Ka jingïap ka Darisha bad i khun, ka jingbym kam u Bah, pynshai ka Dorbar Shnong Langtor

Shillong, Lber, 08: Kawei na ki jingjia kaba sngewsih ha ka shnong Langtor ha kaba ïadei bad ka jingkhladnoh ba khlem dei por jong ka Kong Darisha Lyngdoh Kynshi, 26 snem ka rta bad i khun shynrang iba dang ar bnai ha kaba ïa ka met jong kine ki arngut ki shi kmie shi khun la lap na kawei ka pung pynlang urn ba jyndong kaba don ha shnong Langtor hi ha ka step 2 tarik, Lber, 2025.
Ka Executive Committee jong ka Dorbar Shnong Langtor kaba sngewkhia halor ki khubor kiba la mih khlem da pynpaw pura bad pynshai bha shaphang kane ka jingjia basngewsih hadien ba la ka ïoh ka ka jingbatai ha ka jingthoh na ki bahaiing bahasem jong ka Kong Darisha Lyngdoh, ka sngewdei ban pynmih ïa kane ka kyrwoh kaba batai ïa ki jingjia kumba ki long hashuwa ban lap ïa ka metïap jong ka Kong Darisha Lyngdoh bad i khun ba dang bah ha ka met.
U kyrwoh ba la phah sha ki lad pathai khubor ha ka sngi Saitjaiñ da ka Dorbar Shnong Langtor kaba hap hapoh ka Hima Nongkhlaw ba la soi bad shon muhor da u Sordar bad u Secretary ka la ïathuh ba ha u bnai Nailar, 2024, ki bahaing hasem ki la tip ba ka Darisha Lyngdoh ka la armet bad ka Darisha ka ïathuh ha la ki bahaiing ba u kpa jong i khyllung ba dang pun u dei uwei u briew ba la shu khot hangne kum ‘U Bah’.
“Ha u bnai Nailar, 2024 ki bahaiing ka Darisha ki la pyntip sha une u Bah ba ka Darisha ka la ar met na u. Une u Bah u la leit sha iing ka Darisha bad ong ba um dei u kpa jong i khyllung ba ka Darisha ka dang pun. Une u Bah u la byrngem byrsit ruh ïa ka Darisha bad ïa ki bahaiing ba kim dei ban ïathuh ïano ïano ba une u Bah u dei u kpa jong ine i khunlung ba dang pun hynrei lym kumta kin mad ïa ki jingeh,” ong u kyrwoh.
“Ha ka 3 tarik, Kyllalyngkot, 2025, ka Darisha ka la kha ïa u khunglung shynrang ha Tirot Sing Memorial Civil Hospital, Mairang. Ha ka 15 tarik, Kyllalyngkot, 2025 une u Bah u la leit biang sha iing jong ka Darisha ban byrngem byrsit bad ban pyntieng ka ka Darisha bad ïa ki bahaiing jong ka. Une u Bah u la dawa ba dei ban weng bad ban pyndam ïa ka kyrteng jong u na baroh ki kot ki sla ba la ïoh na Hospital kiba thoh ïa ka kyrteng jong une U Bah kum u kpa jong i khun ka Darisha ba dang shu kha,” la bynrap u kyrwoh.
U kyrwoh u la pyntip ba ka 18 tarik, Kyllalyngkot, 2025, kawei ka briew ba la phah da U Bah bad ki bahaiing jong u ka la leit ban pyntieng bad ban byrngem byrsit biang ïa ka Darisha bad ïa ki bahaiing ba kin sa mad ïa kiba bun ki jingeh lada kim leh kumba la dawa da u Bah ïa ki.
“Ha ka taiew ba nyngkong jong u bnai Rymphang, 2025 ka Darisha ka ïoh pdiang ïa ka Pleader’s Notice kaba la bthah ïa ka ban weng ïa ka kyrteng jong u Bah na ki kot ki sla ba lathoh ïa ka kyrteng jong u kum u kpa jong i khun ka Darisha lane ban hap leh ïa ka DNA Test na ka bynta ban pynshisha ïa ka jinglong kpa jong u Bah ïa i khun ka Darisha,” la pyntip ka Dorbar Shnong ha u kyrwoh.
“Ha ka 10 tarik, Rymphang, 2025 ki bahaiing jong ka Darisha ki leit ïakynduh ïa u Medical Superintendent jong ka Tirot Sing Memorial Civil Hospital, Mairang bad ban kyrpad ïa u ban ïarap ban pynleh lem ïa ka DNA Test hynrei u Medical Superintendent u la ïathuh ïa ki bahaiing jong ka Darisha ba yn ym lah ban leh ïa ka DNA Test khlem kano kano ka hukum jong ka Iingbishar. Ha ka 12 tarik, Rymphang, 2025 ki bahaiing jong ka Darisha ki la ujor da ka ejahar ha Mairang Police Station ban ïada ïa ka Darisha na ki jingbyrngem byrsit jong u Bah ïa ka Darisha bad ban ïarap ruh ban pynleh ïa ka DNA test na ka bynta ban pynshisha ïa ka jinglong kpa jong u Bah ïa i khun ka Darisha. Ha ka 24 tarik, Rymphang, 2025 u Judicial Magistrate jong ka Eastern West Khasi Hills u la khot ïa ka jingbishar ba nyngkong bad ha ka 28 tarik, Rymphang, 2025 ïa ka jingbishar ba la khot da u Judicial Magistrate ka Eastern West Khasi Hills la pynkynriah noh,” la ïathuh shuh shuh u kyrwoh.
“Ha ka 1 tarik, Lber, 2025 ki bahaing hasem ki la shem ba ka Darisha ka la jah na la iing ryngkat bad i khun jong ka ha ka por 5:30 baje janmiet bad ha kane kajuh ka sngi, ki bahaing hasem ki la ujor da ka ejahar ha Mairang Police Station halor ka jingjah kynsan jong ka Darisha na la iing. Ha ka 2 tarik, Lber, 2025 la lap ba ka Darisha ka la ïap ryngkat bad i khun ba ka dang bah ha ka met jong ka ha ka por 9 baje mynstep bad ha kane kajuh ka sngi la ujor ïa ka ejahar ha Mairang Police Station halor ka jingsuba shah pynïap jong ka Darisha bad i khun jong ka iba dang ar bnai,” ong u kyrwoh khubor.
Ka Executive Committee jong ka Dorbar Shnong Langtor ka kwah pyntip hangne khnang ba kan ym mih kano kano ka jingsngewthuh bakla ïa kine ki jingjia baroh hapoh shnong bad shabar shnong kan ap ïa ka jingbishar bahok jong ka Iingbishar.