Ka jingïatylli jong ka Jaidbynriew ka dei kaba donkam tam ha kine ki sngi : President KSU

Shillong, Jymmang 26 : U President Rangbah jong ka KSU, Bah Lambokstarwell Marngar u la ong ba ka jingïatylli jong ka Jaidbynriew ka long kaba donkam kyrkieh ha kum kane ka por ban tehsong kawei ïa ka Jaidbynriew.
Ïa kane u la kren ha ka jingïakob Mr bad Ms Hynñiewtrep kaba la pynlong da ka KSU Delhi Unit ha Meghalaya House, Dr. APJ Abdul Kalam Road ha ka sngi Saitjain.
Nangta u la ong ruh ba ka thong jong ka KSU haba ka pynlong ïa kino kino ki prokram ka long ban tehsong ïa ki samla ka Jaidbynriew haba ki don ha kylleng ki jaka shabar na la ka jong ka jylla khamtam ban peit lang ïa ka khia ka shon ba ki samla ka Jaidbynriew ki kynduh bad ruh ban ïarap bad ïada ïa ki haba ki don ïa kino kino ki jingeh.
“Hapdeng ka jingkyrduh kam kyrduh jam bun ki samla ki mih na ka jylla ban leit sha ri thor tangba teng teng ki shah ïalam bad pyndonkam bakla.
“Kumta, nga sngew ba ngi dei ban long kiba husiar bad long ka kti kamon ka kti kadiang ban tei bad pynsngewthuh ïa ki paradoh parasnam ban ym shah pyndonkam bakla.
U President u la ong ruh ba u pangnud lada don kano kano ka jingshah thombor la ka long ïa ki shynrang ne kynthei shabar na la ka jyla. “Kumta, ka jingïatylli jong ka Jaidbynriew kadei kaba donkam tam ha kine ki sngi. Long maphi ka sharak ban tbeh jingshai ïa ka jylla jong ki bad ruh ban long ki simpah sim song ïa ka Jaidbynriew,” u la ong.
Ha kane ka sngi la donlang ruh naduh u Symbud Myntri Rangbah ka Jylla Bah Prestone Tynsong kum u Kongsan, u MP ka Tura Saleng A Sangma, MLA ka Jowai Bah Wailad Shylla, Bah Daniel Thangkhiew OSD jong u Myntri Rangbah bad ruh ki nongïalam jong ka KSU Seng Kmie nalor ki nongïalam bad ki dkhot jongka KSU Delhi Unit.