Shillong, Nailar 30 : Ka Meghalaya State Chapter of Indian Medical Association (IMA) dang shen ka pynlong ïa ka jingïathir jingmut CME ban pyrkhat ïa ka jingbuh thong jong ka India ban rat dyngkong noh ïa ka jingpang Tuberculosis shwa u 2025. Ka jingpang Tuberculosis ka lah mih hakhmat duh kum ka jingpang kaba bam ïa ka jingim briew, hadien u Covid. Ka jingslem ban lap, jingbakla dih dawai, bad ka jingdon ryngkat bad kiwei ki jingpang kum jingpang Shini, jingkhie biang ka TB, drug resistant variants, jingduna ki accredited laboratory ban leh ïa ka drug sensitivity testing bad jingbym biang ka bam ha ka nongrim ka jingduna ka ïoh ka kot, ki dei shisha ki dieng pynkiang ïa ki prokram Tuberculosis Control. Da kaba pynshai ïa ka histori jong ka jingpang TB, u Prof G K Medhi, HoD Community Medicine, u ong ba ka jingrat dyngkhong ïa ka jingpang TB na ka Ri hapoh 30 tylli ki bnai ban wan, ka long ka thong kaba khmih ban urlong na ka phang ka koit ka khia u paidbah.
Ha ka jingkren jong u ha katei ka lympung kum u kongsan, u Prof. Nalin Mehta Director NEIGRIHMS u ong ba ban pynduh pyndam ïa ka jingpang TB ha ka por ba lyngkot ka dei kaba eh shisha, hynrei ha ka jingpyrshang kum ki briew ka donkam eh ban ïa shut jabieng lang na ka bynta ka bha ka miat ka Ri baroh kawei.
U Principal Secretary Health, Government of Meghalaya, u Sampath Kumar, IAS uba dei u
Guest of Honour ha katei ka lympung, u ong ba shisien ka por ka Malaria ka lah saphriang bha ha ka jylla Meghalaya, hynrei da ka jingtrei shitom ka sorkar da kaba shim bun ki lynti da kaba sdang na ki distrik ka ri lum Garo (ka jur bha ka malaria ha kato ka por) ka Malaria ka hiar wut wut da ka jingdon ka early detection bad ki aggressive anti-malarial medicines. Da kumjuh hi ka rukom pat, lah ban shim bad ban ban tur ha kaba ïadei bad ka jingpang TB, u la ong.
Ha kaba iadei bad ka liang ka multi-drug resistant tuberculosis (MDR-TB), u Prof P.K. Bhattacharya, HoD Medicine, u ai nuksa ïa ka jingshah kren bad shah ibeiñ u briew uba ïoh ïa katei ka jingpang. Ki don 7 tylli ki jingkren na khmat, 2 tylli ki jingmer jingmut bad kawei ka kylla jingïashut jabieng ban ïa ïoh ka jinglap kloi ïa ka jingpang, bad jingsumar ïa ka jingpang TB. Ki stad pyrkhat na bun tylli ki tnad kiba ba shim bynta ki long na General Medicine, TB and Pulmonary Medicine, Microbiology, Community Medicine, Orthopaedics jong ka NEIGRIHMS, WHO NTEP cell (Meghalaya), Nazareth Hospital bad ka Medical wing ka Assam Rifles. ïa ka CME la bei tyngka da ka National Health Mission, IMA bad ka NEIGRIHMS.
Ha ka jingpynkup burom, la don rynkat lem u Dean NEIGRIHMS Prof. G. K. Medhi bad Director Medical Assam Rifles Dr. A. K. Mukhopadhyay, IMA Honorary Secretary Prof. Bhaskar Borgohain and IMA President Prof. C Daniala.
Palat 50 ngut ki iashim bynta markhmat ha kane ka hybrid CME bad kiwei pat ki shim bynta da ka online mode na kylleng ki jaka jong ka Ri.
