha ïew ha hat.
U bah Rilang da ka jingsngew khia u la ong, “Ki mrad ki mreng, ki sim ki doh, ki doh um doh wah ki dei ki jingthaw ba kordor kiba u Blei Nongbuh Nongthaw u la thaw nyngkong ïa ki, ha shuwa ba un thaw ïa u briew bad kum ki khun bynriew, ngi la dei ban burom bad sumar ïa ki namar ki dei ki jingthaw ba kordor jong u Blei”.
“Lada ngin pynshong nongrim ki sim ki doh, ki mrad ki mreng ki long shisha ki ba kordor, namar ka jingsumar ba phylla ka jong u Blei bad u la ai ha ki ïa ka jinglong ba kyrpang tam na ki jinglong baroh. Namar kim donkam ban trei shitom kum ki khun bynriew na ka bynta ba kin ïoh ïa ka bam ka dih, ka kup ka sem bad kiwei kiwei”.
“Lada ngin pule ha ka Kitab kaba nyngkong eh ha ka Bible, kata ha ka Kitab Genesis ka Lynnong kaba nyngkong ka dkhot kaba arphew haduh arphew hynñiew, ka la kren shai kdar ba baroh ki mrad kiba im ha ryngkew, ki sim ki doh bad ki dohkha doh pnat ki dei kiba u Blei u la thaw da kaba shu hukum”.
“Lada ngin pule ha ka dkhot kaba arphew hynriew pat, ngi lap ba u briew u dei u jingthaw u ba khatduh eh ba u Blei u la thaw bad u la pynskhem ruh ïa u briew, kum u nongsynshar u ban peit ban khmih ïa baroh ki jingthaw ba im ba u la dep pynlong shuwa ban un thaw ïa u briew na ka dew met”.
“Ban pynskhem ïa kitei ki bynta lada ngin bteng ban pule ha ka dkhot kaba arphew phra, ngin lap ba u Blei um shym la ong ba u briew u dei ban bam duh ïa kiei kiei. Hynrei, ba un synshar halor jong ki bad kam doh hok ha ka pyrthei ba uno uno u nongsynshar un bam duh ïa kiba shah synshar, hynrei u don ka hok tang ban bishar bad ban pynbha pynmiat ban pynroi pynsan bad ban ri ban sumar ïa ki”, ong u Bah Dmikstar.
