Ka jingjyllei ki kam tuh kam lute ka dei ka jingsngap jar bad bym mih shakhmat jong ki nongshah sajia

Mawkyrwat, ‘Nailar, 03: Ka long kaei kaei ka kam kaba pynshong syier na ka bynta kiba bun ki paidbah jong ka dong ka thaiñ ha ki shnong ki thaw bad ki shnong kiba marjan ruh ha kaba mynta ki por ki kam tuh kam thiem, kam lute katba nang mih ki sngi ka la nang jyllei na kawei ka sngi sha kawei pat.
Lah ban kdew ba kum kine ki jingjia ba shah tuh ne shah lute ka ju jia borabor ha ïew Mawkyrwat ha kaba ki jingsniew ki la sdang ban suh thied na kawei ka sngi sha kawei pat, khamtam lei lei ka jingshah tuh na ki dukan kiba don ha ïew Mawkyrwat mynta ka la nang jur bha. Haba wad ïa ka tynrai jong ki kine kam sniew ba ju mih manla ka sngi, la suba beit ba ka dei na ka daw jong u drok namar une u jingdih u la sdang ban pur stet bha hapoh jong ka dong ka thaiñ Mawkyrwat ne wat ha ki shnong kiba marjan ruh.
Halor kane ka bynta, u bah Skhembor S. Nongrum, General Secretary jong ka Seng Samla Shnong Mawkyrwat bad uba dei ruh ha ka juh ka por u dkhot jong ka shnong Mawkyrwat haba kren ha ki lad pathai khubor u la pynpaw ka jingsngewkhia shibun namar ka jingjyllei ki nongtuh bad jingshah lute jong ki briew bad kine baroh ka dei namar ka jingbymdon ka jingïatreilang na baroh ki liang. Shuh shuh u la pynpaw ruh ba ka jingjyllei bad jingkharoi jong u drok lei lei ha kine ki jaka ka la sdang ban ïoh mynsiem la ka long ki nongdih ne wat ki nongdie ruh namar bunsien hi kum kine ki jingjia ki dei ba kim don ka jingwan shakhmat jong ki briew ne wat na ki longïing longsem ruh ban pan ki jingïarap bad thaw ki lad ki lynti kumno ban ïarap na ka bynta ki khun jong ki kiba la ngop ha une u jingdih.
“Ka jingjyllei ka jingshah tuh shah lute ka lah ruh ban dei na ki daw jong ka jingbym wan ne mih shakhmat jong ki briew kiba shah jia ban ai jingpyntip mar mar sha ki bor ba dei peit ne ki briew jong ka aiñ, namar da ka jinglong ba sngap jar jong ki, kine ki ‘riew sniew ruh ki ju ïaid sahuh bad ki nangïoh mynsiem ban thaw shuh shuh da kiwei ki lad kiba kham janai ban leh ïa ki ka sniew ha ka imlang ka sahlang”, ong u bah Skhembor. Namarkata, u la kyntu ïa ki paidbah nongshong shnong, ki nongshong ïew, ki nongwan ïew ba haba jia kum kine kim dei ban shuh sngap jar hynrei ki dei ban mihshakhmat ban pyntip khnang ba kan long ka jingïarap bad ban ïoh leh ïa kaba donkam.
Ha kawei pat ka liang u la kyntu ruh ïa ki bor jong ka aiñ (Police Department) jong ka distrik ba ki dei ban shimkhia lem bad ban pyntreikam ïa ka Anti Narcotic Task Force (ANTF) khnang ban lah ban tehlakam ïa kum kine ki kam sniew kumba long ha kiwei pat ki jaka kiba la ju ïohi ba ka jingshah kem jong ki nongdih bad khaïi drok ka kynrei bha hynrei hangne hapoh jong ka South West Khasi Hills District pat ka duna pynban ki nongdih pat ki la nangbun. “Ban rad dyngkhong ïa kum kine ki jingsniew kaba donkam mynta ban don ka jingïatreilang naduh ki bor shnong bor thaw, ki paidbah nongshong shnong bad ki bor jong ka aiñ”, u la ong.
Haba ïoh ban ïa kren pat bad ki katto katne ki nongshong dukan ha ïew Mawkyrwat bad kiba dei ruh ki briew kiba la ju shah jia teng ka jingshah prong ne shah pynpait tala ïa ki dukan ki la pynpaw ba kane ka jingleh jong kine ki runar ka long kaei kaei ka bym lah ban pdiang da lei lei bad ka long ruh pyrshah ïa ka jingkwah jong kiba bun balang, namar lymda ma ki kin trei ïa la ki jong ki kam ki jam ki jingsniew kin duna bad ka jingjaituh jong ki ban trei ka long kawei ka daw ba kin pyrkhat beit tang ïa ka ïoh ei ym da kaba pynshitom ban wad ki kam ki jam. Namarkata, ki la buh ka jingkyrpad na ka bynta jong ki ba kim dei ban ai lad ïa ka jingmut jingpyrkhat jong ki ban thaw tang ki buit tuh ne ki kam sniew hynrei ki dei ban long borabor kiba pyrkhat na ka bynta ka jingbha ka lawei jong ki hi, “wei la mlien ban sdang ïa ki kam ba sniew tang kata lada kim don ka mynsiem ban kylla ka jingsniew kan sa synshar ïa ki”, la pynpaw ki nongshong dukan.
Ha kawei pat ka liang ki la buh ruh ka jingkyrpad ba ban lait na kine ki kam sniew hapoh ïew Mawkyrwat ki la kyntu ïa ka ophis jong u Manager San Kur Ri Kynti Khaiñ Nonglang & Mawkyrwat Hat ba kin sngewbha ban long kiba peitngor lem da kaba buh ki nongpahara bad khamtam eh ban pynbiang ïa ki street light ha manla ki jaka khnang ba kan long ka jingshngaiñ ha ka ïaid ka ïeng jong ki paidbah. Ha kajuh ka por ki la buh ruh ka jingkyrpad na ka bynta ki bor jong ka aiñ ba ki dei ban shimkhia lem halor kane ka bynta ban peit pyrman lem ha ki jaka bym long shngaiñ kum ha ki jaka ïew namar tang shu la kem dum ne sdang kynjah bun ki ‘riew sniew ki la sdang ïa la ka jong ka kam ne wat ha ki por mynsngi mynshai ruh kine ki ‘riew sniew kim da lehraiñ shuh.
Kumta ban rad dyngkhong ïa kine ki jingsniew kiba la sdang ban jyllei hapoh South West Khasi Hills District khamtam eh u drok kaba donkam mynta ka long ban don ka jingïatreilang na baroh ki liang kata naduh ki nongwan ïew wan hat, ki nongshong ïew, ki paidbah nongshong shnong bad kumjuh ruh ki bor jong ka aiñ khnang ba yn lah ban tehlakam ïa kine ki kam sniew.