K a Iingdorbar Thawaiñ ka Jylla ka la mynjur ïa ka Meghalaya Residents Safety and Security Act ha u snem 2016. Hynrei kumba ka paw kane ka aiñ haduh mynta ym pat shym pyntreikam pura kumba la pruiddak. Ki la bun ki jingjia kiba buh ïa ki nongshong shnong ka jylla ha ka jingbym shngaiñ namar ka jingbym don ki aiñ kiba pyrkhing ïa ki kam runar ruser.
Ka jinglap ïa ka metïap ba la lam pyut jong u Raja Raghuvanshi na Mot Arliang kaba don hajan ka Wei Sawdong ka la pynkhih win ïa ka jylla Meghalaya bad ïa ka Jylla Madhya Pradesh. Ka jingkynthoh jong ki paidbah ka jylla Meghalaya halor kane ka jingjia ka long na ka daw ba ka Meghalaya kam pat don ïa ka aiñ kaba khlaiñ kum ka Inner Line Permit kaba lah ban khanglad ïa ki briew kiba nabar ban leh ïa ki kam runar ruser kiba pynbudnam sniew ïa ka jylla.
Ka Sorkar Jylla ka ladei ban shimkhia ban ïai tynruh dieng tyllaw ïa ka Ministry of Home Affairs jong ka Sorkar India namarba naduh u snem 2019 ka Iingdorbar Thawaiñ ka Jylla ka ladep ai jingmynjur ban pyntreikam ïa ka Inner Line Permit ha kane ka Jylla.
Ki jingjia ha kine ki khyndiat sngi baladep, la sakhi ïa ki kam runar ruser jong ki briew kiba nabar kiba pynbudnam sniew. Ki briew kiba nabar kim salia daleilei ruh em ban pynbudnam sniew namarba kim dei ki trai ri trai muluk na kane ka jylla. Kim salia watla ka jylla Meghalaya ka shah pynbudnam sniew namarba ynda ki ladep leh ïa ki kam runar ki phet noh sha la ka jong ka jylla.
Ki kam runar ruser ba la leh da ki briew kiba nabar ki phalang sha ki trai ri trai muluk jong kane ka jylla. Ki briew kiba nabar ki bym tip ïa ki jingshisha ki peitkhmat ïa ki trai shnong trai muluk.
Ka Sorkar MDA ba la ïalam da ka NPP ka hap beit ban buddien ïa ka jingdawa ban pyntreikam ïa ka ILP ha ka jylla Meghalaya namarba ka jinglong jingman jong ka jylla kam shngaiñ satia khamtam lada ki nongjngohkai pyrthei ki kylla long pynbna ki nongleh kam bymman bad ki nongleh ïa ka kam pyntriem kaba pynsuhjer ïa ka imlang ka sahlang kat haduh ban da shah kynthoh bad shah pynbudnam sniew ha kiwei ki jaidbynriew.
Ban shu ong ba ka Sorkar ka dang ïai buddien u paidbah ba bun balang uba la angnud ban pyntreikam ïa ka ILP ha ka jylla un ym suk mynsiem namarba ka jingdawa jong ka por ka la donkam kyrkieh ïa ka ILP.
Ka Sorkar MDA hap ban pyni ïa ki sakhi sabut bad ki daw kiba biang lada ka Jylla Arunachal Pradesh, Nagaland, Mizoram bad Manipur kiba la pyntreikam ïa ka Inner Line Permit kam shym la ktah ne pynwit satia ïa ki nongjngohkai pyrthei bad ym don hi ruh wat tang uwei u nongjngohkai pyrthei uba la shah pyndik na ka daw ka jingdon jong ka ILP.
Ki nongpynïaid ïa ki kam jngohkai pyrthei kim dei shuh ban dang sngew wit ne sngewthuh lada ka Meghalaya ka ïoh ban pyntreikam ïa ka ILP namarba ki hap ban pyrkhat ruh wat ïa ka jingshngaiñ jong ki nongjngohkai pyrthei bad ka jingshngaiñ ruh jong ki paidbah nongshong shnong ka jylla bad ki hap ban shim nuksa na kaei kaba dang shu dep jia ha ka shnong Sohra.
