Kano kano ka jinglong ka saiñhima sima kam ju neh ne sah hajuh hynrei ka kylla stet katkum ka jingïaid jong ki shalyntem ne ka jingtyllun jong ka por. Ha Meghalaya ruh, imat, nangne shakhmat, ka saiñhima sima kan sa kylla dur noh da kumwei pat. Lah ban ïohi ïa kane tang ha shwa ban poi u snem 2023, namar dei ha une u snem ba ka samoi jied syiem (MLA Election) kan sa long biang ha ka jylla Meghalaya ban jied thymmai ïa ki Nongmihkhmat paidbah ki ban mihkhmat na ki Constituency bapher bapher jong ka jylla Meghalaya.
Ki Seng Saiñpyrthei kiba kham kongsan ha Meghalaya kiba don MLA kumba long mynta ki long, ka NPP, ka UDP, ka HSPDP, ka PDF, ka KHNAM, ka NCP, ka Congress, ka BJP, nalor ki Independent. Kiba kham bun eh ki MLA ki long ka NPP, ka Congress, UDP, PDF bad HSPDP bad BJP nalor kiwei pat.
Hynrei, ka jingdon jong kine ki MLA ha kine ki party kin sa kylla noh hadien u snem 2023. Ka Congress kaba dei ka Party kaba khlaiñ eh bad heh paid naduh ki por ba mynshwa ha Meghalaya ka la troiñ kynran ha Meghalaya hadien ba u metbah Delhi ula khyllem.
Ka NPP kaba khlaiñ kynsan ha u snem 2018 (na ka jingdon jong ki 2 ngut ki MLA ha u snem 2013 mynta ka kiew sha ka jingdon haduh 20 ngut ki MLA ha u snem 2018) bad haduh mynta ka NPP ka la kiew sha ka jingbun paid kaba 22 ngut hadien ka elekshon shiteng samoi ha u snem 2021.
Ka jingwan mih jong ka All India Trinamool Congress (AITC) ha ka khyllipmat ka bym poi pyrkhat kam da kham buh jingeh eiei ruh em ïa ka NPP bad ïa ki seng riewlum naba kane ka party ka dei kaba dang thymmai hapoh kane ka jylla Meghalaya bad ka dei ruh ka party kaba ki paidbah hi kim pat lah satia ban pdiang. Lehse lada kane ka party kan ïoh mad ïa u soh ka jingjop ha ka elekshon 2023 kan dei hi kaba u paidbah u jied ïa u Kyrtong uba ïakhun na ka tiket jong kane ka party ym ba ki jied ïa ka party. Ha Meghalaya, ki briew kim kham jied ïa ka party hynrei ki jied beit ïa u kyrtong uba long u nongïalam uba biang bad uba lah ban leh bun ki kam pynroi.
Watla ka BJP ka la kiew bha ha ka ri India baroh kawei hynrei haduh mynta hi kane ka party hapoh kane ka jylla Meghalaya kam pat lah ban suhthied namarba ki paidbah hi kim pat lah satia ban pdiang ïa kane ka party kaba bat ïa u lakam synshar ha ka ri India lehse na kiba bun ki daw.
Ka UDP pat kum ka seng riewlum baheh tam ha Meghalaya kam da don thymmei eh sha rilum Garo. Ha rilum Khasi Jaiñtia ka jingïakhun ka bym lah batai satia. Hynrei kumba ka long mynta ka jingkhlaiñ jong ka NPP katba nang mih ki sngi, kan buh jingeh bha ïa ka UDP watla ka ïatreilang bad ka HSPDP hapoh ka shatri rieh slap Regional Democratic Alliance. Wur wur wer wer, la bna ba wat ki arngut ki MLA ka HSPDP kiba mynta ruh kin leit ïakhun noh na kiwei pat ki party ha ka elekshon 2023. Lada kane kan urlong shisha, ka HSPDP kan shah pynkhylliap lama ha u snem 2023 kumba la jia ïa ka seng sainpyrthei Meghalaya Democratic Party (MDP) ha u snem 2013.
Ka PDF kan hap trei tyngeh ban pynkhlaiñ bad seng nongrim bha ïalade lada ka kwah ban jop kham bun lym kumta ka lah ban nang hiar pynban na kaba la ïoh mynshwa. Lada ki MLA kiba mynta kin mih noh na ka party ha u snem 2023 khlempep kane ka party ruh kan sa jah kyrteng. U President ka Party bad ki nongïalam ki la dei ban khan bad bishar bha naduh mynta hynrei kumba ka paw mynta ka PDF ka ïohthiah lyngngai katba ka jingthem hapoh ka NPP ka la nang shongshit namar ka jingïarung seng ki MLA barim bad ki MDC kiba mynta ka la thnem bha.
Ka KHNAM bad ka NCP ruh kin hap ban saiñdur bha lada ka kwah ban ïoh kham bun ki MLA.
Hynrei ka jingkylla kaba khraw eh ka saiñ hima sima kan long ka jingryngkang dieng kper ne phet seng kine ki Sitting MLA kiba mynta. Kin don kine ki MLA kiba mynta ki ban ryngkang ryngkoh noh sha kiwei kiwei ki Party kat kum ka jingkheiñ bad sngewbit jong ki. Don ki ban dang jop biang, don pat ki ban shah rem noh.
Imat ka ladei kane ka khep ba ki seng riewlum lada ki dang angnud ban sah kyrteng ha u snem 2023 ki la dei ban ïatreilang hapoh kawei ka shatri hynrei lym kumta ka jingma ka la ap lypa lada ki ïaleh pyrshah mar kylliang.
