Ka jingnoh synñiang ki lai tylli ki tnad treikam ka Sorkar ka la wanrah ïa ka jingmyntoi sha ki paidbah: Kong Caramai

Mawkyrwat, ‘Naiwieng, 09: Ka Deputy Commissioner jong ka South West Khasi Hills District Kong Caramai Kharkongorha ka sngi Balang ka la plie ïa ka Mawkyrwat Rural Haat hajan ka Community Hall.
ïa kane ka ‘Mawkyrwat Rural Haat’ la shna lyngba ka jngïarap pisa na National Bank for Agriculture and Rural Development (NABARD) Under Gramya Vikash Nidhi Fund ryngkat ka jingïatreilang bad ka Block Development Office lyngba ka MNREGA Scheme bad ka National Rural Livelihood Mission (NRLM), bad Meghalaya State Rural Livelihood Society (MSRLS), District Mission management Unit (DMMU), South West Khasi Hills District.
Ha kane ka sngi la sakhi lang da u Prabhudutta Sahu, General Manager ka NABARD, u bah L.T. Tariang, Additional Deputy Commissioner ka Mawkyrwat, u bah Isagahah Lawynniang, Block Development Officer, Mawkyrwat, u Myntri shnong Mawkyrwat bad kiwei kiwei kiba shah khot sngewbha.
Haba kren kum ka Kongsan, ka kong C. Kharkongngor ka la ong ba kane ka sngi ka long kaba kmen ha kaba la lah ban pynurlong ïa ka jingthmu lyngba ka jingïatreilang bad ka jingnoh synñiang na ka NABARD, MGNREGA bad ka MSRLS-NRLM ha kaba la lah ban pynïeng ïa kane ka ïew ka ban long ka jingmyntoi bad ka jingkyrkhu ïa ki nongrep ha kaba ki lah ban pynïaid ïew ki mar kiba ki pynmih ha ki shnong ki thaw jong ki bad ha kajuh ka por ka la ai jingmut ïa ki Self Help Groups (SHGs) ba kin long kiba ïatylli bad kiba ïatreilang barobor namar dei tang ka jingïatylli kaba lah ban wanrah bad pynurlong ïa kiei kiei kiba khraw.
Ka la pynkynmaw ruh ba ka jingdon jong kine ki SHGs ka la pynkylla dur ïa shibun ki longïing longsem, ki shnong ki thaw bad ha kajuh ka por ka ailad bad pynshlur ïa ki longkmie ban ïa mih shakhmat ban ïa tynrong lem ïa ka khia ka shon jong ka imlang ka sahlang. Nangta, ka la ai mynsiem ïa ki SHGs ban nangtrei shitom ban nangpynbha bad nang pynïar shuh ïa ki kam ki jam jong ki. Ka la pynpaw ïa ka jingsngewnguh ïa ka Balang Presbyterian kaba la ai jaka kylluid mynsiem na ka bynta ban thaw ïa kane ka Rural Haat da kaba kyntu ïa ki nongshongïew ban shim ïa ka jingkitkhlieh ha kaba sumar bad pynkhuid ïa kane ka ïew ka ban ai ka jingmyntoi bad jingkyrkhu ïa shibun ki longïing longsem.
U bah Isagaha lawrynniang, Block Development Officer (BDO) ka Mawkyrwat C&RD Block u la pynpaw ïa ka jingsngew-kmen ban ïoh plie ïa kane ka ïew na ka bynta ka jingbit jingbiang jong ki nongrep kiba shong ha kane ka thaiñ. U la ïathuh ruh ba ka Rural Haat Management Commit-tee ka la shim ïa ka rai ban ailad ïa ka Photbaden SHG ban buh ïa ka jaka bam ne Restaurant ha kane ka Haat bad kumjuh ruh jong ka Tynnai bad ruh ban ailad ïa ki nongrep ban wan die ïa ki mar ki mata jong ki hapoh kane ka ïew.
Ha ka jingkren jong u Prabhudutta Sahoo, General Manager ka NABARD, Shillong u la pynpaw ïa ka jingsngewkmen ha ka ban ïa don ryngkat ha kaba plie ïa kane ka ïew ka ban long ka lad bad ka kabu ksiar khamtam ïa kito kiba pynmih ïa ki mar rep, ki tiar thaiñ ne shna kti bad kiwei ha kaba ki lah ban wanrah bad die ïa ki mar jong ki bad ban nang kham pynbha bad pynitynnad shuh ïa ki mar rep na ka bynta ban pynïaid ïew ïa ki.
Ha ka jingkren jong u bah L.T. Tariang, Additional Deputy Commissioner jong ka South West Khasi Hills District u la ong ba ki Self Help Groups lyngba ka NRLM ki la lah ban wanrah shibun ki jingkylla ha ki longïing longsem, ha ka imlang sahlang bad ha ka dong ka thaiñ bad u la ai mynsiem bad pynshlur ban nang ïai trei shitom shuh shuh ban leh ïa kiwei pat ki kam kiba khraw ha ka ban kyntiew ïa ka imlang sahlang kum ha ka ban kyntiew ïa ka kam jngohkai pyrthei bad ban lah ban pynïaid ïew ïa ki mar shabar jong ka jylla. U la kyntu ruh ha kajuh ka por ban peit shakhmat ym tang ban ïoh nong hynrei ban don ka mynsiem ban ïarap ban kyntiew lem ïa kiwei ha baroh ki liang.
Ïa ka jingïalang ha kane ka sngi la pynïaid da ka kong Rila A. Kharlyngdoh, Block Project Manager, NRLM, ka jingkren pdiang na u bah Eson A. Khongrymmai, DMM/MSRLS, South West Khasi Hills District bud da ka jingrwai pdiang na ka Kjatsngi Village Organisation, Rangblang Sohsynñiang.
Kiwei pat kiba la ai jingkren ki long na ka Balang Prebyterian Mawkyrwat ba la mih khmat da u T.Bn. J.S. Khardewsaw, ka jingkren na u Myntri Shnong Mawkrywat, u bah R.R. Lyngkhoi bad kumjuh ruh jingshad na ki hep kiba rit kiba dei na ka Jingkyrmen & Syntiewbarit Children Group, Domjyrti.
Ïa ka jingkren khublei la ïoh na u bah Juban L. Nongsiej, Project Executive Livelihood Promotion (PE-LP) bad bud da ka jingleit peit ïa ki mar rep kiba la wanrah da ki SHGs Member napoh Mawkyrwat bad Ranikor Block.