Ka jinglah jong ki Balang ban seng ïa ki skul ha kylleng ki jaka ka jingmyntoi ïa kiba bun: Ma Pala

Mawkyrwat, ‘Naiwieng 20: U Ma Vincent H. Pala, Member jong ka Parliament ha ka Lok Sabha na ka Shillong Lok Sabha Constituency mynta ha ka 19 tarik u ‘Naiwieng, 2022 ha ka jingwan ban ïuhkjat hapoh ka skul jong Presbyterian Higher Secondary School, Mawlangwir (PHSSM) ula pynpaw ba ka jinglah jong ki Balang ban buh ne seng ïa ki skul ha kylleng ki jaka ka la long ka jingmyntoi na ka bynta kiba bun ban kyntiew ïa ka jingnang jingstad.
Namarkata, u la ai khublei ba da ka jingtrei shitom jong ki Balang, ki shnong bad ki seng bapher bapher ban buh ïa ki skul pule ka la pynwan dur ha rukom kaba dei ha ka liang ka pule ka puthi hapoh jong ka jylla baroh kawei namar tip lada ym don kine ki nongseng ka pule puthi hapoh ka jylla kan sa nang hiar dor. U la ong ruh ba nalor ba ki khynnah ki ïoh ïa ka jingnang jingstad lyngba ki skul ba la pynïaid da ki Balang bapher bapher ki khynnah ki ïoh ruh ka jinghikai ïa ka akor ka burom, ka jingtip-briew tip-blei bad ki tip ruh ïa la ki jong ki riti ki dustur lyngba ka jingpynïaid jong ki niam.
U Ma Vincent Pala u la ong ba lyngba ki Balang ki la trei shitom bad ka dei ïa ki ban ai ka jingïaroh khnang ba kin lah ban pyntyllun ïa kam kham shakhmat namar wat ha ka jingïoh kaba rit ki khlem da kheiñ ïa kata bad ki la trei ïa la ka jong ka kamram. “Ka jingïoh tulop jong ki nonghikai ha ki skul mission ka long tang ha ki 4 bad 5 hajar ha ka shibnai hynrei kiba trei ïa ki kam sorkar pat ka ïoh da ki 50 bad 60 hajar bad kane kam shym la pynduh mynsiem ïa ki ban kin shim ïa kata ka lyngkor ban kit ha ka ban ai ka jingnang jingstad ïa ki khynnah skul ha ki dong ki thaiñ jong ki”, ong u Ma Pala.
U la ai ruh ka jingïaroh ba da ka jingtrei shitom jong ka Balang Presbyterian ha ki ri lum Khasi bad Jaiñtia ban pynwan dur ha ka rukom kaba dei ïa ki jaka pule ka la long ka jingmyntoi ïa ki khynnah pule bad kaba pynlong ïa ka jaidbynriew jong ngi ka jaidbynriew kaba stad bad ba shemphang namarkata, lada ka jingïatreilang hapdeng ka sorkar bad ki Balang bapher bapher ban pynwan dur ïa ka pule puthi kan sa pynlong ïa ka lawei kaba phyrnai, u la ong.
Haba kren ha kaba ïa dei bad ka Dorkhas ba kawei na ki nonghikai ka la dep ban ai ha u, u Ma Vincent H. Pala u la ong ba ha kine ki sngi kiba la dep na ka liang jong u lyngba ka jingwan ban pynsngew na u bah Carnes Sohshang uba la buh ka jingkyrpad ban leh ei ei na ka bynta kane ka skul, ma u ruh da ka jingsngewkhia ïa kata ka jingkyrpad u la dep ban leh ïa la ka jong ka bynta bad ha kine ki khyndiat sngi un sa phah ïa ka jingpynshisha ba katno u la dep ban mang ban noh ka lad jingïarap khnang ba kan long ka jingmyntoi ym tang jong ki nonghikai hynrei khamtam eh ïa ki khynnah skul kiba wan pule ha kane ka skul.
Shuh shuh ha ka jingkren jong u, u la ai mynsiem ruh na ka bynta ki khynnah skul ba borabor ka jingsdang jong ka jingim ha ki khun ki kti ka dei ka skul namarkata long ki khynnah kiba trei shitom ba kin ïoh ban kheit ïa u soh jong ka jingjop bad lada ki pass bha, ki tip-briew tip-blei bad leh donakor ki kmie ki kpa bad kiba ha ïing ha sem kin sngewsarong bad khamtam ka jaidbynriew kan nangkiew. U la ong ruh ki khynnah skul ki dei ban trei shitom ba lyngba ka jingshimkhia jong ki nonghikai ruh kan long ka jingïarap na ka bynta jong ki namar tang ki khynnah skul khlem don ki nonghikai kiba trei shitom kata ka bym lah long.
Kiba ïadonlang ha kane ka sngi ki long naduh u MDC ka Mawkyrwat Constituency, bah Carnes Sohshang, u MDC ka Pynthor bad kum u Nongïalam ka liang Pyrshah hapoh KHADC, bah P.N. Syiem, ki nonghikai lem bad ki khynnah skul lem bad kiwei de.
Ïa ka jingïalang la pynïaid da u Babu W.K. Syiemlieh, Headmaster jong ka Presbyterian Secondary School, Mawlangwir bud sa ka jingdwai sdang na u Tymmen Basan D.D. Khardewsaw, ka jingkren lyngkot na u In-charge Principal jong ka Presbyterian Higher Secondary School, Mawlangwir, u Dr. K.K. Nongsiej bad ka jingdwai pynwai na u Pastor H.W. Nongsiej.