Ka jingkylla pyrdet ha ka saiñhima sima ka dei ka bym ju lah satia ban ïathuh lypa ne ban shu batai noh mynta mynta bad ka shimpor da ki sngi, ki taiew bad ki bnai ne wat hadien shi snem ban kylla pyrdet. Ka jingleit pynïasoh jong u MLA ka Congress na Mylliem sha ka NPP mynta ka sngi ka long shwa ban dap shisnem hadien ba lai ngut ki MLA ka Congress ki la leit pynïasoh bad ka NPP, kata u Bah Charles Marngar na Umroi, u Dr. Celestine Lyngdoh na Umsning bad u Bah Gabriel Wahlang na Nongstoiñ.
Ka Congress mynta ka la kylla ‘Nod” ha ka iingdorbar thawaiñ ka jylla kaba don 60 ngut ki dkhot. Ha u snem 2023, ka Congress ka la jop 5 ngut ki MLA hynrei u MLA ka Gambegress u Saleng Sangma uba la ïakhun ïa ka elekshon MP u la shah jied kum u MP ba thymmai ka Tura. Ka Congress ka la hiar noh sha ka 4 ngut ka jingdon ki MLA. Lai ngut ki MLA ki la ryngkang sha ka NPP ha u bnai Nailar, 2024 bad mynta u snem 2025 bud sa u Bah Ronnie ïa ki dienjat jong ki lai ngut halor ka nongrim ba ka jingleit pynïasoh sha ka NPP ka long ban pynphyrnai ïa ka Mylliem Constituency.
U President ka Meghalaya Pradesh Congress Committee (MPCC) Bah Vincent Pala un hap ban kylla thiah kylla dem bad ka la don ruh ka hamsaïa ba wat u President ka MPCC un leit pynïasoh sha ka NPP shwa ka elekshon 2028 bad u MLA ka Nongthymmai u Bah Charles Pyngrope un shimti kum u nongïalam ba thymmai ha ka Seng Congress ha ka jylla.
Na ka jingleit rung jong u Bah Ronnie sha ka NPP ki khubor hamsaïa ki her stet ba u lah ban long u kyrtong MP sha ka Rajya Sabha khnang ba ka lynti kan plie ïa u MLA barim u Bah Hamletson Dohling ba un ïakhun ïa ka elekshon MLA ha u snem 2028 na Mylliem Constituency na ka tiket jong ka NPP.
U paidbah uba stad u shu peit ïa ka jingleh khun jakai jong ki Nongmihkhmat kiba kheiñ dewthala ïa ka iktiar ba ki la pynkup. U paidbah u ap sa tang ïa u snem 2028 ban ai jingsneng ïa ki MLA tam sneng bad ki MLA ryngkang diengkper. Na ki elekshon ba ladep ha ka jylla la sakhi ba bun na ki MLA ryngkang diengkper ki shah pynliem lyndang khlem lah ban khie khlieh shuh.
Sha rilum Garo ki paidbah ki ngeit bad ki kohnguh ïa ki nongïalam bad ki ïohi jngai. Ban ïoh ïa ka roi ka por kaba pahuh pahai ki jied beit thik tang ïa kawei ïa ka party kaba ki khmihlynti ba kan ïoh bat ïa u lakam synshar ha ka jylla, hynrei haba phai sha rilum Khasi bad Jaiñtia ka jingbun palat jong ki seng saiñpyrthei kum ki tit ka la pynkulmar ïa ki paidbah ïano kin jied bad ha kaba khatduh ka result kaba mih ka long ba ki seng saiñpyrthei kim lah ban ïoh ïa ka jingjop kaba bun paid watla ki la angnud da ki snem ban ïoh ïalam ïa ka Sorkar.
Ka Sorkar khleh khaw lang kan wan phai biang lada ki paidbah kim long kiba sian bad kiba stad bad lada ki dang ïai neh ha ka jinglong kaba rim bad lada kim ïohi jngai ban pynjop ïa ka party kaba lah ban ïalam ïa ka sorkar ha ka jylla bad kaba lah ban don ka jingïadei kaba jan bha bad ka Sorkar ha Delhi khnang ba ka roi ka par ruh kan tuid kumba tuid ka dud bad ka ngap.
Na ki jingkynthoh jong ki paidbah ïa ka khubor phet seng jong u Bah Ronnie ka pynpaw ba ki paidbah hi kim da kham sngewtynnat satia ïa ka jingphet seng jong ki MLA ban shu leit ryngkoh na kawei ka party sha kawei pat tang na ka bynta ka jingmyntoi shimet.
Lehse wat ki nongkyrshan bad ki nongtrei ba shitrhem jong u MLA ruh kin hap ban pyrkhat da ki hajar sien namarba ha ka sngi thep vote u dei u paidbah uba ai ïa ka rai ym ki nongtrei.
Ka Congress kaba la kylla Zero ha ka Iingdorbar Thawaiñ bad kaba dang sah mynsiem sa tang uwei u MP mynt ka la dei ka por ban shong pyrkhat sani bad ban thew sawar ïa ka jingduna ha kiba bun ki liang namarba kumba ka long mynta wat ka Congress ha ka ri India ruh ka la hiar bha haduh katta katta na ki elekshon kiba ladep long bad ka jingbym shaniah jong ki paidbah ha ka Congress kaba long ka seng saiñpyrthei kaba la rim tam ha ka ri India ka paw na ka jingbym tbit shuh jong ki nongïalam ban pynkohnguh ïa ki paidbah ym tang ha ka ri India hynrei wat ha ka jylla Meghalaya.
