Mawkyrwat, ‘Nailur 25: Ka Ophis jong u Executive Engineer (EE) jong ka Public Health Engineering (PHE), Mawkyrwat Division, ryngkat ka ophis jong ka District Swachh Bharat Mission Gramin (DSMB), South West Khasi Hills District, Mawkyrwat mynta ka sngi ka la pynlong ïa ka Swachhta Rally lane jingiaid paidbah kum shi bynta ba pysngewthuh bad pynshai baidbah halor ka jingkordor ka khuid ka suba ha ki shnong ki thaw sawdong sawkun.
U Bah Joystarding Lyngdoh, Block Coordinator, Mawkyrwat Block ha ka jingkren jong u shwa ban sdang ïa ka jingïaid paidbah ula ai khublei ïa ka ophis jong u Executive Engineer, jong ka Public Health Engineering (PHE), Mawkyrwat Division bad ka District Swachh Bharat Mission (DSMB), South West Khasi Hills District kiba la pynlong ïa ka jingïaid paidbah kaba long kum shibynta jong ka jingrakhie ïa ka Gandhi Jayanti, bad ïa ka ‘Swachhta Hi Seva 2023’.
Shuh shuh, u la ong ba kane ka jingïaid paidbah ka dei kum kawei ka bynta ban pynsngewthuh ïa baroh ki paid nongshong shnong jong ka distrik ba kim dei ban bret pathar ïa ki ñuit ki jaboh ha ki lynti synkien, ki jaka paidbah khnang ban wanrah ïa khuid ka suba ha ki shnong ki thaw. U la ban jur ruh halor ka jingkordor ka jinglehkhuid leh suba bad u la long ba ka jingleh khuid ka long ka kamram jong uwei pa u wei u nongshong shnong bad ngi dei ban pynkhuid ïa la ka jong ka sawdong sawkun jong ngi.
Ïa kane ka rally kaba la sdang na Mawkyllut bad pynkut ha phyllaw jong ka ophis u Executive Engineer ka Public Health Engineering (PHE), Mawkyrwat Division ha kaba la wan ïa shimbynta da ki khynnah skul na ki skul bapher bapher napoh ka Mawkyrwat Block kiba la rah ïa ki jingthoh ne placard ki don ki jingthoh ba ïa dei bad ka jingkordor jong ka jingleh khuid leh suba ha ka imlang sahlang.
Ha kane ka juh ka sngi, ka ophis jong u Executive Engineer (EE), Public Health Engineering (PHE), Mawkyrwat Division, ryngkat ka ophis jong ka District Swachh Bharat Mission Gramin (DSMB), South West Khasi Hills District ka la ïoh ruh ban pynlong ïa ka jingïakop jingkyntip bad ka jingïakop dro jingdro ba la pynlong hapoh ka hall jong u Executive Engineer (EE), Public Health Engineering (PHE), Mawkyrwat Division.
Kane ka prokram ka long kum shibynta ka jingrakhe ïa ka ‘Swachhta Hi Seva 2023’ kaba ka phangpdeng ka long, “Garbage Free India”. Ki skul kiba la wan ïashimbynta ki long ka Maharam Government Higher Secondary School, Mawkyrwat, ka Mawkyrwat Presbyterian Secondary School, Laitlawsang bad ka Tiehïangphang Upper Primary & Secondary School, Mawthawiang.
Ki skul kiba la jop ha ka jingïakop jingkyntip ki long ka Maharam Government Higher Secondary School, Mawkyrwat kaba la rah ïa ka namjop, ka Mawkyrwat Presbyterian Secondary School, Laitlawsang ha ka kyrdan ba ar bad ka Tiehïangphang Upper Primary & Secondary School, Mawthawiang ha kaba lai.
Nangta, ha ka jingïakop dro dur, ïa ka namjop la ïoh da u Phrangsngi Khongngaiñ na ka Mawkyrwat Presbyterian Secondary School, Laitlawsang, u Phulnestar Lyngdoh na ka Maharam Government Higher Secondary School, Mawkyrwat ha ka kyrdan ba ar bad u Samborlang Lyngkhoi na ka Tiehïangphang Upper Primary & Secondary School, Mawthawiang u la wan ba lai.
Hadien ka jingïakop, na ka liang ka ophis ka ïoh ban sam ïa ki khusnam sha baroh ki nongjop kiba la wan ïashimbynta ryngkat ka jingïadonlang u bah K. Nongbsaw, Executive Engineer ka Public Health Engineering (PHE) Mawkyrwat Division Cum Member Secretary DSBM (G).
