Ka jingpang LSD ki Masi kam don jingktah ia ka Doh ne Dud tangba donkam ban da shet bha pat : H.K Marak

Shillong, Jylliew 07: U Joint Director jong ka tnat Directorate of Animal Husbandry and Veterinary u H.K Marak ula pynshai ba ka dud bad ka doh Masi kim don jingktah eiei ïa ka koit ka khiah ki briew hynrei watla katta ruh ka long kaba donkam pat ban da shet bha ïa ka dud ban dih bad ïa ka doh shuwa ban bam.
U H.K Marak ula ong ba ka jingpang Lumpy Skin Disease lane LSD ka dei ka jait jingpang ïa ka met ki masi bad kane ka jait jingpang ka ktah jur bha ym tang ïa ki masi hynrei ka lah ruh ban ktah ia kiwei pat ki mrad lada ki ia khleh lang ha juh.
Ula ïathuh ba kat kum ka jingïoh lum ïaki kaiphod lyngba ka ophis treikam, haduh mynta 3500 tylli tam ki Masi kiba la shah ktah ha une u khniang jingpang ha kylleng ka jylla bad 29 tylli ki masi ki la iap na une u khniang jingpang.
“Kane ka jingshah ktah ki masi ha ka jingpang LSD ka long kaei kaei kaba pyndunong ïa ka jylla hynrei watla katta ruh kam don jingktah pat ïaka doh masi bad ka dud masi tangba dei ban da shet bha ïa ka dud ka doh shuwa ban dih ne bam” la ong u H.K Marak.
U H.K Marak ula kyntu ïaki briew ban kham kiar ïa ka doh thad namar ka dei kaba shu pynrkhiang ïa ka doh tang da ka tdem.
Nalor kane u H.K Marak ula ïathuh ba haduh mynta kam don ka dawai ban pynkhiah ïa une u khniang hynrei ki lah tang ban ai da ki tika ïa ki masi kiba dang koit khnang ban tehlakam ïa ka jingpur.
“Naka bynta ban tehlakam ïa kane ka jingpang, ki nongri masi ki dei ban set ïa ki masi kiba pang la ka jong, bad ban leh khuid ïa ka sem khnang ba ki ksaiñ ki nym ïoh ban boi ïa kiba la ïoh ïa kane ka jingpang, ki nongri masi ki lah ban pynkyllan da u shynrai tang kum ka jingïada bad lada iap ki masi dei ban da tep bha kumba 6 phut eiei hapoh khyndew” ula ong.