Ka rai jong ka tnad Arts and Culture jong ka sorkar jylla ban tei da ki mordur ba shi rynieng jong ki lai ngut ki nongïaleh laitluid ka ri ha Stat Central Library ka long ka rai kaba dei ban ai jingïaroh shibun, namar ba u mot uba don mynta ha phyllaw jong kane ka Library udei u mot uba ym da i shongkhia eh haduh katta katta. La kumba udei u mot uba la shu tei tang dep. Ha une u mot laidong ba ïeng kynshyeng, yn tei ïa ki motdur ba shi ryngïeng jong u Tirot Sing Syiem, Syiem ka Hima Nongkhlaw, u Kiang Nangbah, u nongïakhun laitluid na Rilum Jaiñtia bad u Pa Togan Sangma, u nongïakhun laitluid na Garo Hills.
Kane ka rai ka long hadien ba u Myntri ka tnad Arts and Culture, u Bah Sanbor Shullai ryngkat ki ophisar ki la leit jngoh ïa kane ka jaka ha kaba u ïeng u mot laidong mynta. Ha kane ka jingleit jurip la don lang ruh u barikor rangbah jong ka jylla, Bah Raphael Warjri ha ka ba la aiti ban shtahdur ia kita ki durmot ba thymmai.
Kane kan long ruh ka burom kaba khraw ïa ka jylla ban pyni sha ka pyrthei India ba na kane ka jaka ruh la don ki riewïaleh laitluid pyrshah ïa ki bor synshar ka Hima Bilat naduh shuwa ba ka ri India kan khih ban ïakhun jinglaitluid. Kane ka jingpynïeng ïa kine ki mot kan long ruh kaba biang namar ka jingdap 75 snem jong ka jinglaitluid ka ri India.
Ka rai jong ka tnad Arts and Culture kam dei ban kut tang hangne, hynrei kan long kaba bha shibun ruh lada ka lah ban tei ïa kine ki dur mot shi rynïeng ha kiwei de ki bynta jong ka jylla, khamtam ha ki nongbah jong ki District. Namar kumba long mynta hi ki mot dur jong kine ki khlawait kim dei kiba la shna da ka sorkar, hynrei la shna da ki seng bad ki kynhun.
Ka snem 2022 kadei ruh ka snem kaba ka jylla ka dap 50 snem ne ka Jubili Ksiar ha kaba ka jylla ka la ïoh la ka jong ka jylla ban synshar hi dalade ïalade. Na ka bynta ka Meghalaya kaba kham ktik jingmut ha kane ka jingrakhe kan dei hi ka jingleh buromïa ki khlawait ïakhun hill state kiba la pynïoh la ka jong ka jylla na ka Assam. Ka daw ka long ba lada ym don kine ki nongïakhun hill state, kine kiba don mynta kin nym ïoh shong ha shuki ba ki shong mynta lane kin nym ïoh synshar suk kumba ki ïoh synshar mynta.
Haduh mynta ka sorkar jylla kam pat tei uno uno u mot ban pynsah nam ïa ki nongïakhun hill state, wat lada ki don kiba la aiti la ka jingim ban pynïoh la ka jong ka jylla riewlum. Haduh mynta ym pat don ruh ka kot kaban lum thup ïa ki kyrteng jong ki nongïakhun hill state, khamtam kiba kham hakhmat eh. Namar la ïohi ba haba don ki prokram ne ki jingpynkup burom na ka liang ka sorkar ïa kiba ïa don bynta ha ka jingïaleh hill state, ka hap ban pan na ki shnong ki thaw.
Kan long kaba bha bad myntoi shibun lada ka tnad Arts and Culture ka pynmih ka jingpynbna paidbah ba ki shnong ki thaw kin lum ïa ki kyrteng jong ki nongïaleh hill state bad ïa kine ki kyrteng, ka sorkar pat kan lum thup lang hajuh bad sa pynmih kum kawei ka thup ha kaba ki longdien kin tip ïa ka history jong ka jingïaleh hill state bad tip ruh ïa ki kyrteng jong kiba ïadon bynta ban ïoh la ka jong ka jylla.
