Ka Jingpang Shini (Type 2 diabetes) Ki jait jingbam kiba lah ban ai jingmyntoi bad kumjuh ruh kiba pynjur ka jingshitom

Ki don ar jait napdeng ki jingpang shini ne ka diabetes, kine ki kynthup ka
type 1 diabetes bad ka type 2 diabetes. Kito ki briew kiba don ka type 2
diabetes ki dei kiba sakhi halor ka jingkyntait ï aka insulin ha ka met. Ka met jong ki ka dei kaba pynmih ka insulin hynrei kam shim la treikam bha satia halor jong ka, kito ki briew kiba don kane ka jingpang ki lah ban pynkylla halor ka jingdon ka shini da kaba jied ha ka lynti kaba dei bad ka rukom im jong ki. Ka jingjied ki jingbam kiba dei hapdeng ba phi don bad ngat ha kane ka jingpang ka dei kaba lah ban ai jingïarap halor ka jingpynbiang ka jingdon ka shini. Wat hapdeng ba phi don bad ngat ha kane ka jingpang kam da donkam ïaphi ban kiar baroh ki jingbam ba phi bang ban bam. Hynrei ki don bun ki jingbam kiba tei ba phi lah ban bam. Phi lah ban kynthup napdeng ki jingbam ba dap da ka jingdon ki nutrient kum ka carb kaba bha, ka fat bad ka protein.
Ki jingbam kiba kynsai lada phi tehlakam hapdeng ba don kane ka jingpang type 2 diabets:
Ki jhur : Ki jhur sla jyrngam ka dei kiba dap da ka jingdon ki nutrient ba duna ka calorie. Kumjuh ruh ki dei kiba dun aka jingdon ka carb kaba suk ban tylliat bad ki jur bha ban don ka fibre. Kumta ka paw ba ka long kaba donkam ban kynthup ka jingbam jhur kum u Palong, u Salat, u Phul Jyrngam bad kiwei de ki jhur sla jyrngam. Shuh shuh kine ki jhur ki dei ki thymmei halor ka jingdon ki vitamin bad ki mineral ba kynthup ka vitamin C. Phi lah ban kynthup ban bam kine ki jhur hapdeng ba phi khleh ki jhur bam im, ha ka syrwa ne ki jingbam lang bad u ruti.
Ka Doi : Kane ka long sa kawei pat ka jingbam ba dap da ka jingdon ki nutrient, kane ka jingbam ba ngi ïoh pateng na ki jingri ka dei ka jingbam ba lah ban ai jingmyntoi shibun hapdeng kito kiba don ka type 2 diabetes. Kane ka doi ka dei kaba lah ban tehlakam halor ka jingkiew ka shini bad pynduna ka jingma ban ngat ha ka jingpang klongsnam. Phi lah ruh ban kynthup ha ka jingbam lang bad u walnut ne ki sohshiah ban pynjur ka jingmad. Hynrei pynthikna ba phin ym khleh shini satia namar ka kyntiew halor ka jingdon ka shini ha ka snam.
Ki Soh eh snep : Kine ki soh bad ki syieng ki dei kiba bang bad kiba lah ban tei ha ka liang ka koit ka khiah bad ki long kiba bha lada phi jied ban bam kum ki jingbam kai. Baroh napdeng kine ki jait soh ki dei kiba don ka fiber bad ki duna ka jingdon ka carb kaba jem. Kumta ka long kaba bha ban kynthup hapdeng ka jingjied kine ki jingbam ba kynthup naduh u soh khyllam, u cashew, ki symbai chia bad symbai flax napdeng kiwei de.
Ki jingbam ba phi donkam ban kiar hapdeng ba phi don ka type 2 diabetes :
Ki jingdih ba thiang : Kine ki jingdih ba kynthup naduh ki jingdih pyngngad, ki jingdih ba aibor, ki umsoh ba la pynkhreh lypa ki dei napdeng ki jingdih kiba sniew tam hapdeng kito kiba don kane ka jingpang. Ki dei kiba ym don jingtei satia ha ka liang ka koit ka khiah bad ki lah ban ktah kylla ha ka liang ka koit ka khiah jongphi. Kine ki jingdih ki dei kiba dap da ka jingdon ki fructose, kiba paw ba ki dei kiba don ka jingïadei kaba jur halor ka jingkyntait ka met ban pyndonkam ka insulin. Ka jingjied kaba bha ka kynthup ka jingbam ki soh bad dih ka um ba la saiñ hi na ki jhur, ka um snepkor bad ka um sohjew.
Ka Trans fats : Ka Trans fats ka dei ka unsaturated fats kaba ju paw halor ka jingdon jingïadei bad ka jingkiew ka jinglong tyrha, ka jingkyntait ka met ban pyndonkam ka insulin, ka kyntiew halor ka jingdon ka fat ha ka kpoh bad ka jingpang klongsnam. Kumta ka long kaba donkam ban kiar na ki jingbam ba jur ka jingdon ka trans fats. Kine ki kynthup ki cakes, ki biskit, ki mit mit, donut bad ki cookies.