K a tnad ka koit ka khiah jong ka sorkar Meghalaya ka la khot ïakren ïa ki ASHA ha ka 21 tarik mynta u bnai, hadien ba ki ASHA ki la pynlong ka jingïakhih ha kylleng kylleng ki District ha kine ki sngi kiba ladep. Kane ka jingkhot ïakren na ka liang ka tnad ka koit ka khiah ka long ka lynti kaba wanrah ka jingkyrmen na ka bynta ka koit ka khiah ka jylla, namar ba ki ASHA kdei ki nongtrei kiba donkam haduh katta katta na ka bynta ka koit ka khiah ki paidbah, khamtam eh ïa ki longkmie kiba armet bad ki khunklung kiab dang kha.
Ha kine ki sngi kiba la dep, ki nongtrei ASHA kiba dei ki nongtrei ne ki nongïarap ha ka liang ka koit ka khiah, ki la pynlong ka jingiakhih bad sangeh treikam halor ka jingbym treh ka sorkar ban pynkiew ia ka jingsiew kaba ka ju siew 2000 tyngka shi bnai. Kane ka jingakhih ka la sdang hadien ba ka Myntri ka tnad ka koit ka khiah, ka la pynbna ba ka sorkar kam lah ban pdiang ïa kane ka jingdawa ki ASHA ban pynkiew ïa ka jingsiew jong ki na ka 2000 tyngka.
Kane ka jingdawa jong ki ASHA ka sngew shong hok namar ka kam kaba ki trei ka long kaba donkam haduh katta katta namar ka ïadei bad ka koit ka khiah jong ki paidbah ha ki shnong ki thaw. Kane kadei ka juk kaba ki briew ki ïabeh ïa ka jingkoit jingkhiah bad wat na ka liang ki bor sorkar ruh ki ïaleh tyngeh ban kyntiew ïa ka koit ka khiah jong ki paidbah. Dei namar kane ka daw ba ka ju pynmih ïa ki skhim kiba bun kum ka Smart Card kaba juïa tip paidbah lane ka MHIS. Mynta la mih da ka Ayushman Bharat, kaba dei jong ka sorkar pdeng ïa kaba la kyllum lang hajuh bad ka MHIS ha Meghalaya.
Nangta ka sorkar ka la thaw ruh ïa ki Village Health Council ha ki shnong ki thaw na ka bynta ka jingtreikam kaba khambha ha kaba ïadei bad ka koit ka khiah. Te lah ban ong ba ka jingtreikam ki ASHA kadei kaba kongsan, kaba wat lada ka jingtrei ka long kumba trei mon sngewbha ruh kadei ka jingtreu pat kaba hap ban aiti lut bad duh noh pat ïa kiwei kiwei pat ki kam ki jam jong ki.
Ïa ka jingtreikam kaba radbah jong ki ASHA lah ban ïohi khambha ha ki snem kiba ka jylla bad ka pyrthei hi baroh kawei ka la shah lynshop ha ka jingpang Corona ne ka COVID 19. Ha ki ar snem ba ka jylla ka la mad ia ki sngi ba ngiew jong kane ka jingpang kaba ïabit ha kaba ka la don ruh ka jingkhang dam ia ki briew ha ki iing ki sem, ka jingset la ka jong ïa ki briew kiba ngat ïa kane ka jingpang, ka jingtreikam ki ASHA kadei kaba radbah, namar ym don kiwei pat kiba nud ban tur shajan jong ki briew kiba test positive lait noh na ki ASHA ha ki shnong ki thaw. Nangta lyngba ki ASHA la pynlong ruh ïa ki awareness programme kiba hikai ia ki briew kumno ba kin lait ne iada na kane ka jingpang.
Toi, ka jingpang COVID ka la dei ka bynta jong ka history, hynrei ka jingtreikam ki ASHA ka dang iai bteng khamtam ha kine ki sngi kiba ka Meghalaya ka dei ka jylla kaba bun bha ki longkmie kiba khlad noh haba kha khun bad ka jingbun ki khunlung kiba khlad noh tang hadien ba kha. Kadei ka kamram jong ki ASHA ban rung sha ki ïing ki sem jong ki longkmie ban pynsngewthuh ia ki ba kin leit kha khun sha ki Hospital. Nangta ban pynkynmaw ruh ia kiba don khun rit ba kin leit phah injek haba la dei ka pali ban injek. Te kumta ka dei ka jingtreikam ka ban kyntiew shisha ïa ka koit ka khiah ki briew.
Wat lada ka sorkar ka la pynpaw ba ki don ki incentive na ka bynta ki ASHA, hynrei hato kan long seh ban siew katkum ka jingïoh nongpang ne ka jinglah jong ki ban rung sha ki ïing ki sem jong ki briew. Hato ki ASHA kin shu trei beit tang kane kawei ka kam, haba ka jingsiew ka long kaba rit. Nangta ki ASHA kim lah ban shu trei sah khlem pang khlem shitom ïalade ruh. Kaba mut ha ka por ba pang ba shitom ki ASHA ki hap ban shu shaniah beit ha kine ki 2000 tyngka shi bnai?. Lada ka Sikkim ka lah ban siew 10 hajar tyngka shi bnai, balei ka Meghalaya pat kam lah ban pynkiew ia ita i 2000 sha ka jingsiew kaba kham heh ïa kane?.
