Ka jingïaid lynti ha ka sngi Thohdieng jong ka taïew balei watla ka dei tang ka jingïaid suwari ka kut noh tang ha Umtyngngar. Khlem ka jingpyntip lypa ban khang ka pynduh nong shibun shah da ki phew hajar tyngka ïa ki dukan sha, ki dukan ja lynter ka lynti Dawki bad Sohra. Khlem ka jingpyntip lypa ba ka jingïaid suwari kan kut noh tang ha Umtyngngar kan ktah kumno ïa ki nongïaid suwari kiba la pynkhreh lypa da ki bnai ban wan jngoh kai pyrthei sha Ri Khasi mynta ka sngi?
Kane ka jingkhang mang mang da ki kynhun ki bym don ka iktiar ban leh ïa ka kam ka dei ka jingleh mon kaba palat pud. Kane ka jingleh mon bad khang mang mang katba mon khlem pep kan wanrah ïa ka jingduh nong kaba khraw ha ka kamai kajih ym tang mynta kane ka sngi hynrei ha ki sngi ban wan. Khlem pep kan sa don ka jinghiar ha ka jingwan ki nongjngoh kai bad nongshang suwari sha Ri Khasi ha ki bnai kiba bud.
Ngi ki riewpaidbah ngi kyrshan ba ki kali trai Jylla ki dei ban ïoh ïalam bad niah ïa ki nongïaid suwari. Ngi ju pynshlur ruh ïa ki paralok ba haba ki wan donkam ne wan ïaid suwari sha Ri Khasi ba kin ïaleh katba lah ban bat bad pyndonkam da ki kali trai Jylla.
Ngi kyrshan ruh ban wanrah ïa ka jingpynbeit lyngba ki kyndon policy ne aiñ ba ki kali trai Jylla kin kham ïoh nong kham bun na ka jingwan ki nongïaid suwari.
Kawei ka daw ba balei hap ban wanrah ki jingpynbeit ba ki kali trai Jylla ki dei ban ïoh kham bun ka lad ban ñiah ne ïalam ïa ki nongshang suwari ka long ba ki kali trai Jylla ki tip kham bha ïa ka jinglong jingman ki surok, ki lynti syngkien, ki shnong ki thaw bad ki nongshong shnong.
Ew! ban shu khang mon bad khlem pyntip lypa te kam long phi bad ka dei ka jingleh thurmur kaba palat.
Balei nga ban ïa ka kyntien pyntip lypa hangne? Namar kiba shu ïaid ne shang suwari ki dei kiba rung ba mih tang shi sngi ne ar sngi ne shi taiew shi hat bad ki shu wan kai pyngngad. Da ki la tip lypa ba yn khang kin ym jin da wan hi. Kin wan leh aiu hi ban pynktha khlieh ne pyndukha mynsiem haba ka jingthmu ka long tang ban wan kai pyngngad bad pynjah thait shipor. Ki lah ban jied ban leit sha kiwei pat ki jaka ba aram ka rung ka mih namar ym dei tang ka Sohra ne Dawki kaba lah ban pynbyrngia ne pynjah thait bad pynjrem ïa ka jingim ba lywait.
Ka bneng kan ym hap bad ka pyrthei ruh kan ym wai hi lada kim ïoh shang suwari ne shang pangad sha Ri Khasi.
Tangba, u Home Minister ka Jylla Meghalaya te u lah FAIL namar ba um lah ban teh lakam ïa ki jingleh mon.
Ka phawer u Aesop te ka pynkynmaw ba “ki khun ïohmon kim ju long ei ei.”
